بعد اي تويتة توضح استيائي من النظام الحالي بيجيلي عشرات المتابعين المحسوبين على التيارات الاسلامية،والعكس بيحصل لما باكتب تويتة توضح رفضي للاسلام السياسي او لتوغل المشايخ ف نظم حياتنا..اهلا وسهلا بالجميع، بس ياريت اللي يقرر يتابعني ياخد لفه الأول ف حسابي عشان ماينصدمش بعدين.
نموذج التوجيه النفسي الحقير عشان الناس تحس بالذنب وانها مقصرة.. التريليون ده لما يتوزع على عددنا يبقى نصيب الفرد ١٠ آلاف جنيه ف السنة اكل وشرب، يعني حوالي ٨٣٠ جنيه ف الشهر، يعني ٢٧ جنيه ف اليوم.. عاوزنا نستكتر انه النفر ياكل ويشرب ب ٢٧ جنيه ف اليوم تلات وجبات!!!
الكاستنج ل"الباب في الباب" خد شهور لان شركة "سوني" حاولت تلاقي أقرب تصور مصري لكل شخصيات every body loves Raymond.لكن احمد خليل من اول قعدة الكل اتأكد انه هو ده، مع ان مالوش سوابق في الكوميديا. وبدون أي مبالغة كان الممثل الوحيد في العمل اللي تفوق على قرينه الأمريكي. الله يرحمه.
لما باقابل حد سنه من ٢٢ مثلا ل ٣٠ سنة بانشكح جدا بمنظر لمعة عينيه ساعة مايعرف دوري ف كتابة عالم سمسم.فخور لكوني جزء من عمل راسخ في ذاكرة جيل،وممتن للي كانوا سبب ف ده،على رأسهم المنتجة الفنية الجميلة الذكية الحكيمة المخلصة،اللي للاسف كتير ماستمتعوش بمعرفتها،دينا أمين الله يرحمها.
الشاب ده بالكتير مواليد ٢٠٠٠ يعني بعد احتلال فلسطين بنصف قرن، ووعيه بالكامل تشكّل في عقود "السلام". والنهارده بيطلع البيان ده باسم زمايله في واحدة من اكتر البقع اللي احنا بنفترض انها "منعزلة عن همومنا الاجتماعية والسياسية".
دولة الكيان المحتل، يسعدني اقولك:
!you have no chance
١- على مدار الاسبوعين اللي فاتوا استمتعت بسلسلة "الحضارة المفقودة" على اليوتيوب اكتر من استمتاعي بعشرات المسلسلات العالمية الوثائقية او حتى الدرامية على نتفلكس وديزني.. فيه حلقات شفتها اربع مرات واعتقد تكرار المشاهدة هايكون اساسي ف علاقتي بالسلسلة دي.. وده له اسباب كتير +
حقيقي كل ما التصريح ده بيعدي عليا قلبي بيوجعني.. ده حزن ما بعده حزن.. هو احنا فعلا كل الديون والمنح والقروض اللي بنلبسها يمين وشمال ماكناش عاملين حساب التعليم الكويس فيهم، بس عاملين حساب اكبر جامع وأحلى اوكتاجون واطول عامود نور؟ احنا فعلا للدرجة دي اولوياتنا مش واضحة زي الشمس؟
أخدت سكرينشوت للكوت ريتويت دي، عشان احتفظ بها للابد، لانها ف الحقيقة بتلخص مجلدات حول الضمير والمبادئ والمواقف والقيم، ومجلدات تانية حول السياسة والاعلام وحرية التعبير.. والاهم ان الكوت ريتويت دي بتلخص جزء كبير من اللي حصل ف العشر سنين اللي فاتوا.
١- ليه مسلسل "بالطو" مهم؟ليه فيه اتفاق كبير انه من المسلسلات القليلة الجيدة جدا في السنوات الاخيرة؟باختصار: ده مسلسل متعوب عليه، الاخلاص واضح في تفاصيله، والسعي الحقيقي للاتقان في كل عناصره الفنية لا يخفى عن عيون الناس اللي ليهم ف الشغلانة.. لكن لاني حبيته فعلا، حابب افصّل شوية +
واحد هتك عرض سبع بنات، اتحكم عليه بتلات سنين (اقل من ٦ شهور لكل بنت) ويقدر يستأنف.. واحد تاني عمل ريتويت، اتحكم عليه بخمس سنين، وماتخصمش منهم سنتين حبس احتياطي (يعني المجموع ٧) ومايقدرش يستأنف... يحدث الان في بلد ما.
أسوأ صفة ممكن الجاهل ياخدها جنب جهله، انه يكون احمق، فيكشف جهله لمن حوله.
طبعا وصف افلام اللمبي وخالتي فرنسا وكلم ماما بكونها افلام "منحطة"، ممكن نعتبره مع التجاوز نابع من الذائقة الفنية اللي بتختلف من شخص للتاني.. شخصيا باعتبر خالتي فرنسا فيلم جيد جدا.. اما اللمبي فهو فيلم
من يومين روتانا كلاسيك عرضت مسرحية تخاريف، فتحنا على فصل الدكتاتور.. ولادي واصحابهم اعمارهم من ١٧ لـ ٢٢ صوت ضحكهم جاب اخر العمارة وهم بيسقطوا كل كلمة على الوضع الحالي.. محمد صبحي عمل قطعة فنية للتاريخ، وهاتعيش.. اما اي كلام مستفز ممكن يكون قاله بعد كده، ف ده اللي هايتنسي!
وصلنا لمرحلة ان الدولة تمنع الكهربا عن الشعب عشان تبيعها بالعملة الصعبة في محاولة لتسديد جزء من ديونها.. كده الشعب اتكدّر وقت الاستدانة، وبيتكدّر وقت الدفع، ومش عارف اصلا فلوس الدين فادته بإيه ف حياته.. كل التشبيهات اللي ممكن تخطر ع البال للوضع ده مهينة لدرجة اخجل اقولها.
طب بالنسبة لورق الجرايد اللي الحكومة بتستورده بنسبة ١٠٠٪ لجرايدنا القومية الجليلة.. ايه رايكم نوفر دولار ونكتفي في زمن الازمة بالنسخة الاليكترونية من تحفنا الصحفية، ونبقى ضربنا بتاع خمسة وعشرين عصفور بحجر واحد؟!
صديق قاللي زمان: اصعب انواع العقبات اللي هاتواجهها في طريقك لتحقيق احلامك، هي التسهيلات في الاتجاه المعاكس!
مش عارف دي كانت حكمة من بنات افكاره، وللا قراها ف كتاب او سمعها ف فيلم، ب�� الحقيقة انها مابتروحش عن بالي من ساعة ماسمعتها، وباستحضرها في مواقف كتير بامر بيها او باشوف
ف نيويورك من ٢٠ سنة دخلت محل احذية بياعته مغربية، اتجننت لما عرفت اني مصري وفضلت ربع ساعة تحاول توصفلي نجمها المفضل اللي مش فاكرة اسمه وبتأكد انه معشوق الجماهير في مدينتها الصغيرة ف المغرب، بعد مالفيت على كل النجوم اللي يخطروا على بالك، طلع كرم مطاوع! ولاجل خاطر عيونه عملتلي خصم!
لاول مرة من عشرين سنة مثلا اتفرج تاني على "اسرار البنات". شفته في السينما سنة عرضه ٢٠٠١ وشفته بعدها تلات اربع مرات ڤيديو. ايامها كنت شايفه فيلم حلو، لكن لما شفته النهارده اكتشفت انه فيلم رائع واستثنائي.
سيناريو الاستاذة "عزة شلبي" هو بالتأكيد افضل ما اخرجه "مجدي احمد علي"، لدرجة
النهارده كملت ست شهور بالظبط من غير سجاير، بعد تلاتين سنة تدخين محاولتش ابطل خلالهم ولا مرة..
القرار كان مفاجئ، وماسبقوش اي تمهيد او تدريج او مناورة بوسائل تعويضية او تهديد صحي او ضغوط من اي نوع، مجرد اني حسيت فجأة اني مش عاوز ادخن..
والتنفيذ ماكانش صعب ولا فيه اي معاناة..
بشكل موضوعي، واذا اتفقنا انه المقصود بالتطبيل هو نفاق السلطة، اتصور انه نفاق التاجر لا يتساوى بنفاق الإعلامي..ماحدش بينتظر من التاجر غير بضاعة كويسة بسعر مناسب ، بينما الاعلامي نفاقه معناه تخلي عن دوره المفترض كمراقب للسلطة، وتعمد تضليل وخداع للناس، على عكس الكود الاخلاقي لمهنته.
الى كل حد منزعج من المذيعة الغريبة بتاعة ام بي سي مصر.. جربوا كلكم تتجاهلوها تماما لمدة شهر واحد.. لا تعليق ولا كوت ريتويت ولا ميم ولا الهوا.. شهر واحد بس، هاتلاقوها اختفت.. هي بتتغذى على الهجوم وبتستدعيه بكامل طاقتها، اقطعوا عنها الامداد وهاتختفي بجد
اللي بيحصل مع مستشفى ٥٧٣٥٧ مؤلم جدا بس للاسف سيزداد ايلاما وقسوة..لما تضغط على الطبقات المتوسطة هاتكون التبرعات هي اول ما يقتصدوا في الانفاق عليه لان اللي يعوزه البيت يحرم ع الجمعيات.. ده نتاج ربع قرن من تملص الدولة من واجباتها واستسهال تقديم الخدمات عبر تبرعات المقتدرين.
مكنتش اعرف ان انت اللي كتبت عالم سمسم، ده كان البرنامج المفضل بتاعي وانا صغيرة وكنت بستنى اتفرج عليه بعد المدرسة … — عالم سمسم اكتر حاجة أنا فخور بيها ف شغلي وامتناني لتجربته ممتد على المستوى المهني والإنساني.. واكيد تيم حسن كان س…
من بكرة "ساينفلد" هايبقى على نتفلكس، واحد من أيقونات النوع الفني المنقرض-الستكوم- بشكله الكلاسيكي. الكوميديا فيه أمريكاني قوي،بس اول ما تلقط مفاتيحها هاتستمتع.ده المسلسل اللي شوارع نيويورك فضيت يوم عرض حلقته الاخيرة،واللي صاحبه رفض عرض من المحطة بستة مليون دولار للحلقة عشان يكمل.
جريمة قتل الطفل الفلسطيني "وديع" في شيكاغو على يد عجوز امريكي، مسئول عنها الرئيس الامريكي چو پايدن، الذي قال كذبا انه رأى اطفال من ابناء المستوطنين الصهاينة مفصولي الرؤوس بعد هجوم المقاومة الفلسطينية يوم ٧ اكتوبر. الكذبة ادت للجريمة بشكل مباشر، ولا استوعب اي وسيلة لتجاوز ذلك!
استطلاعات الراي في بريطانيا بتقول ان فوق ٦٠٪ من الشريحة العمرية بين ١٨- ٣٠ مساندين للحق الفلسطيني.. جيلنا والاكبر منه كانوا بيكلموا نفسهم، بينما جيل اولادنا بيكلم العالم.. مافيش اي امل في حكومات العالم وانظمته الرسمية صحيح، بس دي مسألة وقت.
ناس كتير من اللي ماتابعوش Succession ممكن بسبب موجة التفاعلات الكبيرة بعد عرض الحلقة الاخيرة، يبدؤوا فرجة عليه.. طبعا وقبل اي شئ، يا بختهم، هايخوضوا الرحلة العظيمة من بدايتها لنهايتها، من غير ما يضطروا ينتظروا سنة بين كل مرحلة والتانية.. بس مش غلط بما اني اتفرجت خلاص، اني انظر
مبدئيا، عاجبني جدا لفظ "مساكنة"، ومش عارف امتى بدأ استخدامه على نطاق واسع، ولا مين اللي قرر يبتكره لاول مرة كتعبير عربي عن مرحلة الـ living together في العلاقات العاطفية بالمفهوم الليبرالي الغربي..
عاجبني لانه حميمي وحنون، ومستلهم للوصف القرآني في تلخيص معجزة علاقة الرجل
١- مساء ٢٤ يناير ٢٠١١ اجتمعت مع النجم اياد نصار والمخرج اكرم فريد على درافت فيلم هانعمله سوا، والملاحظات اللي اتفقنا عليها كانت تتطلب درافت جديد، فقررت اشتغل فيها تاني يوم على طول، يوم ٢٥.. من الساعة عشرة كنت قاعد ف كافيه الاستقبال بنادي وادي دجلة المعادي، بس ماعرفتش اشتغل +
ف لحظة فرحتنا بالسوكسيه العالمي الايجابي لمصر بعد اللي عمله مبدعين مصريين ف مسلسل ديزني،انتكسنا بسوكسيه عالمي برضه بس زي الزفت،بسبب التعامل الأمني الاحمق مع يوتيوبر امريكاني كان جاي يعمل حلقة عن الأكل ف بلدنا ولما شافوا كاميرته اترعبوا كانه جاسوس!!
الفضيحة شافها ١.٤ مليون ف يوم
مش قادر استوعب سخافته بصراحة، يعني شرب معاها قبل كده فالست اعتقدت ان ده عادي.. مش عاوز يشرب ف رمضان، او تاب تماما يا سيدي ومش هايحطها ف بقه تاني، وماله ربنا يقوي إيمانه، بس ليه يحرج الست كده ويخليها مش مستوعبة هي غلطت ف ايه؟! ماتاخد الهدية وتركنها فوق الدولاب وللا حتى ترميها 😅
شخصية الـ gay ف اغلب مسلسلات نتفلكس بقت شبه شخصية المسيحي ف اغلب المسلسلات المصرية.. محطوطة "برو عتب" لاثبات الحضور، بدون اي ابعاد نفسية حقيقية، وغالبا طيب جدا وكيوت واللي حواليه بيحبوه عشان نقول ان عندنا وحدة وطنية او قبول للتنوع الجنسي…. الاهداف السياسية تفسد الدراما.
شئ مدهش لما تتفرج في السينما على فيلم اتعمل من ٣٥ سنة، وتكتشف ان كل تفصيلة وكل شخصية وكل علاقة وكل تحوّل ويمكن كل جملة حوار، ما زالوا صالحين للاستخدام وقادرين على التأثير لحد دلوقت.. لكن طبعا المدهش اكتر انك ماتقدرش تعمل فيلم جديد فيه ربع هذا الاشتباك مع الواقع دلوقت +١
مع وجود اوبشن skip intro بقيت اتفرج على تترات اي عمل حلقة او اتنين بالكتير وبعد كده افوّته،التتر الوحيد اللي باستمتع بيه دايما(يمكن اكتر من استمتاعي بالحلقة نفسها)هو تتر "الكبير قوي"..أغنية ايقونية حقيقي، التركيبة الموسيقية بين الراب والصعيدي حاجة كده من التجليّات صعبة التكرار
خدت بالي النهاردة انه لما بِنك فلويد كانوا بيتكلموا عن معنى الحياة والموت وفلسفة الوجود البشري ف البومهم الايقوني dark side of the moon من ٥٠ سنة تقريبا، كان حليم بيغني الهوا هوايا هابنيلك قصر عالي.. الفرق المهول ده في دور الاغاني والموسيقا كمكوّن ثقافي فعّال، محتاج دراسات كتير.
ليه مانفرحش لفارس حسونة اللي اخد ذهبية الأولمبياد كقطري بعد ما قطر احتضنته رياضيا،، زي ما فرحنا للدكتور زويل لما اخد نوبل كأمريكي بعد ما أمريكا احتضنته علميا؟
هي ايه التجارة او الصناعة او الزراعة اللي ممكن تجيب اكتر من ٢٥٪ عائد سنوي؟ طب ايه اللي يمنع اي حد مشغل فلوسه في المجالات دي انه يسيّلها ويحطها ف شهادة استثمار؟ تساؤلات بغرض الفهم حقيقي، انا مابفهمش ف الاقتصاد.
زي ما يكون محمد دياب هايلعب مع المصريين ف مجال المسلسلات، نفس الدور اللي بيلعبه محمد صلاح ف الكورة.. سفير شعبي، بيحط اسم مصر ف مكانة مميزة، وبيخليها قدام العالم كله مصدر للبهجة والمتعة.. سلاحه -زي صلاح- الشغف بمهنته والإخلاص لشغله والثقة ف قدرته على التفوق.
#MoonKnight
الڤيديو ده يكسف قوي… اتمنى لو حد يعرف محمود الليثي بشكل مباشر يبلغه انه لازم يمسحه ويعتذر بشكل واضح. لازم يفهم ان اللي قاله ده سخيف وغلط وعيب، ولازم يفهم ان شغلته من غير راي الجمهور مالهاش قيمة ولا وزن، وانه لو عاوز يسمع الرأي الحلو بس يبقى يقف يمثل ف صالة بيته قدام اهله واصحابه
منظر مثير للسخرية واقرب ما يكون للخيال الكارتوني! حجم حاملة الطائرات دي اصلا ممكن يشكل نسبة مئوية من مساحة غزة! للدرجة دي عجز الكيان العنصري المحتل -اللي بيروج لاسطورة اجمد جيش وافشخ عتاد- قصاد مجموعات مقاومة بدائية؟! طب الامريكان مش هايحاسبوا حكومتهم على اهدار الموارد ده؟!
ماكانش عندي اي فكرة عن أهمية مصانع الأسمدة المصرية،ولا كونها من مناطق التميز الاقتصادي القليلة عندنا، ولما عرفت ده عنها بعد اعلان بيع الدولة لجزء من اصولها -رغم ربحيتها العالية- لدول تانية، بقيت حاسس إني مغدور ومضحوك عليا.
غلطت غلطة عمري وقسطت لابتوب مع
#valu
من تلات سنين، اخر قسط كان الشهر ده، وانا اتاخرت، بعتولي رسالة تهديد انه انا كده هابقى ممتنع عن السداد، فقلتلهم انا مش هاتعامل معاكم تاني، بعتولي لايك 😃 ونعم خدمة العملا بصراحة
بغض النظر عن وضع ٦٧ كاستعارة في سياق الحديث عن ازمة اقتصادية، بس اللافت هو تحديد مدة المعاناة من ٦٧ ل ٨٢، يعني خمستاشر سنة.. هل نبدأ نعدهم من ٢٠١١، وللا من ٢٠١٣، وللا من ٢٠١٤… وللا نبدأ نعد من دلوقت وعفا الله عما سلف؟
الرئيس السيسي للمصريين: ياترى مستعدين زي ما استعديتوا قبل كده من 67 لـ 82 وتحملتوا التضحيات اللي قدمتها الدولة عشان تتجاوز أزمتها في الوقت ده؟
#صدى_البلد
في سبتمبر ٢٠٠٦ ومع بداية السنة التالتة من اصدار مجلة "سينما جودنيوز" قررنا كأسرة تحرير نعمل ملف لافضل الافلام في تاريخ السينما المصرية.. كان العدد رقم ٢٥، فقلنا تبقى قائمة الافضل مش ١٠٠ بس ونخليها ١٢٥.
الطريقة اللي اخترنا ورتبنا بيها الافلام مشروحة في مقدمة الملف، وكنا بنحاول
امبارح كان يوم مميز جدا بالنسبالي.. اكتر من ٣٠٠ شاب وشابة نزلوا من بيوتهم وقطعوا تذاكر عشان بس يسمعوا نقاش وتحليل عن افلام مصرية اتعملت قبل ماهم او اهاليهم يتولدوا!
محمود مهدي، اللي بدأ بمراجعات عن الافلام ف ڤيديوهات اليوتيوب من عشر سنين تقريبا، وشجع عشرات بعده انهم يعملوا زيه،
في ٢٠٠٥ كتبت ملف ف مجلة جودنيوز سينما بعنوان افضل ٥٠ ممثل وممثلة في تاريخ السينما المصرية، اخترتهم ورتبتهم بناءا على معايير معينة.
منى زكي جت ف المركز ٤٩ وكانت الوحيدة من ابناء وبنات جيلها -الشاب وقتها- اللي تواجدت في القائمة دي.. والنهاردة انا باتأكد تماما ان اختيارها كان صح
علاء مبارك بيقول على عمرو اديب انه بوشين، ويوسف الحسيني رايح استوديو برنامج -فيه على الاقل عشرات العاملين- عشان يعلن على الهوا انه مصاب بكوفيد بس جه لتأبين الإبراشي اللي توفى بسبب الكوفيد.... السيرك المصري
اول مرة اركّز انه حساب نتفلكس الرسمي الخاص بالمنطقة العربية بيكتب تغريداته باللهجة الخليجية.. اعتقد انه فيه كتير من تساؤلات التأثير الثقافي والقوة الناعمة ومستقبل الدراما في مصر والمنطقة وما الى ذلك، ممكن نستشف اجاباته من التفصيلة دي
بمناسبة النسخة العربية من perfect strangers والنسخة العربية من Suits.. حابب في يوم ما احكي عن تجاربي مع "الباب ف الباب" و "طلعت روحي" حيث فيه خلط كبير -بدون قصد أكيد- بين التعريب او التمصير، وبين الاقتباس.
من ١٥ سنة علاء مبارك كان شبح، مارد، كائن خرافي حواليه أساطير ليها علاقة بالبيزنس وسطوة ابوه، وقليلين قوي اللي يعرفوه..النهارده علاء مبارك بيعلق على ابراهيم عيسى بتويتة، حول فكرة اتطرحت ف برنامج تليفزيوني، وبياخد على دماغه بسبب تعليقه عادي زيه زي ملايين... ثورة يناير اللي عملت كده
المفارقة المضحكة المبكية، ان اللي سقفوا فرحا بتغيير وزير دول، كانوا الوحيدين القادرين على الاطاحة به من منصبه من زمان.. اختاروا طواعية انهم يتخلوا عن ادوات سلطتهم واكتفوا بدور المتابع اللي بيشجع اللعبة الحلوة بس مالوش فيها
باحب أدوار كتير لشريف منير في السينما، يعني في فيلم هيستريا مثلا عمل دور رهيب لشاب "مصري" من "شدة فقره" بيتنكر في صورة فتاة ليل عشان يسرق الباحثين عن المتعة.. اه والله
كانوا متخانقين قبلها،وفكروا ان رحلة البرنامج-ف ابوظبي سنة ٧٩-ممكن ترجع المية لمجاريها..بدون دخول ف تفاصيل،الطلاق حصل ف نفس السفرية،لكن لما تبصلهم وهم بيغنوا سوا تعرف انها قصة حب أسطورية عمرها ماتموت
ملحوظة:دي الأغنية اللي بليغ رجع بيها وردة من الجزاير سنة ٧٢ بعد اعتزالها ١٠ سنين.
فرحان جدا بشريف سلامة، مع "فاتن امل حربي" بيقدم تقريبا النقيض الكامل لشخصية الزوج اللي عملها من ١٠ سنين وقت "الباب ف الباب".. نضج وتقل وثقة، وقدرة على استحضار كاراكتر غريب عنه، واستخدام ادوات غير معتادة ف شغله.. اعتقد انه من العلامات المميزة للموسم الرمضاني الحالي.
تراجع الزيادة في عدد مشتركي نتفلكس خلال الربعين الأول والثاني لهذا العام، مفاجأة مفهومة بالنسبالي تماما.. نتفلكس بلاتفورم يعتمد على "الغرف" مش "التنقية" عكس منصات وشبكات أخرى زي آبل وHBO وحتى أمازون.. من بين كل ١٠ اعمال تنتجها نتفلكس ممكن تلاقي واحد ممكن تقول عليه كويس. +
عندي مشكلة كبيرة مع ڤيديو الفنان "محمد سلام" بخصوص امتناعه عن استكمال العمل في مسرحية تضامنا مع اهلنا في غزة، وعندي مشكلة مع الاحتفاء بيه.. الڤيديو مثير لتساؤلات وافكار كتير :
- هو اخد قراره حسب كلامه، قبل ساعات من السفر لعرض المسرحية وقبل اربع ايام فقط من ليلة الافتتاح، يعني
حلقة بلال فضل عن محمد ابوالغيط الله يرحمه، مهمة جدا.. مش بس لما فيها من رثاء ومواساة للمحبين، لكن الاهم بكتير، لما فيها من تعريف بقيمة ابوالغيط الفكرية، واستثنائية موهبته الصحفية والادبية، بعيدا عن الشفقة أو الحزن بسبب المرض الشرس والموت المبكر.
النشرة الجوية على dmc بتقول درجات الحرارة العظمى والصغرى بالترتيب ده:
- القاهرة
- العاصمة الادارية
-الاسكندرية
عقبال ماتكبر وتبقى قبل القاهرة ان شاء الله 😌
اي خراب حصل يوم ٢٨ يناير ٢٠١١، مش مسئول عنه الناس اللي خرجت تطلب حقها، المسئول الأول هو نظام قرر يمنع الناس من المطالبة بحقها.. ده الف باء منطق، وغير كده يبقى استغباء واستهبال
من سبع شهور بس، اسوأ كوابيس قادة الكيان المحتل ماكانتش تجيب واحد على عشرة من اللي بيحصل دلوقت. انهيار سريع لهيكل ضخم من الادعاءات والأكاذيب والافتراءات والاستهبالات والابتزازات، بيبنوا فيه من اكتر من ميت سنة وبيتداعى قدامهم ف ايام! ومافيش رجوع…
🤷🏽 it’s irreversible
من سنتين تقريبا عملت برنامج فرجة مع ابني الكبير عشان اعرفه على الافلام المصرية المهمة،طبعا مشكلة رداءة الصوت ف افلام التمانينات كانت عائق كبير،بس اتفرجنا على شوية افلام حلوة..عجبه الإرهاب والكباب، وعجبه الهروب،بس اللي ابهره بمعنى الكلمة واعتبره فيلم عظيم كان "الحب فوق هضبة الهرم"
ستنا هاجر اطمأنت للبقاء مع رضيعها في الصحراء لما سيدنا إبراهيم(النبي ابو الانبياء وخليل الرحمن)قالها ان ربنا هو اللي أمره، ودلوقت الشيخ خالد الجندي بيستشهد بالقصة دي عشان عاوز المواطن المصري يطمئن،ده على اساس ان القرارات الاقتصادية لحكومتنا هي وحي إلهي؟!!
منك لله يا شيخ..منك لله
وجه الشيخ خالد الجندي رسالة إلى كل من يقلق من المستقبل وتداعيات الأزمة الاقتصادية التى تسيطر على العالم كله قائلا: "الملف انتقل من قضية اقتصادية إلى قضية عقائدية أنت تثق فى الله واللا لا تثق اللى ظنه بالله خير لا يخاف"
المصدر DMC
#خالد_الجندي
بعد اعتراض عدد من النقابات المهنية، مهلة التسجيل بالفاتورة الاليكترونية تم مدها الى ٣٠ ابريل ٢٠٢٣ لتوضيح الكيفية والأثر بشكل كامل.. غالبا ده اول حراك مجتمعي ناجح نسبيا من سنين كتير.
ايه الحكمة انه الشروق ماتذكرش اسم الشركة؟! ايه "احد التطبيقات" دي؟! ليه مش "أوبر" بوضوح؟!! احنا قدام تاني حادث كبير لسائقي اوبر خلال شهور قليلة وده دليل اكيد على خلل كبير ف نظام الشركة وقدرتها على الادارة والمتابعة ويصل لدرجة التراخي اللي يخليهم شركاء ف جرائم. ليه مانقولش اسمهم؟!
🛑سالي عوض: شقيقة سيدة التجمع التي حاول سائق أحد تطبيقات النقل التعدي عليها،: أختي بطلة بـ100 راجل، فضلت مسكت الآلة الحادة بإيدها وقالت للسواق: (هتموتني ومش هتلمسني)، وفضلت تقاومه لحد ما قدرت تفتح باب العربية
لماذا أكتب؟
لأني أريد إصلاح حياتي الخاصة المباشرة، فأجدني عاجزًا عن إصلاحها دون العودة للشأن العام الذي يشمل المساهمة في إصلاح ولو ثغرة واحدة في جدار سياسات البلاد التي أعيش فيها، أو العالم أجمع، الذي لا سبيل حقيقيًا لتحسين حياتي الخاصة فيه إلا عبر التعاون لصالح حياة أرحم وأرحب
٢- يمكن د.احمد عاطف مؤلف مسلسل بالطو (ومن قبله الكتاب) مايكونش احسن سيناريست على مستوى تقنيات السرد وتركيب المواقف وايقاع المشاهد، وده طبيعي جدا بحكم قلة الخبرة،لكنه قدم ميزة مش موجودة في ٩٥٪ من مسلسلاتنا،وهي "المصداقية" او "الصدق الفني" +
الاجزخانة دي قيمتها الحضارية والثقافية والانسانية اكبر عشر مرات من اي مبنى جديد ف الصحرا مهما كان ارتفاعه او مساحته او كلفة انشاؤه.. وبالمناسبة، معرفة قيمتها والحفاظ عليها وعلى اللي زيها، ممكن يجيب عائد مادي اكبر من اللي هايجيبه المبنى الضخم الجديد
ليه يبقى فيه ابتزاز واستنزاف عاطفي ونفسي ومادي وجسدي لاي انسان باسم الدين؟! ايه ف القرآن او حتى الاحاديث النبوية الصحيحة اللي ممكن يتاخد منه رأي بهذا القدر من البرود والتعالي على معاناة والام الست دي؟! ايه اصلا علاقة الكفر والإيمان بكون الرجل قاسي وبخيل وعنيف وغبي، ماهو ممكن يبقى
ايه الهدف؟ ايه الفايدة انك تمسح تراث إنساني تلات تربع بلاد العالم بتتنشق على تنتوفة منه؟؟ ليه عاوزنا نبقى عاديين شبه اي حد ومالناش ملامح؟ ليه مستكتر علينا دليل الميزة الوحيدة ف حياتنا، اننا هنا من زمان!
شكرا لكل حد تابع المسلسل، فرحان بكل كلمة حلوة اتقالت عنه، وأسف لاي حد انزعج او مالقاش اللي كان نفسه يشوفه..
فخور بالتجربة، وسعيد بنتيجتها، واتمنى كل شركائي فيها يكونوا على نفس القدر من الفخر والسعادة.. صديقي السيناريست الجامد محمد اسماعيل أمين، استاذنا المخرج خالد مرعي، نجومنا
اكتشفت ان فيه دفاع شرس من المواطنين الشرفاء عن السلوك الأمني اللي خلى اليوتيوبر بتاع الاكل يقول ان عمره ماهايرجع مصر تاني.. هم شايفين انه لازم نخاف على بلدنا من الكاميرات اللي جاية من بره… وانا شايف انه مافي فايدة
هل تعلم ان فيلم "صعيدي في الجامعة الامريكية" عمل ايراد من العرض السينمائي في مصر فقط ٢٧ مليون جنيه سنة ١٩٩٨، وقت ما الدولار كان يساوي ٣,٤ جنيه؟
يعني بسعر الصرف النهارده يبقى حقق ٣٢٤ مليون جنيه!
ملحوظة: مصر وقتها كانت بتعاني من قلة عدد وتدهور حالة صالات العرض!
باحب قوي اللمحات الذكية اللي بيلقطها محترفي المشاهدة والتذوق السينمائي دي.. اللقطة اللي فوق من فيلم الحريف اخراج محمد خان، واللي تحت من اللعب مع الكبار اخراج شريف عرفة.. هل كان شريف عرفة بيوجه تحية مقصودة لاستاذه خان؟ وللا مجرد تأثر غير واعي؟ ف كل الاحوال اللقطتين احلى من بعض.
من اللقطات التاريخية في كاس العالم ٢٠٢٢:
رئيس جمهورية ليبريا، الافريقي الوحيد الحاصل على الكرة الذهبية "جورج ويا"، بيسقف في المدرجات لابنه اللاعب "تيموثي ويا" مشجعا له على حسن أداءه مع المنتخب… الامريكي
٧- اتمنى العقلية الادارية/ الانتاجية اللي ساهمت في اطلاق المسلسل ده عبر منصة (ووتش ات) تستمر في العمل بنفس الكفاءة.. اراهن (بدون اي داتا تدعم رهاني) ان اشتراكات المنصة زادت بسبب "بالطو".. وده كل اللي انتو محتاجينه عشان تنافسوا، انكو تعملوا مسلسلات صادقة، وطازة، ومتقنة.
ممكن اختلف مع ابراهيم عيسى ف بعض المواقف، وممكن اختلف معاه في التوقيت المناسب لبعض الاشتباكات، لكن الأكيد ان اللي بيعمله حاليا مهم.. لازم يبقى فيه النوع ده من الصدمات الصريحة القوية، لأن الصنفرة مش هتجيب نتيجة مع تخانة وتكلس الطبقة المصدية ف العقول.
في ٢٠١٠ الزم القضاء الاداري في مصر الحكومة بوضع حد ادنى للاجور يتم فرضه على كل قطاعات العمل العام والخاص،وتم تقديره وقتها ب ١٢٠٠ جنيه شهريا يستحقها ابسط عامل
بحساب سعر الذهب،الرقم نفسه الان يساوي ١٢ الف.
اليوم صدر قرار بالحد الادنى لاجور "حملة الدكتوراة": ٧ الاف جنيه
بس كده.
داليا البحيري كانت الوصيفة لملكة جمال مصر "دينا أمين"الله يرحمها..دينا من اجمل وانبل واذكى الشخصيات اللي قابلتهم ف حياتي العملية،الدينامو اللي دور عجلة عالم سمسم كمنتجة فنية شديدة الاخلاص والموهبة،وخطفها الموت ف ٢٠٠٧ وهي ٣٦ سنة ف يوم شغل عادي جدا وهي ف مكتبها. مبسوط بالصورة دي 💚
طب ماياخدوا كاميرا ويطبوا عليه ساعة الغدا لايف، ويخرسوا العالم كله!
تخيلوا منظر سوناك وللا المستشار الألماني، لو فيه بث مباشر لعلاء وهو بيمسح بقه من الاكل ونص الطبق قدامه خلصان وبكامل وزنه وعافيته ومبهوت لانه انكشف على الملأ ومخططاته انهارت. انا عاوز سبب واحد يمنع تنفيذ الفكرة دي
منذ قليل صدر تقرير الكشف الطبي علي النزيل علاء عبد الفتاح.. وحسب نتيجة التحاليل والفحوصات (ضغط الدم ونسبة الاكسجين ونسبة السكر في الدم ودرجة الحرارة في حدودها الطبيعية، كما ان رسم القلب في اطاره الطبيعي)
واختتم التقرير نصاً: (الي ان اضرابه عن الطعام والشراب امر مشكوك في صحته)
٣- احمد عاطف عارف هو بيكتب عن ايه، عاش التجربة دي وتفاعل مع اطرافها، وبالتالي اما نقلها لعمل فني قدر يملاها تفاصيل "تتصدق"، حتى لو كانت محمّلة بمبالغات كوميدية.. ف الحقيقة جزء مهم من قوة "بالطو" ان السيناريو حافظ على شعرة صدق المواقف، بحيث انها ماتقلبش فارص فنفقد المشاعر +
مش مختلف مع الفنان القدير انه الطبقة الوسطى تآكلت، بس فيما عدا ذلك، كلامه للاسف ملئ بالمغالطات:
- ضعف فن السيناريو، مرهون اولا وثانيا وثالثا بتراجع المساحة الابداعية المتاحة، وتعدد الجهات الرقابية ووصاية الجهات الرسمية بمختلف مسمياتها وتوجهاتها على الفنون الدرامية. ودي حاجة
عن المغامرين الخمسة، والدياثة
......
نقاش مسلي النهارده، بدأ بتويتة عبرت فيها عن ضيقي من عدم قدرة بناتنا واخواتنا انهم يلبسوا براحتهم في شوارعنا، كذا حد من الافاضل اللي ردوا عليا اتهموني بوصف "ديوث". والحقيقة ده فكرني بقصة غريبة شوية مع الكلمة دي، حصلتلي وانا عندي عشر سنين.. ١
٦- مسألة "الطزاجة" كانت حاسمة في نجاح "بالطو".. اغلب عناصره فريش، وعلى راسهم بطل العمل "عصام عمر".. احنا تقريبا بقالنا اربع خمس سنين ماطلعناش نجم جديد وممثل شاطر في النصف الثاني من العشرينيات غير احمد مالك، عشان كده الناس كانت عطشانة لوصول وجه مختلف (ومتميز) لمنطقة البطولة +
يا فندم الاستاذ حافظ ابوسعدة الله يرحمه وقت محنته، كانت دايرة اللي يعرفوه لا تتجاوز زملاؤه وموكليه والصحفيين المهتمين بالشأن الحقوقي، يعني بالكتير بضعة الاف من المصريين.. دعم شعبي ايه بس الله لا يسيئك!
عارف ليه يا حسام بهجت حملة الاقراج عن حافظ نجحت تخرجة بعد ٦ ايام ؟!!
لان الحملة الناجحة ليها عنصرين اساسين ( دعم شعبى محلى + تعاطف دولى )
ومن الغباء تخيل ان التعاطف الدولى فقط ينجح اى حملة اذا لم تكن الناس شعبيا معاك
ما تخسرش الناس وتتعالى على اللي بيساعد فى وقت محتاجين الدعم
١٤- الحلم والكابوس ممكن يبقوا روايتين لنفس القصة حسب هاتخلص على ايه.. طبعا الفيلم اللي بدات بيه قصة اليوم ده عمره ما اتعمل ولا هايتعمل.. ورغم ان الاوضاع اصبحت أسوأ بكتير من وقتها، فمروان ابني عارف اني حاولت على الاقل اعمل اللي عليا.. السؤال: يا ترى القصة خلصت فعلا؟
مهم جدا الثريد ده، مش بس لتصحيح غلطات أديب الاكبر، ولكن لما فيه من ارقام واحصائيات دقيقة عن وضع التعليم والصحة والغذاء في مصر، وعشان نعرف انه رفع كفاءة الأساسيات دي مش محتاج انهار من الذهب وشلالات من الدولارات ولا حاجة.. محتاج بس انه الانفاق يتوجه للاولويات
💬 نشر الكاتب الصحفي #عماد_الدين_أديب، مقالًا جديدًا في موقع أساس ميديا، تحت عنوان: "مصر: من يعوّض الفاتورة المؤلمة للحرب الروسيّة – الأوكرانيّة"، ولكنه وقع في عدد من الأخطاء الرقمية، الخاصة بالوضع الاقتصادي والصحي والتعليمي في مصر.
@Adeeb_Emad
@asasmedialb
#صحيح_مصر