ياما شلتك على كتفي يا عمرو.. كنت فاكر اننا كبرنا ومش هشيلك تاني ، بس الدنيا كانت مخبية لي إني هشيلك مرة كمان على كتفي.. آخر مرة..
في أمان الله يا صاحبي
بعيداً عن كارثة منتخب الأرجنتين ..
ده أعظم لعيب في التاريخ .. لابس Fan ID زيه زي بقية المشجعين .. ماسك تي شيرت منتخب بلده وعليه إسم النجم بتاعه .. وواقف يشجع مع جمهور فرقته .. ولما خسروا قعد يعيط زيهم ..
مش قاعد بيكركع ومنتخب بلده خسران ويقول "تاني واحد بعدي وضربة جزاء برضه" ..
لو معلق تاني غير حفيظ دراچي كان قعد يلطم على الجول الاوفسايد ده 5 سنين قدام.. بس عشان هو حفيظ دراچي بكل حيادية قال تسلل صحيح.. شكراً
@derradjihafid
لأنك بتعلمنا يعني إيه تعليق محترم
مصنف 28 وبتوصل دور الـ 8.. بتكسب 3 لعيبة اعلى منك في التصنيف.. قصاد واحد من أعظم لعيبة العالم ورغم إن فرصتك شبه مستحيلة بتموت نفسك لحد آخر نقطة ..
ده اللي إسمه بطل ❤️ شكراً عمر عصر 🇪🇬
معلومة صغيرة.. نسبة تصويت الجمهور في جائزة أفضل لاعب في أفريقيا لا تتعدى ال7% .يعني ما يساوي تصويت 2 من مدربي وكباتن المنتخبات اللي لهم حق التصويت. مش تصويت الجمهور هو اللي هيحسم الجائزة خالص
عشان الناس تهدى بس على الموقع اللي وقع من الصبح ده :)
تسلم يا راجل يا مجدع .. تسلم على 8 سنين كنت فيهم مثال الجدعنة والأصل .. تسلم على كل دقيقة لبست فيها التي شيرت ده ودافعت عنه برجولة وقلب .. تسلم على طيبة قلبك ونضافتك في مواقف شفتها بعيني بدل المرة 100 ❤️
تسلم يا محمد يا نجيب ❤️
صلاح مرضيش ياخد جايزة رجل المباراة ، وسابها لچيمس ميلنر تكريماً ليه لأن النهارده الماتش رقم 500 ليه في الPremier League ..
حركة حلوة ، ومذيع Sky وصفها بعدها بجملة
"That's pure class" ..
ربنا بيكافئ صالح على التزامه "بجد" طول الفترة اللي فاتت.. رمضان ماشاء الله.. مكسب النهارده ياسر إبراهيم وربيعه ورجوع الأسد فتحي ..
معلول بقا مش لاقي كلام تاني خلاص :)
الحمد لله كثيرا
اللـهـم بفضل هذا اليوم العظيم ، اجعل قبر عبدك عمرو مصطفى مراد فهمي روضة من رياض الجنة ، ولا تجعله حفرة من حفر النار .. اللـهـم أفسح له في قبره مد بصره وافرش قبره من فراش الجنة ..
اللي كان في الاستاد النهارده حيفهم قصدي كويس..
مهم قوي ان يبقى عندك شخصية كابتن فرقه في أرض الملعب .. حاجة افتقدناها بقالنا فترة ، بس اتحققت النهارده في وجود
@SEkramyofficial
💪
سباستيان ديسابر مدرب أوغندا .. لو ميعاده 10 بيوصل 9:30 ويستنى (النهارده تالت مرة يعملها مش صدفة يعني) .. بيجاوب على كل الناس بكل احترام أياً كان السؤال .. مبتسم بصورة مستمرة ..
شخصية محترمة ولطيفة جداً بصراحة
زي النهارده من 5 سنين ، 20 فبراير 2014 .. الأهلي كسب الصفاقسي 3-2 عشان يفوز بالسوبر الإفريقي للمرة السادسة.. وبعد الماتش
@WaelGomaa
أعلن اعتزاله بنهاية الموسم
كرة اليد هي الرياضة الجماعية المصرية الوحيدة اللي وصل مستوى طموحنا فيها لإننا نزعل لما نخسر قبل نهائي بطولة العالم.. كرة اليد هي الرياضة الجماعية المصرية الوحيدة اللي بتنافس أعلى المستويات عالمياً من أكثر من 25 سنة ومستمرة في ده..
شكراً يا رجالة ، شرفتونا 💪🇪🇬
أتمنى ان المسئولين يراجعوا قرار حضور 15 مشجع لكل فريق في مباراة القمة عشان ده بجد لا يليق .. أتمنى يخلوهم 18 مشجع عشان كل واحد في القايمة ياخد معاه مرافق يسليه في السكة وهما راجعين ..
#عالم_سمسم
نتائج بيراميدز خارج ملعبه في كأس الكونفيدرالية:
ايتوال الكونغولي 1-0
بلوزداد الجزائري 1-0
يانج أفريكانز التنزاني 2-1
رينجرز النيجيري 3-1
المصري 2-1
نواذيبو الموريتاني 1-0
زاناكو الزامبي 3-0
لعب 7 فاز 7 .. رقم محترم معتقدش انه حصل قبل كده مع فريق بره أرضه
هو ايه الفكرة ان ناس بتتفاخر قوي انها مصليتش العيد! وناس بتتريق على اللي صاموا امبارح وناس تانية بتتريق على الأضحية! هما التلاته سنن مؤكدة مش فرض وحضرتك مش ملزم تعملهم ماشي، بس كونك تتريق على اللي أطاعوا الله ورسوله دي الشطارة والحرية من وجهة نظرك يعني!! ربنا يهدينا ويهدي الجميع
الطاقم الطبي عظيم طبعاً بس الرجالة دول لا يقلوا عظمة..
الطاقم الطبي عمل شغله اللي اتدرب عليه كتير، بس دول محدش دربهم على موقف زي ده. ومع ذلك متهزوش، وقفوا رجالة، حموا خصوصية زميلهم وسابوا اللي بيفهم يشتغل من غير ارتباك ولا شوشرة.
اللي عمله لعيبة الدنمارك عظمة بمعنى الكلمة❤️
كان المفروض ابقى معاكم يومها .. كان ممكن بسهولة جداً تبقى صورتي في وسطكم .. مسافرتش في آخر لحظة ، بس هيفضل 1 فبراير 2012 أسوأ يوم عدى عليا في حياتي ..
الله يرحمكم ويلحقنا بكم على خير
#لن_ننسى
يوسف پولسن ، لاعب الدنمارك اللي جاب الجول في پيرو من شوية .. كاتب اسمه على التي شيرت Yurary .. ده إسم والده التنزاني (يوراري شيهو) اللي مات بالسرطان ويوسف عنده 6 سنين .. پولسن" ده إسم عيلة والدته الدنماركية ، بس هو قرر يخلد إسم والده في كاس العالم ..
Football is Life ..
مش هتكلم كتير عن
@MoamenZakaria
عشان هو عارف كويس قوي غلاوته عندي شكلها إيه.. مش هقول لك غير ربنا هيكرمك ان شاء الله ، عشان انت إبن بلد وجدع وأصيل ونضيف.. وربنا هيعوضك كل خير إن شاء الله لأنك متستاهلش غير الخير ❤️
في كأس الأمم 1998 ، بوركينا فاسو كانت كسبانة الكونغو الديمقراطية 4-1 في مباراة المركز الثالث لحد آخر 10 دقائق ، والماتش خلص 4-4 والكونغو الديمقراطية كسبت بركلات الترجيح.. وتاني يوم مصر كسبت البطولة..
تفائلوا بالخير تجدوه
وفاق سطيف عمل موقف عظيم جداً.. فريق فورتشون الجامبي عنده أزمة مادية عنيفة وكان هينسحب من مباراة الإياب في الجزائر. سطيف عرض عليهم يرجعوا معاهم على الطيارة الخاصة اللي سافروا بيها وبكده يوفروا جزء كبير من نفقات السفر.
سطيف خسر ماتش الذهاب 3-0 ومع ذلك خد موقف عظيم يحسب له ❤️
محمد شوقي من اللعيبة اللي مخدتش حقها من الصيت في وسط الجيل الذهبي بصراحة.. شوقي كان وَحش في وسط الملعب وكان دوره مهم جداً ، وهو اللي بيدي حرية لمثلث "بركات - تريكة - متعب أو فلافيو"..
بدون مناسبة بس كنت بفتكر ماتش نهائي الكاس 4-3 ، شوقي لعب فيه فترة طويلة دفندر وحيد وكان أسطوري
حسين صوالح مراقب مباراة الإسماعيلي ومازيمبي ومدير اتحاد كينيا.. كان معايا في برج العرب وصلينا الجمعة سوا قبل الماتش وسبته على اتفاق اننا نتقابل تاني قريب.. توفى النهارده في الطيارة الاثيوبية اللي وقعت في طريقها لكينيا..
الدنيا مش مستاهلة والله .. اللهم أحسن خاتمتنا جميعاً..
عندي ثقة كبيرة في ربنا سبحانه وتعالى ان لعيب زي مؤمن زكريا يقدر يعمل فرق كبير جداً الموسم الجاي.. الأهلي محتاج ذكاء وخبرة حد زي مؤمن في الوقت ده ، ومؤمن محتاج يعوض الموسم اللي ضاع منه غصب عنه.. ان شاء الله خير