:
لو جاك من بعض المهابيل زلات
أرفع مقامك لا تدقق ورآهم
وتجاهل الجاهل تعيش بسلامات
خذها نصيحه وابتعد عن غثآهم
ولا تشغل افكارك تراها سهالات
بعض البشر لا تنزل لمستوآهم
النجم العالي .
:
بعض الرفاقه مثل ضرسٍ ملتهب
مزعج وعقله فيه رقله وإرتجاج
والطبع طبع مسيلمه .. وأبو لهب
وإذابغيته ضاع في وسط العجاج
من جرب أيام الدهر بيِض وشهب
يعرف قدر خوة مطاليق الحجاج
واللي يبيعك نقد في سوق الذهب
حرّجِ عليه بدين في سوق الدجاج
#النجم_العالي
:
اوقات يطلع لك من اصحابك خصوم
واحيان يظّهر لك من ادنى القرآيب
لا تنّصدم فيهم ولا تكثر اللوم
بعد النجاح لزوم تدفع ضرايب
خلك كما قلب الصقر عالي الحوم
ولا تكسرك صّدت خبول وزلايب
إذا صفا لك قرم من خيّرة القوم
لا تنشد المقفين ويش السبايب
النجم العالي .
من الارشيف
وقت الرواتب تشوف السوق له عجه
حتى المواتر تزاحم في مواقفها
والناس وقت العشاء تسمع لهم لجه
وكل المطاعم ترحب في زباينها
وبعد الرواتب يصير الوضع به رجه
واهل البقايل تسجل في دفاترها
اصرف بحكمه وخل الطيش والدجه
واحفظ فلوسك ترى بكره تدورها
النجم العالي
:
لا تنّدفع في صحبة البعض بالحيل
خلك على ماقيل شخصٍ ... مثالي
بكره يبان الصبح لو طوّل الليل
وتشوف دربك بالوطا ... والعوآلي
وإذا اختلف ميزان صاحبك بالكيل
وصار له دونك صحيبٍ ... موالي
او شفت وضع المسأله جابها ميّل
ارحل بعيد وخل صدرك ... شمالي
النجم العالي .
:
اكثر اسواق التداول .. سوق قالو
سوق مفتوح اربع وعشرين ساعه
كم من الأقوال به حطو .. وشالو
بين كذب وزور من باب الأشاعه
والمدرعم والخبل كم فيه .. جالو
دورهم بالسوق تسويق البضاعه
ناس عن درب الصدق زلو .. ومالو
خلف صنّاع الكذب سمعاً وطاعه
النجم العالي .
يا صاحبي كان تفهمني وتغليّني
ارجوك بعض الرسايل فكني منها
بعض الصور والمقاطع ماتناسبني
ونقل الاشاعات حنّا في غنىَ عنها
واقول تكفىَ واعيد القول واثنّي
عن المحرّم عيونك والسّمع صنّها
واختار ما يرفع اعمالك وينفعني
ومْن الحكم والنصايح ارسل احسنها
النجم العالي .
:
علم التجاهل له قوانين واسلوب
ماكل واحد يستطيع .. ان يجيّده
لاجاك قول الصدق مافيه عذروب
أستقبله وأسّمعه واحفظ .. مفيده
والي يجيك بهرج تلفيق مكذوب
تجآهله ترى التجآهل .. يبيّييده
النجم العالي .
:
المواقف تبّين مستوى كل شارب
وكل واحد يبيّن موقعه بالفريق
فيه صاحب تعده من خيار الاقارب
وقفته وافيه مهما يطول الطريق
والبعض تعتبر خوّته خوّة عقارب
صحبته خلها ياجعلها في حريق
الحياه تشبه الرحله على ظهر قارب
يوم تاخذك للشاطي ويومٍ غريق
النجم العالي .
:
صدري يضيق أحيان ويروّق أحيان
وأروّضه وأشتال همي .... لحالي
ما فيه صدر الا به أفراح وأحزان
ولا فيه قلبٍ من عنا الوقت خالي
هذي الحياه دايم على مر الأزمان
تمضي بنا ما بين مرٍ ..... وحالي
النجم العالي .
:
بعض البشر ليته يطول إنقطاعه
وإن غاب عني قلت جعله يولي
أللي عن الجزلات تقصر ذراعه
ما بي أجيه ولا يشرّف محلي
بينه وبين أبليس خوة رضاعه
لو كان بعض أحيان شفته يصلي
ودي أبو وجهين أغسل شراعه
لكنّي أتغاضا عنه .. حشمتٍ لي
#النجم_العالي
:
كم واحدٍ لا طب مجلس يسّمجه
من زود هرجه يقلب المجلس حراج
حتى المضيّف من ضيوفه يحّرجه
كل السوالف عوج ياالله الخراج
لو تنّصحه تبغى تعّدل .. منهجه
مثله مثل من يهدي الاعمىَ سراج
النجم العالي .
:
سلمان ياقرة عيون ... الملايين
من لامنا في حبك الله .. يلومه
يافخرنا في ساعة العسر وأللين
يالصامل ألي ما تثنىَ ... عزومه
وقفات ... تعطي للزعامه عناوين
من مثل سلمان الحزم في سلومه
غيّرك تخلّو عن ضعوف ومساكين
وأنته مشارك للمواطن ... همومه
النجم العالي .
يالي تشوف العز في جمع الاموال
كم واحدن محروم لذة .. حلاله
دايم يفكر بالخساير والأهوال
بخيل حتى في مقاضي .. عياله
انشهد انه مخطي بكل الاحوال
منهو يشوف العز في كثر .. ماله
النجم العالي .
:
الوقت يكشف لك وجوه الخسيسين
بالذات .. ابو وجهين لو قال ماقال
وإذا تبي تعرف صفات .. الخبيثين
راقب وشوف اقوالهم عكس الافعال
ناسٍ على جلب المشاكل .. حريصين
تلعب على الحبلين بأسلوب دجّال
وفوق الرزاله والخساسه ... غثيثين
فيهم صفات ابليس في زول رجّال
النجم العالي .
من الارشيف:
كل شي مكتوب والمقسوم وارد
لاتحاول ما عن المكتوب خيره
لا تخلي العقل بالتفكير شارد
رزقك المكتوب ماياجيك غيره
الحياه مثل الطقس حرٍ وبارد
وكل واحد لازم يواجه مصيره
لو يشيّن الوقت وتشح الموارد
ثق بمنهو كوّن الكون ويديره
النجم العالي .
رافق كريمٍ بالمواقف يجمٌلك
بعض الرفاقه فاللوازم يسرّك
لو خالفك في موقفٍ ماتحمّلك
تحمّله ترا الصبر ما يضّرك
واحذر من الكذاب مهما يجاملك
تراه في دروب المهالك يجرّك
يطيب لك ساعه ويومٍ يململك
لو طحت والله مايفكر يمرّك
النجم العالي .
:
الوقت يمضي والمواقف سجلات
كلٍ يدوّن ما بغىَ في ... سجلّه
طبع الدهر بين إعتدالٍ وميلات
كم يوم نفرح به ويومٍ ... نملّه
اصبر ترىَ قرب الفرَج له دلالات
كم جاهلٍ يغفل عنه ... ما يدلّه
الكفوا يحذر ما يجي منه زلات
والا الردي ياكم تجي منه .. زلّه
النجم العالي
مجرد دعابه لاتدققون 🤣😛
متى يصير متابعيني ... ملايين
واكون شيخٍ من مشايخ تويتر
وما تابع الا في حدود الثلاثين
الي لهم شهره مثل صيت عنتر
واشوف حالي من كبار السلاطين
والكل في صفحة حسابي مسنتر
النجم العالي .
:
يدور الزمن وبدورته تجربه ودروس
مقادير في صبح وعشيه .. تبارينا
دروسٍ نعايشها في الواقع الملموس
وياكم دروسٍ كانت بعكس .. امانينا
ولكن درب العز والطيب والناموس
ثوابت من الفطره عليها .. تربينا
ولانرخص الغالي ونبقى عزاز نفوس
ومها نواجه ما تغيّر ... مبادينا
النجم العالي .
من الارشيف
كم مبتسم بالوجه والقلب حاقد
في مزحته رزحه على مايقولون
لازم نفرّق بين صالح .. وفاسد
ولازم نميّز بين صاحي ومجنون
بعض البشر تحسبه عاقل وراشد
يطلع خزانة هم واحقاد وظنون
يالله تكفينا ضرر كل .. حاسد
ويالله عسانا .. خير مما يظنون
النجم العالي .
:
من واقع التجربه كل الشدايد تزول
الدهر مثل الرحىَ دوار يطحن طحن
أحيان صدري به الضيقه تصول وتجول
وأيام اغني من الفرحه واشيل اللحن
ولقيت رجّآل ... بالشده يقول ويطول
والبعض مثل الجهاز أللي .. بليا شحن
#النجم_العالي
:
لاهل الشعر مني سلام وتحيه
أللي فرايدهم جزيلات وسمان
الشعر ذوق .. وله مقام وهويه
عند العرب له منزله شأنها شان
والجزل له ميزات ماهي خفيه
بدعه ورده والقوافي والأوزان
أعشق مجارات البيوت القويه
وأبني طواريقه على كل ميزان
#النجم_العالي
:
عيت همومي من عنا الوقت تنزاح
تبعد لها يومين .... والثالث تعود
ولا فيه منهو دايم الدوم مرتاح
حال الدهر وأيامه البيّض والسود
طبع الحياه .. تمر بأفراح وأتراح
والناس فيها بين قادم ومفقود
لكن نصبر والصبر ... فيه مفتاح
والصبر دايم .. بالعواقيب محمود
#النجم_العالي
اخفي عنه شوقي وانا فيه مفتون
والقلب عن غيره يشوم ويعيي
واقول ما احبه وانا فيه مجنون
واشوفه اقرب من بعد كل حيي
غيره من العالم يجون ويروحون
وهو حياتي وفيه شمسي وفيي
خذو الكلام الي مؤكد ومضمون
هو نبض قلبي هو عيوني وضيي
النجم العالي .
:
من واقع التجربه مافيه شي مستحيل
عشنا وشفنا ..... مع الأيام ومرورها
لاتنتظر وقفت الجاهل ومدَ البخيل
وأبعد عن اهل النفوس الزايد غرورها
ما كل موقف يجمّل جاك رده جميل
بعض البشر فايده لو تسَلَم شرورها
#النجم_العالي
:
لاهل الشعر عندي مكانه وتقدير
شاعر ومتذوق وناقل وجمهور
كم بيت له معنىَ ومبنىَ وتصوير
لو كان ماراعيه بالحيل مشهور
وأبيات ... ما نلقىَ لها أي تفسير
لو كان شاعرها له سناب وظهور
أعتز بالوافين .. من دون تقصير
ولاني من أللي بالمشاهير مبهور
#النجم_العالي
:
يازين مجلس به من الكيف فنجال
والشايب اللي الكل يسمَع حديثه
ورِجال مافيهم على الشر عجّال
ودايم على الجزله خطاهم حثيثه
وما فيه لا واشي .. ولا فيه دجّال
ولا يجيه أهل النفوس .. الغثيثه
وبعض المجالس ..مابها سلمَ رجّال
فيه النمايم ... والصفات الخبيثه
#النجم_العالي
:
بعض البشر درب الصبر مايدله
نشبه وإذا خاويته أشغلك وأشقاك
فكره عقيم ... وفيه تسعين عله
يومٍ رفيقٍ لك .. وشهرين يجفاك
ويأللي بطبعك .... كل شيٍ تمّله
ما كل من خاويت ملزوم برضاك
لاتشغل أصحابك ... علىَ كل زله
تتّعبَ وخلق الله تملّك وتجفَاك
#النجم_العالي
من الأرشيف:
تلقى خوي كنه من اخوانك شقيق
طلق المحيا فا الشدايد لك عضيد
صدره بحر بأقسى المواقف مايضيق
وإن حارت الأشوار له رايٍ سديد
هذاك عده اخ وابن عم وصديق
أحرص عليه وفي لزومه لا تحيد
والي تخلى عنك في نصف الطريق
لا تتبعه وأحسب فراقه يوم عيّد
النجم العالي .
:
يألي لسانك بالنقد سيف مسلول
منشار نجارٍ بورشة ... نجاره
رادار بعيوب البشر دوم مشغول
مثل المحلل في شئون التجاره
تجمع ذنوب الناس بالعرض والطول
تحرق بها نفسك سوات السجاره
النجم العالي .
:
#الخميس_الونيس🤣
الخميس أللي يجي بعد الرواتب
يعتبر هو الخميس .. أللي ونيس
الواناسه ترتقي .. لأعلى المراتب
والدراهم تطرد أبلييس الخسيس
تختفي الهوشات ويقل المعاتَب
والمغدىَ والعشاء هرفي وتيس
هذا حال المجتمع مع كل راتب
وبعدها بأيام .. يرجع للتميس
#النجم_العالي
شطحة المساء 🤣🤣
أوقات شعري من صميم شعوري
وأحيان يعجز عن شعوري شعري
الشعر في رايي ومن منضوري
أسلوب راقي يختصر ما يجري
أبيات بعضه .. مثل ورد الجوري
أو فوح عودٍ يجذب ألي يشري
وشعرٍ مجرد صوت مثل البوري
راعيه باسلوب الشعر ... ما يدري
النجم العالي .
:
ما همنا من فاز ... بالأنتخابات
ترامب وإلا جو رفيق المجانين
حنا قيادتنا ... تقود السياسات
بالشرع والحكمه تسود القوانين
قوة قياده ... فوق كل القيادات
يرجون عون الله وبالله مُعانين
وأهل الردا قوم الخزي والخيانات
يبقون في ذلِ ... وضلاله مُهانين
#النجم_العالي
مساء الخير للجميع ✋⚘⚘
ابيات مطروحه لمن يرغب المجاراه ..
ياشيّن صحبة قليل الفهم علة نحر
يزيد همك ويرفع ضغطك وسكرك
يضيّق صدرك لوأنه مثل عرض البحر
تبغى السلامه منه من قبل لايشكرك
النجم العالي .
:
سلام يا مخبآي يا رمز الوفا
تسليمة الوافي .. لذربين اليمين
يالوافي أللي مايجي منك الجفا
باقي على نهج الكرام الطيبين
يا محزمي بالضيق وايام الصفا
لوشانوا الاصحاب طبعك مايشين
اقولها تصريح ..... ماهو بالخفا
انت الذي في ساعة الشده يبين
#النجم_العالي
:
لقيت السكوت أبلغ من الهرج بعض احيان
ويحمي جنابي .. عن هل الكذب واللجه
وإذا صار بعض الناس يهرج بلا ميزان
ويكثر جدل ... من غير برهانٍ اوحجه
يضيع الحكي لو هو من اللول والمرجان
مثل ما يضيع ... الصيد في ليله العجه
#النجم_العالي
@awadtv
@awwal_alghaieth
انا لن اتحدث عن هذا الموضوع لأني لا اعرف الاسباب وننتظر التقرير
ولكن الذي اعرف ابناء الوطن من المهندسين الاكفاء بالاف
ومحاربين من المهندسين المسؤلين الاجانب بالشركات
وبعضهم مهندس بدرجة ماجستير ويعمل في شركه تحت ادارة اجنبي يحمل دبلوم ويمكن مزور .
:
يا زين طبع الركاده .. والأدب والوقار
وياشين قوم الكبر والجَهل وأسلوبهم
البعض طاري حضوره مثل طاري الغبار
والبعض مثل الحياء نشتاق لقدومهم
كم واحدٍ كنت أظنه من صفوف الكبار
وإذا تكلم دريت إنه ... من صغارهم
#النجم_العالي
اصبر على زلت رفيقك وجارك ...
وابعد عن الي ما تسرّك مباديه...
واختر من اهل المعرفه مستشارك ...
وسرّك على غير الكفو لاتبديّيه ...
والى تغير وابتعد عن مسارك ...
يلقى من صدوف الدهر مايقدّيه ...
#شعر
#ثلاثيات_الوقت_الضائع
من الارشف
محاكات صوره
يا سراج يالي بالثرى صرت مدفون
من عقب نورك في مداهيل الاجواد
طبع الزمن دوار مافيه مضمون
الي مضي من زين الازمان ماعاد
والي على ضوك يجون ويروحون
أقفت بهم شهب اليالي بالاعداد
ياسراج وضعك هيض الي يمرون
مع ذكريات ايام من عهد الاجداد
النجم العالي
:
أقول عن بعض اللحىَ يكَرم الدين
يكرم كتاب الله .... وسنة نبيه
اللحيه أللي تخفي الواقع الشين
من خلفها وجهين .. ماهي سويه
وجهٍ امام الناس في مظهره زين
والوجه الأخر .. خبثٍ وشين نيه
هيئة بشر وال��بع طبع الشياطين
واللسن عقرب طين .. ولسان حيه
#النجم_العالي
#بوح_الليل
أنا الذي لا شآن وقتي تحملت
أصبر وبيد الله حبال السلامه
كم ظرف مَرّ وينتهي ماتكلمت
كثِر التشكي فيه ضعف وملامه
حتىَ لو إني من ظروفي تألمت
يبقىَ رصيدي عزتي والكرامه
#النجم_العالي
:
كم مطلقٍ لاغاب عنا .. فقدناه
وكم جاهلٍ نفرح بطاري غيابه
ليت القدر يمشي على ما تمناه
ويغيب عنا كل خبل .. وزلابه
لا ��اح من لحظة غيابه نسيناه
ولا نذكر إلا نشّبته .. والطلابه
وجدي على الي لاأنتخينا لقيّناه
الي في الميقاف يحسَب حسابه
النجم العالي .
:
بيت مطروح لمن يرغب المجاراه
بأذن الله سأرد على المجاراه الصحيحه هنا
والمجاراه الي عليها ملاحظه
سيكون الرد ع الخاص
اشره على الشاعر الي يمدح الهافي
يهين شعره وتحسب له شهادة زور
النجم العالي .
:
ياوريث المجد يالسيف الصقيل
يامحمد مرعب قلوب ... العدا
يا حكيم الراي يا الرمز الأصيل
يا الطّمَوح ألي بفكره ... يقتدا
يا عضيد الحاكم الشهم النبيل
كلنا خلفك جنود ولك ... فدا
ما نخون العهد والله مستحيل
عهدنا يبقى على طول ... المدا
النجم العالي .
:
بعض البشر سجّل وارد وتصدير
ينقل حكي ما بين قاصي وداني
عن كل مجلس جا به يعّد تقرير
كل السوالف عن فلان وفلاني
السالفه يركض بها دون تفسير
ويزيد في مضمونها علم .. ثاني
كم حوّلو مودة اصحاب .. تنّفير
ثم اصبحو مجّني عليهم وجاني
النجم العالي .
:
لا تلحِق المعروف منّات وحسوف
حتىَ لوا إنه ضاع من دون قيمه
بعض البشر جحّاد طيبٍ ومعروف
ومن ينكر المعروف مافيه شيمه
عز الله إن بعض التعب غير مخلوف
لا راح عند اهل النفوس .. الذميمه
#النجم_العالي
لقيت المواقف من تبّين زحول القوم
وتخرج لك الصاحي من الي بهم رجه
ياكم واحدٍ وقت السعه تحسبه زيزوم
ولا جآت لحظات الحسم ضاع بالعجه
وجودي على الي بالمواقف قوي عزوم
فعوله على الصمامت ولايكثر اللجه
الى من نخيته يشفي الخاطر المهموم
يجمّلك في وقتٍ به القوم مرتجه
النجم العالي
:
بعض البشر من سوء ظنه بالبشر
يفسّر اللي يسمعه .. حسب المزاج
وإذا حضر في موقفٍ محضار شر
كُلٍ يجنّب شوفته يبغىَ الخراج
هذا المرض في بعض ناسٍ منتشِر
فيروسٍ أقشر .. ما توفَر له علاج
#النجم_العالي
:
كورونا ألي اربك العالم ..... ارباك
حتى في امريكا وفي دوله الصين
ودار الفرس تشكي مع دار الاتراك
وايطاليا تبكي مع قوم .... برلين
وحنا بفضل الي مَلك كل الاملاك
إديّرت الازمه على منهج .... الدين
ياموطني ياموطن العز .... نفداك
من فضل ربي وضعنا .... مطمئنين
النجم العالي .
:
#لقاح_كورونا
البعض في نقل الأشاعات معروف
مرسول فتنه .. بالأكاذيب ساعي
والوضع له تقييم وأحكام وظروف
ماكل من ينقل .. خبر صار واعي
كم جاهلٍ عنده سواليف وهروف
يسمع وينقل .. كل كذبٍ يشاعي
والبعض كنه قش بالسيل مجروف
يجهل مصادر .. كل علمٍ يذاعي
#النجم_العالي
:
فرَق ما بين التوكلِ والتوآكل
مشّكلة بعض البشر مايدركونه
التوآكل ما ورآه ... إلا المشآكل
والتوكلِ "حرص" بعد الله وعونه
من رقد عن لقمته والناس تاكل
لا يلوّم الحظ لا فتّح ... عيونه
النجم العالي .
:
خذينا الدروس من الزمان وتعلمنا
دروسٍ مع الأيام .. ندفع ضرايبها
وأخذنا على الواقع تجارب وطبّقنا
وعشناظروف الوقت باكمل غرايبها
ولا عآآآد تغرينا المظاهر وتخدعنا
ياكم مانشوف نفوس عافت قرايبها
#النجم_العالي
:
ما نختلف على وجوب النصيحه
النصح واجب في تعاليم الاسلام
لكن نصيحه بالطريقه الصحيحه
باسلوب راقي دون تجريح واعلام
النصح بالتشهير يصبح فضيحه
يا ملتبس بين الحقايق والافلام
النجم العالي .
:
سبحان منزل بالوحي خير الكلام
رب البشر .. عالم بكل أحوالها
وعلى النبي صلاة ربي والسلام
خير البشر ... بأفعالها وأقوالها
أللي محىَ بالنور عتمات الظلام
شفيعنا يوم الحشر ... وأهوالها
#النجم_العالي
:
يامشغلين الناس بالهمز والهمس
وأخباركم دايم بها السم مغموس
أحلامكم غابت بعد مطلع الشمس
وعقولكم مابين تالف .. ومشموس
الحق نوره بان .. ما يقبل الطمس
ياهل العيون العور والقلب مطموس
الفرق واضح بين ذاليوم والأمس
وأللي نشوفه شي باين وملموس
#النجم_العالي
من الأرشيف :
يازين نكهة .. فايح البن والهيل
فوق الجمر يغلي ونجرٍ .. يدنّي
باطراف روضٍ فيه من تالي السيل
في جو هادي مايجي ... بالتمني
لو راس مالي بندقي .. والدرابيل
في صحبة أللي طيبهم فوق ضنّي
#النجم_العالي
:
الصاحب أللي خوّته بشت وإفلاش
لا ترتجي فعلٍ ..... يجمّل وراها
لا جاء لزومه بالمواجيب ينحاش
يقْصِر عن الوقفه .. وعينه تراها
يحسّب الرفقه مثل طاش ماطاش
وحتىَ الرساله .. لا جته ما قراها
عليك بأللي لا غدا الفكر منداش
تشوف له وقفه ...... يذري زراها
#النجم_العالي
#شهركم_مبارك
يامرحبا ياشهرالإحسان والجود
شهر الصيام اليوم يبزغ هلاله
الله علينا فيه .. يمتن ويجود
موسم حصاد لمن يوفَق خلاله
اللي يقضّي ليله قيام وسجود
واللي على المسكين ينفق حلاله
يالله عساه يعود والكل موجود
ويالله تجنبنا الفتن .. والضلاله
#النجم_العالي
مرحبا بالجميع ✋
بيت مطروح لمن يرغب المجاراه
شروط المجاراه :
التقيد بالموضوع والبحر والوزن والقافيه .
ما تجتمع ثنتين في قلب رجّال
طيب النوايا والصفات الخبيثه
النجم العالي .
@Newss_24
بأسم كل مواطن سعودي غيور على وطنه وابناء وطنه
انا شد سمو ولي العهد حفظه الله
ووزير العمل بالنظر في وضع السعوديين
الموظفين بشركات تحت ادارة اجانب
نطالب بحمايتهم من تسلط المدراء الاجانب
الذين تكررت تصرفاتهم التعسفيه ضد الموظفين البسطاء من ابناء وبنات الوطن
:
يامقسّم الأرزاق ... ياعالم الغيب
تعلم ظواهرنا .. وخافي السريره
استغفرك يا رب .. واتوب وانيب
وأسألك في حسن النيه والبصيره
ومن الرزق ماطاب واخذه بالطيب
ويالله عسىَ في كل مافات خيره
فوضت لك امري .. وكل العواقيب
ولا غيرك احدٍ .. بالأمور أستخيره
#النجم_العالي
:
يا الله يا مالك تصاريف الأقدار
بيدينك امر الكون .. دقه وجله
وكل ما عندك .. مقدّر بمقدار
أكتب لناالتوفيق .. بالشأن كله
ويا الله تعدّل ميلة الوقت لادار
والحاير المهموم ... يارب دله
وياالله تزيل الهم .. عنا والأكدار
والعفو والغفران .. عن كل زله
#النجم_العالي
:
من خلق راسي وانا رايي براسي
ماني من الي على الدبكه مساره
الهواء ما يحرك الشمّ الرواسي
وما يطير الا الخفايف في غباره
الثقل لايعني ان القلب قاسي
والعقل يحتاج تفكير بقراره
دام قلبي ثابتٍ فوق الكراسي
العقل والقلب شيخ ومستشاره
النجم العالي .
:
يامن تحدثتم عن حقوق الانسان
وقت السعه بالحيل صحتم علينا
يا كم خبر منشور زورٍ ... وبهتان
ويا كثر ما قلتوه فينا ... وفينا
واليوم هذا حصحص الحق وانبان
وشفتم ملكنا فالعسر ... يحتوينا
وشعوبكم ما بين ميّت ومرضان
تبكون وتقولون وش في ... يدينا
النجم العالي
:
نوفي مع الوافي ... بكل احوالنا
وندعس رموز الفتنه المتآمرين
مسكين من يأمن ... ردود افعالنا
ما يدري انا بالمواقف صاملين
افعالنا تا جيه ... قبل اقوالنا
في وقت ماينفع متاب التأيبين
يذكر فعلّنا فيه ... نسل اجيالنا
وياخذ منه عبره جميع الظالمين
النجم العالي .
:
بعض الأوادم مانبي له معاريف
واكبر معاريفه علينا .. سكوته
حتىَ لو إنانخشره .. بالمصاريف
بس المهم ما نسمع إزعاج صوته
نرتاح من شره .. وكثر التخاريف
نقصٍ ولا تفرق .. حياته وموته
#النجم_العالي
:
يا مدعي بالعلم وانته .. تجهله
ضايع وكم سببت للعالم ضياع
جاهل وقولك غير عما .. تفّعله
ابعد عن الفتوى بقدر المستطاع
الدين كامل ما يبي له .. تكمله
هذا كلام المصطفى يوم الوداع
النجم العالي .
:
ياكم دعوني في حوار المساحات
قالوا تفيد ... وتستفيد وتشارك
قلت العذر ما احب كثر النقاشات
ولا شفت فيها مايفيد المشارك
كل السوالف حش وإلا اختلافات
والبعض كنه ... داخل أم المعارك
قليل من يفهم اساس الحوارات
ولا كل مايُطرح ... مفيد ومبارك
#النجم_العالي