كمان ٤٨ ساعة هكون بمتحن اخر امتحان ليا في حياتي. ديه اخر مادة في الدكتوراه و بعد ٢٠ سنة تعليم، اخيرا وصلت لآخر المطاف.
اللى يشوف التويتة ديه يدعيلي ربنا يكرمني و يوفقني في الامتحان ده ان شاء الله، و يجعل الخير كله في الخاتمة.
شكرًا!
التايملاين كله فرحة من اهل فلسطين و سعادة غامرة. الحمد لله على نعمة فلسطين و اهل فلسطين.
عيدكم مبارك يا اهل فلسطين و قريبا هنفرح فرحة الانتصار على الاحتلال.
انهاردة اديت اول محاضرة ليا كدكتور و الحقيقة يعني حبيت اشارك معاكم فرحتي بالتدريس و اطلب منكم تدعولي بالتوفيق التيرم ده. :)
(و لسا طبعا هيبقى في حلقات ان شاء الله في ايجيكولوجي و بودكاست علمي جدا)
خلال مغامراتي في الماجيستير، اتعلمت حاجات كتير جدا و فرحتي بالشهادة لا توصف...بس كم الحب و الدعم ال��ى شوفته هنا في اليومين اللى فاتوا فكرني قد ايه ربنا كارمني بناس بتفرح لفرحي.
انتوا جزء كبير في رحلة نوَّر الظلمة و انا فعلا ممتن لكل واحد فيكم.
الحمد لله، بقيت Master of Science!
اطفال بتموت في فلسطين و في ناس تقولك "لازم تبص على الموضوع بحيادية." مفيش حيادية تبرر قتل اطفال. مفيش حيادية تبرر انتهاك اعراض الفلسطينيين و مقدساتهم.
الموضوعية اللى البعض بيتكلموا عنها حجة للهروب من الحقيقة البشعة اللى اهلنا في فلسطين بيمروا بيها دلوقتي.
#فلسطين
بمناسبة الهالوين و الخوف و كدا، في دراسة سألوا الناس عن اكبر مخاوفهم...و بالرغم من ان في ناس قالت الموت مثلا، اكبر خوف عند الناس إحصائيا كان فقدان حد عزيز.
بمعنى اننا بنخاف نخسر الناس اللى بنحبها اكتر من اننا نفسنا نموت.
و ديه فيها لفتة إنسانية جميلة جدا.
تخيلوا معايا كدا خوف بنت راجعة من الجامعة بليل و الشارع ظلمة و في شوية شباب قدام بيتها...
تخيلوا خوف بنت بتركب وسائل مواصلات و هي محشورة بين ٥ رجالة و كلهم بيبصوا عليها...
ازاي حد يبرر الخوف ده؟ ازاي يبرر ان بنات الناس تعيش في الرعب المستمر ده؟ و يحاربوا عشان الخوف ده يبقى؟
باقي من لحظة كتابة التويتة ديه ٢٢ ساعة و نص بالضبط على امتحان الدكتوراه بتاعي (اللى مدته ٣ ساعات). اسف اني ازعجتكم بالموضوع ده كتير، بس مش حابب ان حاجة كبيرة زي ديه تعدي من غير ما الناس الجميلة اللى على تويتر تكون جزء منه.
و جزء الدعاء ده جزء لو تعلمون عظيم.
كل دعوة بتفرق. :)
انهاردة في صلاة الجمعة الخطيب قال حاجة اسعدتني جدا: لو انت من الناس اللى بتلجأ لربنا في وقت الحاجة او الضرورة، متتكسفش من كدا. اه المفروض تكون قريب لربك طول الوقت، بس فكرة انك بتروح لربنا لما بتحتاج مساعدة معناها انك مؤمن فعلاً انه الوحيد اللى يقدر يحل مشكلتك.
لفتة جميلة بصراحة.
كمان ٣ ايام بالضبط عندي اكبر امتحان في حياتي و في مهنتي لان اكون دكتور جامعي ان شاء الله.
الضغط اللى الواحد حاسس بيه مع الارهاق النفسي و الجسدي اللى وصلتله مش لطيف خالص، فلو تسمحولي استأذنكم تدعولي بالتوفيق، هبقى ممتن جدا.
شكرا. :)
هل الدكاترة/المدرسين بيتلذذوا كدا لما يحطوا امتحان الطلبة تطلع منه مش طايقة نفسها؟
فين المنطق في انك تخلي شاب/شابة يندموا على الكلية/التخصص/التعليم من اصله؟
ليه نِفسك كدكتور تثبت ان المذاكرة لا معنى لها؟ ايه المغزى؟ مين المستفاد؟
التعليم المفروض يشجع الناس مش ينفرهم منه.
السوشيال ميديا غيرت مفاهيم كتير اوي. الجمال بيتقاس قصاد ممثلات بيدّفع فيهم آلاف عشان يتعملهم شكل معين لمجلة. النجاح بيتقاس بعدد الناس اللى بتابعك مثلا. الغنى بيتقاس بالمكان اللى بتعيش فيه. حتى مفهوم "الصح" دلوقتي بقى قابل للتغيير بناء على ما يراه الناس مقبول...و ديه حاجة محزنة.
شوف لو حتى الحاجة الوحيدة اللى تقدر تعملها للقضية الفلسطينية هي انك تنشرها و توعي الناس بيها، فده برضو افضل من انك تتقبل الوضع و متحاولش تغيره بحجة ان موقفك مش هيفيد.
موقفنا بيمنع ان القضية تموت و ده في حد ذاته مهم.
خطيب صلاة الجمعة قال حاجة جميلة انهاردة: اَي مشكلة انت بتمر بيها اعرف ان ربنا سبحانه و تعالى هو اللى عايزك تقع في المشكلة ديه لانه عارف ان في نهاية الامر في خير ليك.
مش مهم تعرف ايه الخير، المهم تفتكر ان ربنا سبحانه دايما واخد باله منك.
المصائب و المتاعب هتمر. توكل و اصبر.
بعض الحقائق اللى غالبا محتاج تسمعها:
- عادي يكون جسمك مش احلى حاجة
- عادي تكون بتoverthink حاجات حصلتلك او احتمال تحصلك
- عادي تحس انك مش محقق اللى عايزه في السن ده
- عادي انك فجاة تحس بقلق بدون سبب
السوشيال ميديا ممكن تحسسك ان الحاجات ديه مش عادية...بس الحاجات ديه عادية جدا.
اسوأ حاجة في الارق هو انك من كتر التفكير بتتعب. بتحس بهبوط من كتر ما مخك عمال يقلق من حاجة على الاغلب مفيش في ايدك حاجة تعملها. بتوصل لحالة من الزهق مش من اللى مضايقك، بس من مخك. من نفسك انك سامح لمخك يعمل فيك كدا.
و احساس العجز امام قدرة مخك على التفكير الهوسي صعب جدا الحقيقة.
المفروض و انت بتفتح انستجرام مثلاً يبقى فيه تنويه بيقول حاجة زي: "مثالية انستجرام التي تراها ما هي الا تزييف لحقيقة العالم، فلا تقارن حياتك او تسعى لهذا التزييف."
والدي قبل امتحان امبارح بعشر دقائق بعتلي قالي انه عايز يقولي حاجة: قالي اني عملت اللى عليا و انه راضي عني.
لما اهلك بيقفوا جنبك بتحس بان الخير كله موجود في حياتك. حتى لو انت عارف ان حياتك فيها مشاكل، رضاهم بيغني عن كتير من ارق و هم الدنيا.
الحمد لله على نعمة اهلي.
انت متخيل انك دلوقتي حالا ممكن ترفع ايدك و تطلب من ربنا يغفرلك كل ذنوبك و في لمح البصر كل حاجة تتشال؟ كل غلط يتغفر؟
نعمة التوبة ديه حاجة عظيمة والله لو نعلم بس...
فكرة ان شخص بياخد من وقته و حياته عشان يرد عليك on time لما تبعتله ديه حاجة جميلة جدا. بتحسس الشخص اللى باعت ان انت قيم عنده لدرجة ان الnotification بتاع اسمك كافي اني يترك اللى بيعمله و يرد.
تقدير الشخص و احترامه مش لازم تبقى حاجة معقدة.
لو انت بتقرأ الكلام ده، فحابب يعني افكرك ان هموم الدنيا لا تساوي شيء. عارف انك غالبا سمعت الكلام ده و لكن الself care في هذه الفترة المليئة بالصعوبات مش حاجة اختيارية بس حاجة اجبارية. للتذكرة يعني مش انانية خالص انك تاخد بالك من صحتك الجسدية و النفسية. :)
سايكولوجية لوم الضحية ديه لازم تتدفن. علماء النفس بيشرحوا الموضوع بانه محاولة من العقل لتفادي التفكير في احتمالية ان ده يحصلك.
بس الكارثة ان بالسكوت و بانك بتلوم الضحية، انت بتشجع الفعل الفاحش. بتشجع الغلط و بتساهم في نشره لحد اما لا قدر الله هتبقى انت الضحية.
اقفوا للحق.
انهاردة مشرف الدكتوراه بتاعي كان بيتكلم مع طلبة جديدة معانا في المكتب و في نص كلامه شاور عليا و قال: "اللى انت شايفينه ده مستقبل التعليم..."
و كمية السعادة و الفخر اللى كنت فيها لا توصف. الحمد لله.
انهاردة في صلاة الجمعة، الخطيب كان بيتكلم عن الحمد و قال حاجة جميلة جدا. قال "الحمد لله ان ربنا كل يوم بيدينا فرصة نبقى احسن".
و في وسط نعم ربنا الكتير، ديه نعمة المفروض مننسهاش ابدا والله. الحمد لله.
بزعل اوي لما بشوف ناس فعلا جميلة مش حاسين بقيمتهم بسبب انهم "لا يقارنوا" بالمشاهير و الinfluencers اللى بوظوا مفاهيم الجمال عندنا. جسمك لازم يبقى بالشكل ده و شعرك بالشكل ده، الخ و لو انت مش كدا يبقى انت اقل. حالة عدم الرضا اللى الناس بقت فيها بالنسبة لشكلهم حاجة حزينة للغاية. :(
امبارح طفل عنده ٩ سنين مات محروق نتيجة لتنمر زملائه. لان والده بيجمع زبالة، زملائه رموه في صندوق زبالة و ولعوا فيه. اخر كلماته كانت استنجاد بامه.
تربية الاطفال على احترام الاخرين مش تكرم من الاهل، بس واجب. الاولاد مسؤولية و الواحد خايف يسأل نفسه لو الجيل بتاعنا قد المسؤولية ديه.
و انت بتقرا الكلام ده، اخواتك في القدس بيضّرب عليهم و بيحاربوا عشان يحافظوا على المسجد الاقصى و على بيوتهم. كن جزء من القضية و ساهم في نشر الوعي.
الموضوع موضوع انساني بحت.
بحس ان السوشيال ميديا ليها دور كبير في احساسنا بعدم الرضا بحياتنا. لما بتتفرج على حياة الناس (المثالية) اللى بيعرضوها هنا او على انستجرام، احتمال تحس ان حياتك اصعب من غيرك.
بس بعيداً عن مشكلة الselective content اللى بنشوفه، افتكر ان ربك عادل. و ان نعمه عليك لا حصر لها. :)
الموضوع بيبقى صعب ساعات، بس يا ريت كل واحد يبقى عنده شخص في حياته يقدر يحكيله كل حاجة بصراحة. لما يسألك "انت كويس؟" تقدر ترد ب"لأ" عادي جدا و تشرحله الأسباب.
ككائنات بتحرص على نفسها، نادرا ما هتلاقي الشخص ده...بس لو لقيته، تمسك بيه. الناس إللى بتشجعك تتكلم عن مشاكلك هدية من ربنا.
الخطيب انهاردة قال حاجة جميلة جداً في صلاة الجمعة: لو انت كانسان قيمتك متوقفة على غيرك، عمرك ما هتكون سعيد. بمعنى انك لو مستني الناس تعلق على شكلك و تحب صورك او كلامك او اي حاجة من تصرفاتك، هتلاقي نفسك دايماً تعيس.
متخليش اي حد يتحكم في احساسك بقيمة نفسك.
في ايام كدا تحس ان الدنيا ضيقة جدا عليك. مش بالضرورة في حاجة مضايقاك، بس حالتك النفسية مش مرتاحة لسبب انت مش عارفه.
مهما تعمل، كل حاجة عبارة عن حاجة تلهيك شوية عن حالتك، و اول ما تخلص الحاجة ديه، ترجع تفكر في حالتك تاني.
بس كله بيعدي. مهم نفتكر ده.
مجرد بس الاخبار اللى بتيجي عن فلسطين بترهق الواحد نفسيا و جسديا فالواحد مش قادر يتخيل اهل فلسطين بيمروا بايه دلوقتي...
اللهم حرر فلسطين. اللهم فرحنا بالعيد بتحرير ارض فلسطين. يا رب هونها عليهم.
#GazaUnderAttack
#Gaza
انهاردة في صلاة الجمعة الخطيب قال حاجة عظيمة جدا: "قبل ما تخلي حاجة تضايقك او تسببلك ضغط، اسأل نفسك ايه مدى قدرتك في انك تغير الحاجة ديه...و لو لقيت انها برا ايديك، توكل، لان القلق مش هيفيدك اطلاقا."
و انا شايف الناس بتنفعل لفلسطين و بتشارك بقوة في الموضوع، حابب اذكر نفسي و اياكم ان كلنا علينا مسؤولية نزرع مشاعر الوفاء و الحب لفلسطين في اولادنا.
القضية تورث و لن تموت.
#فلسطين_تنتفض #فلسطين_قضيتي
أحب اشجع كل طلبة الجامعة اللى بيقرأوا التويتة ديه بأنهم لو مشتركين في نشاطات غير مذاكرتهم يعني يستمروا فيها. الشهادة مهمة اه، بس مش كل حاجة.
كم المهارات اللى ممكن تكتسبها لا يوصف. حتى لو انت بتحب اللى انت بتدرسه، أفتكر ان الدنيا فيها حاجات اكتر بكتير من مجرد مجال دراستك.
في حاجة في العلاقات البشرية مش واخدة حقها و هي الطمأنينة: فكرة انك عارف كويس ان مهما حصل، شخص معين هيسندك و يكون موجود. متخانقين، متصالحين، متعرفوش بعض كويس، بس عارف ان الشخص ده انت مطمأن ليه.
و الصفة ديه لازم تنتشر اكتر. عرفوا الناس من خلال أفعالكم، مش أقوالكم، انكم اهل للثقة.
الواحد نفسه لما ربنا يتوفاه يكون راضي عن اللى عمله في الدنيا ديه...يعني نفسي اثري يكون عبارة عن نور. الناس لما تفتكرني، تفتكر الخير اللى ممكن اكون عملته و تدعيلي حتى لو كنت مقصر لاني عارف اني مقصر.
في ناس جريئة اوي بصراحة: بشوف ناس بتكتب حاجات زي الحمد لله ان رمضان بيخلص و حقيقي حزين. حزين ان الجرأة على الدين وصلت لمرحلة ان الناس تتكلم بالشكل ده. سبحان الله في الوقت اللى بعض الناس بتتمنى انها تقرّب شوية لربنا، في ناس تحسهم العكس تماماً.
اياماً معدودات.
خلال اليومين اللى فاتوا، في تويتة ليا ضايقت بعض الناس لان لغتي فيها مكانتش صح. اسف لو كان فيها اي تعالي او تكبر، ده مكانش القصد اطلاقاً. ربنا يجعلنا دائماً مصدر نور لنفسنا و لغيرنا.
ربنا يسعدكم، عيد مبارك و كل سنة و انتوا طيبين. :)
بحب اوي فكرة ان ربنا وعد انه دائماً قريب....و من غير شرط. مش مهم تكون كويس او وحش، المهم ان انت عندك حاجة. ده كافي جداً ان ربنا سبحانه و تعالى يقف جنبك و يساندك. كم رحمة لا مثيل لها...
و اعرف ان لو ربنا سبحانه و تعالى ساندك، مفيش حاجة في الدنيا ديه هتقدر تقف قصادك.
المفروض مستوى الامتحانات تبقى بمستوى شرح الدكتور. لو الدكتور مش كويس في الشرح، ليه يبقى في توقع ان الطالب يبقى شاطر في الاجابة على سؤال الدكتور معرفش يشرح اجابته؟
منطقياً كدا، لو الدكتور نفسه مش فاهم الحاجة كويس عشان يشرحها كويس، ليه الطالب متوقع يبقى كويس فيها؟
في ناس ذكية جداً في حياتها الاجتماعية: عندهم قدرة غريبة يوصلوا احساسهم للشخص اللى قدامهم بشكل غير مباشر. ممكن تكون مشاعر ايجابية او سلبية او ممكن يبقى مدح او عتاب، بس بحس ان الناس ديه عبقرية. انك تقدر تخلي شخص يفكر في اللى بتفكر فيه من غير ما تقولها حاجة في منتهى الذكاء والله.
في اقل من ٢٤ ساعة هكون بمتحن امتحان في مادة للدكتوراه مش قادر اوصفلكم قد ايه ثقيلة.
اللى يقدر ياخد دقيقة من وقته كدا و يدعيلي دعوة حلوة من قلبه ان ربنا يكرمني، يا ريت لا يبخل.
انا عارف اني قرفتكم بالموضوع و ارجو انكم تعذروني، بس عشمي في الناس الجميلة اللى هنا كبير.
شكراً جدا.
كارثة محطة القطر انهاردة حاجة مؤسفة و ربنا يصبر أهالي الناس اللى ماتت و اتصابت....لكن المرعب في الموضوع هو رخص حياة المصري. قد ايه حياة انسان عنده أسرة و بيخرج و بياكل و بيتعامل مع الآخرين ملهاش اَي قيمة.
فقدنا انهاردة ارواح ثمينة لكننا تذكرنا رخص حياة المصري.
في خطبة الجمعة انهاردة الخطيب اتكلم على الاية اللى بتقول {أَلَا إِنَّ نَصْرَ اللَّهِ قَرِيبٌ} في سورة البقرة و قال ان نصر الله هنا ممكن يكون معناه نصر على هفوات نفسك. لو بتعمل حاجة غلط او في حاجة مش ماشية صح في حياتك، اتأكد ان نصر ربنا قريب منك.
و ديه فيها طمأنينة غير طبيعية.
حد يقنعني ان في حاجة اهم في حياتنا دلوقتي من اننا نقف مع اخواتنا اللى بيصحوا على قصف بالشكل ده.
اقنعني ازاي "الحيادية" بتاعتك بتبرر ده؟ او قولي ليه انت معندكش معلومات كافية عشان تعترض على المنظر ده؟ محتاج معلومات ايه بعد الفيديو ده؟
#GazaUnderAttack
#فلسطين
لو لقيت حد في حياتك بيبذل مجهود في انه يسأل عليك و يطمأن، حاول متحسسش الشخص ده ان مجهوده مش متقدر. عيب انك تقول انه مش "الشخص الصح" اللى عايزه يسأل عليك. في ناس فعلاً الصداقة بالنسبالها مسؤولية، و تقدير الناس ديه اقل ما يمكن فعله تجاه شخص كل اللى بيبسطه هو انه يعرف انك كويس.
ظروف الكورونا اظهرت جانب مظلم جدا من الناس. طول عمره موجود، بس حقيقي بقى بارز جدا. كم كراهية و تنمر ظهرت مش طبيعية. الحجر المنزلي زوّد بشاعة الجانب المظلم ده و اللى بدوره بيتعب الناس اكتر ما هي تعبانة.
شوية رفق مع بعض مع تطبيق "فلنقل خيرا او لنصمت" مهم جدا و خصوصا في الاوقات ديه.
الoverthinking حاجة غريبة جدا: فكرة ان مخك بيكون عامل زي سجن يقعد كدا فيه مع نفسه يفكر مرارا وتكرارا في حاجات معينة غالبا مش هتفيد و غالبا مش هتفتكرها كمان سنة...
و بالرغم من كره الواحد للoverthinking الا ان صعب "تقنع" مخك يبطل يفكر مثلا.
أزمة والله.
الخطيب انهاردة في صلاة الجمعة قال حاجة مهمة جدا: انت مش بس المفروض تشكر ربنا على الرزق، انت المفروض تدرك مسؤولية الرزق ده و تعطي منه.
و الرزق مش معناه فلوس بس، معناه صحة تستخدمها لخدمة اهلك، ذكاء تستخدمه عشان تبقى انسان افضل، الخ.
النعمة مسؤولية.
كان نفسي والله الشهر الكريم يدخل عليا و حالي افضل من حالي، بس الواحد والله تعبان و مجهد صحيا و نفسيا جدا.
يا رب الشهر ده ينقينا و يصفي بالنا و يريحنا من شقاء الدنيا المستمر.
عن الرسول -ص- قال:
"يأتي على الناس سنوات خداعات يصدق فيها الكاذب و يكذب فيها الصادق و يؤتمن فيها الخائن و يخون فيها الأمين و ينطق فيها الرويبضة. قيل: وما الرويبضة؟ قال: الرجل التافه يتكلم في أمر العامة."
خلوا بالكم من الرويبضة يا جماعة.
لما اهل الشخص يكونوا كويسين، بيطلعوا حد عنده استعداد ينجح في حياته عشان يشوفهم مبسوطين. التربية الكويسة بتطلع شخص مش بس بيسعى لتحقيق غاياته، بس بيحاول دايماً ان الابتسامة و الرضا لا تفارق اهله.
شكراً لاهلي انهم بيشجعوني اتعب عشان انجح في حياتي و اسعدهم. الحمد لله عليهم.
فكرة انك تاخد قفزة ثقة و تختار شخص عشان تتكلم معاه عن مشاكلك فعلا بتبقى حاجة صعبة. و المشكلة ان اول ما الشخص الاخر مش بيبدي استعداد تام للانصات بتحس ان الشخص ده غير كفء انه يسمع مشاكلك، دلوقتي او في المستقبل.
يا ريت تهتموا بالناس اللى بترتاح بالحكي معاكم. ديه أمانة والله.
افتكروا دايما ان ربنا ممكن يكون بيحط حد في طريقك مش عشان يساعدك، بس عشان انت تساعده. و الله في عون العبد ما كان العبد في عون أخيه.
لا تبخلوا على الناس بالمساعدة. :)