مجرد نصيحة..
لما تمر بتجربة صعبة أيا كان نوعها من فقد أو مشكلة كبيرة أو وعكة صحية إوعى تقول دى أصعب حاجه وعمرى ماهعدى بحاجة صعبة كدا فى حياتى تانى لإن فى الأغلب هتعدى بحاجات أصعب بكتير ووقتها موازينك هتختل هتحس إن الحياة مش عادلة وإن اشمعنى إنت اللى بيحصل معاك كدا..
بما إن زى انهاردا من سنتين كان أخر يوم بابا يقضيه معايا وذكرياته محوطانى
كنت دايما بشوف بابا عسول أوييي بس حرفيا بابا كان جميل أوى وهو صغير زى الملاك بالظبط ومتخيلة الإنسان لما يدخل الجنة بيدخل فى هيئته لما كان شاب ف إن شاء الله بابا دلوقتى يكون بالهيئة دى فى الجنة منعم فيها
بيجى عليك وقت تفتكر فيه نفسك القديمة وقد اي من سنة واحدة بس كنت حد تانى مالوش علاقة بيك ولا يمثلك تماما ف الوقت اللى بتبدأ تحس فيه بمشاعر مختلطة مش عارفة تضحك ولا تزعل بتلاقى نفسك حرفيا مخسرتش اى حاجة
بعد كثير من الوقت
أدركت أن الإنتظار فى حد ذاته يجعلنا نتآكل من الداخل
لكن اليقين يجعل كفة الانتظار ثابتة لا تهتز
لذا يقينك سيهون عليك كثيرا
حتى وإن لم تصل ستكون مرحبا بالأمر وأمر الله نافذ لا محالة ♥
بعد أى انتكاسة بتعدى على الانسان لحظة يحس فيها ان كل التعب اللى اتعرضله مجرد حاجات عادية وان الحياة بسيطة خالص وان كان ممكن يواجه الزعل دا بطاقة اقل على قد مابتكون حاجة كويسة على قد ما بيبقا الانسان وصلها بعد ما خسر حاجات كتيرة.
اتعرفت على واحدة بطريقة عشوائية جدا فسألتنى انتى بتدرسى إيه ومن عيلة مين وكدا فاتفاجئت إن بابا هو مدرس إبنها وإن هى تعرفنى من قبلها من كلام بابا عنى(للولاد فى الفصل) وإنه بيحكيلهم عنى وإنى حد مجتهد وشاطر وهى بتحكيلى كنت هعيط والله
ربنا يرحمه ويغفرله ويسكنه فسيح جناته
لغاية دلوقتى مخى مش قادر يفهم تلت حاجات
1 الناس اللى شايفة ان المرض النفسى ليه علاقة بالتدين (المواد الكيميائية اللى فى المخ بريئة من العبط دا)
2 بتوع التنمية البشرية اللى بيقولو لو قمت بدرى خدت دش مش هيجيلك مرض نفسى
3 الناس اللى شايفة المرض النفسى حاجة عيب (متخلفين عموما)
عندى مشاكل مع الناس الملتزمة اللى بتحب تقلل من غيرها لمجرد انهم مش نفس درجة التزامهم أو إنهم بيعملو ذنوب لسة شايفة تويتة دلوقتى استفزتنى الصراحة اللى هو حبيبتى فوقى انتى معملتيش انجاز دا نعمة من عند ربنا اسأليه الثبات عليها ومالكيش دعوة بحد