يا ملكنا كش
عمال تحش
والشعب كله ينفخ يفش
والناس غلابه
من توت ل بابه
والحلم كان مطرح وعش
يا تعلمونا علي قفانا
او عالبلاطه تقولوها وش
ان انتوا راح تاكلوها والعه
وان احنا هانقضيها مش
اختاروا لينا حالين وبس
من غير ماندري ولا نحس
نبقي معاكم نسرق نغش
ياتموتونا في الزيت نطش
تمر الضحكه مرور الكرام
تمر في دقيقه زي الترام
نقف ننتظرها بشوق ويا لهفه
في كلمه عاديه او حتي تافهه
ومره تعاندنا تغيب بالشهور
ودورنا بيجي ف اخر الطابور
ونصعب عليها قالت حرام
هاشيل بكره ليكم واحد جرام٠
بينك وبين الحب
سكه سفر
والسكه واقف فيها
٢ غفر
الاولاني اسمه الظروف
والتاني اسمه ٤ حروف
وعالطريق اسمه اتحفر
واحد ومؤمن بالحياه
والتاني من زمان كفر
بالحب واللي آمنوا بيه
والعشق واللي هامو فيه
وهايموتنا نفر نفر
افهم كل الكلام واعمل
عبيط
وان قالوا كلام كبير خليك
بسيط
يعني السكوت اضمن
صفه الهدوء أأمن
رايق والكل نار بتشيط
دقه وانت السميط
وان عملوا يوم ثوره
خليك في الارنبيط