انا اللي دخلت القصر في غفلة الحراس
وتركت بعلوّه قلب وبساحته جره
وش أهديك غير الشّعر وأنتي عريبة ساس
ولك جدّ يُرجى خيره ويتّقى شرّه
أنا الهايم الّلي كل ما اوشك على الإفلاس
أجيك ويديني خاليه وارجع بـ دُرّه
ماجيب القصيد الجامد اللي بدون احساس
اجيب القصيد اللي يخليك منغره
من مبلغ الحيّين بأطراف البلد
إن المدينه تمرها طش اعجمه
وإن المكان اللي عجز يملاه أحد
نفس الشعور اللي عجزت اترجمه
وإن المحبه كل ماطال الأمد
تقضي على حلو الكلام وتلجمه
بيتٍ هجره النبت والما للأبد
وعلى جداره عظمتين وجمجمه
من اليوم شرهاتي عن الطيِب ما تعنيك
توكل على الله . . لا لك ولا عليك حقوق
ليا صار ما ميزت بايعك من شاريك
خطير يتساوى عندك الفعل والمنطوق
بعد ما نفضت من أجمل الذكريات أيديك
على حطتك محدٍ فتح بعدك الـ ( صندوق )
على رمش عيني وقف الدمع لا يبكيك
على شان ما أجّري عليها ولا مخلوق
يعكس الشفق نوره على صفحة الكبوت
مثل ما يعكْس البعد زولك على عيني !
على وين ماخذْك الهوى يا رقيق الصوت
لا ذعذع، وشل خْطاك من تربة سنيني
شعوري على حطة يدينك إيلين أموت
وحتى لو إن منت بـ على حطة إيديني
من المعطيات يوادع الحلم شوف العين
مثل ما النهار يوادع الشمس لا غابت
جفاف الموارد يسلب القاع ثوب الزين
و شحّ الطموح يزعزع الموقف الثابت
من اللي تشوف العين في زهرة العشرين
" سبقنا السنين العجله وروسنا شابت "
شكيتك عليك البارحة والسبب كوبليه
على صوت ذكرى بعد غنت وش أخباري
على حطة ايّدك يعتريني ضباب التيِّه
ألملم بقايا قوتي .. وادفن أسراري
تمنيت اجسّ القلب مع جرحك اللي فيه
واغْسله مثل ما تغسل التوبة أوزاري
مادامك تبي تبكي على اللي مضى ها ليه؟
تخليني اكحل رمشك الترف بـ أشعاري
حبيبي رغم هول العذاب ، أدري انك لي
بصيص الامل في رجعتك .. نور متماسك
بترجع .. وترجع راحة أيدك تضم يديّ:
وأداعب عيونك قبل ما أداعب احساسك
وأعلمك قبل الشمس تكسر بقايا الفيّ
وقبل لا تصب الحلو والمر في كاسك
عسى راسك من صدوف الايام يبطي حي
لو جروح قلبي كلهااا .. من تحت راسك :)
على قدر نسبة الألم على قدر نسبة الجمال في التعبير ، يقول احدهم بعد إصطدامه بـ حاجز " النصيب " بيت يتيم يُكتب بماءِ الذهب
يقول :
تمر العذارى عقب مريم غنايم حرب
عقب ماني اكسبها على الناس اوزعها !
ازكى السلام وبالغ التقدير
لآخر رسالة جات من يمك
تقول وشلونك واقول بخير
بخير حتى لو ما همك
يا سيد الاحساس والتفكير
والمرحبا تخطيك وتخمك
لك في حنايا شاعرك تبرير
من ضحكة ابوك وحنان امك
وشلون وانت الآول والآخير
واعذب كلام يمر من فمك
تفرح لك الارض ويحن الطير
ويمرك السحاب ويخمك
أنا وين أبهرب منك مافي هروبي فود
فؤادي معاك وفي هواك انفتن جدّا
الاقيك في مطلع قصيدة ونسمة نود
وفي البدر لا ضوّى .. وفي الورد لا ندّى
وفي كل طرف أدعج وفي كل ضامر عود
وفي وجه من لبّى وفي صوت من فدّى
وفي حلمي الغادي وفي نصفي المفقود
وليل ٍ هقيت إنّه يعدّي .. ولا عدّى
قال لي لو جتك فرصه تفتّش بالقلوب
قلت له لو جاتني صدق ما فتّشتها
خلني مرتاح اصادق عدا واسمع كذوب
إترك العالم تكذب .. وراك أبلشتها ؟
دامني لا جيت غالي مقدّر ، ومحسوب
قيمتي ( خلف الكواليس ) ما نبّشتها :)
توادعنا و انا كاره وداعك . . و انت نفس الحال
ورحت امشي وفي صمتي ثلاث اصوات مسجونين
بكى واحد ، وواحد قال : لاترحل ، وواحد قال :
عسى ان تكرهوا حاجه وهي خيرٌ لكم بعدين !
غريب وتستثيره كل نسمه من وطنْه تهب
يدور له جليس يسامره ويبدد سكاته
لو انه وسط مقهى كن روحه في غيابت جب
وش اللي ينقذه ولا وش اللي يجمع شتاته
قرت فنجاله اللي ماتخاف الله وقالت: حب
يهزه من سنين صباه لين اخر محطاته
قربك يحدّد ليه؟ ولا من متى؟
والوقت بـ أيامه وبفصوله جميع
العام ماحسيت صيف ولا شتاء
العام كان بـ كل لحظاته ربيع
واليوم صرت أشوف الألوان بْهتا
وأشوفني وأشوفك وحنّا نضيـع
والله وزانت الدنيا بعيني كثير
ليت قلبي من اول ماكبرت انسرق
يا شبيه الغزال الجافل المستذير
شرهة الحبر ما تلحق بياض الورق
لا تعلقني اكثر فالبساط الحرير
البساط الحرير من الزعل يحترق
انت ناوي تطولها معي للأخير ؟
ولا ناوي على أول مفترق نفترق
يا كوكبكم المليان جور و و ظلام و ريب
يحبونه اللي ما يعرفون تاليته
رعاياه بلشانين بين الغنم و الذيب
و احد فاقدٍ حيّه و احد فاقدٍ ميته
انا فوق الارض اخْلقت مغصوب ماهو طيب
لو انه بكيفي كوكب الارض ما جيته
من ملامحك فجر ٍبالطهر مبتلّ
يفهق الكون عن يمناك ويسارك
في مقاديم مجدول النهار تزّل
دهشة ٍ في نسيم الشوف تحتارك
نجمة الصبح وايامي رحيل وحِل
كن الاعياد بين الناس تختارك
جعل تبطي سنينك يا راسٍ ما فوقه راس
على الأرض من بدّة عربها وغاليها
يا قلّ الاسامي لا ذكرتك وزاد الياس
على كفةٍ ترجح بها كل ما أجيها
محلّك محلّك فـ المكان وصدور الناس
ولا علِّقت هقوه على غير راعيها
مجيّك على فنجال شقرا، وجلْي عماس
غناةٍ ما تاخذها الرياجيل بإيديها
أستحلي فيّة القلب مادونك ستار
يابعد من شاقه البرق وأغراه الحيا
شايفك من عاد الأحلام بعيونك صغار
قبل معك الوجد يكبر والأرواح تحيا
من نشدتي عن سنا النور وأنا والنهار
فالصراع اللي يحدد بقاء الأقويا
علقيهن في قلايدك من تحت الزرار
ماكسبت إلا لجيدك مفاتيح الضيا
فمان الليل ، و أحضان الدفا و مصافح القمرا
فمان الباب و الشبّاك يوم أواعدك و نطيش
فمان الجرح ، لا والله فمان أحزاني الكُبرى
فمان أغلى ثلاث سنين مِتّ بها عشان أعيش
فمان الخوف ويدينك جنــــود وأضلعي أسرى
وأنا فيني من الإحبـاط مايكفي هزيمة جيش
اتبع الليل .. لين يغيّبه بكره
تشرق الشمس بكره وارسم ظلالي
قالوا الناس ، والطيّب على ذكره
قلت شكرًا .. لكن خلوني لحالي
يوجس الخوف قلبٍ شاف ما يكره
لا اقترب منه غالي .. فارقه غالي !
تقول ذيك المزايا كيف صارت عيوب ؟
واقول ذيك المباني كيف صارت حطام ؟
ودعتك الله ورحت اطوي طوال الدروب
ولا عليّ الملام .. ولا عليك الملام
اقبلت مثل السحاب ورحت مثل الهبوب
وكبرت في ليلة الفرقا ثلاثين عام
وبرأت لله من ذنبي وقررت أتوب
براءة الذيب من يوسف عليه السلام
- طويق
جيتك وانا ما املكك ولا ملكتيني
الملك لله . . وانا حر يا حره
مع ان كلامك حنون وما جرحتيني
كلام عينك هو اللي يتّقى شره
ما الومك اليا اعتذرت وماعذرتيني
يستاهل اللي يجيه معاود الكره
خليني املى قبل لا افارقك عيني
يمكن ما عاد نتقابل غير ذا المره
إن بغيت اواصل المشوار مليت المسيره
وإن بغيت أقنع منعني الأسم والجد المردد
ㅤ
وصرت مثل الطيّب اللي زل ضيفه في قصيره
ان وقف مع ذا تردد و ان وقف مع ذا تردد :)
ياصدق .. حاول تواصلنا ولا تقطع
من تالي اغلب قلوب الناس ، غشاشة
كل العلاقات .. صارت شد لي واقطع
والحب : ناشه من الخذلان ، ما ناشه
ماباقي الّا السناب يروج لـ مقطع
تبي علاقة جديدة ، ارفع الشاشة :)
خذيت الأمان اللي مايوخذ بنظرة عين
على جال ريضان الحشا تسرح وتمرح
وقريت المهابة في عيونك .. ثلاث سنين
هي اللي حوّرها .. بسطت هيبة المسرح
احبك و احنك و اخجلك بالكلام الزين
و أدور من يبشرني بجيتك .. و افرح
وانا والله اني خابر انك طرف سكين
متى ما عطاك الله تمّكن .. تبي تجرح
ذكرتك وانتهى يومً من الفرقا بشهر ابريل
وانا اللي تحت تأثير البكا والحزن والعبره
ٰ
يا اقرب لي من اللي في يديني وابعد من سهيل
اخاف اجبر عليك الخاطر اللي مت من كسره
في عيوني كلام .. وفي محانيّي
همٍ يشيلني لو كان ما شلته
ليه وياك لا اوافق ولا اعيّي ؟
الحزين اكثر همومه من اسئلته
لا وقفت ويديني في مخابيّي
إعرف ان في عيوني شيّ ما قلته
تخيب الظنون احيان في اللي تعدّه شيك
و يظهر لك من الناس " اخاً لم تلده امك "
-حزمي بن سعد
يجوز يتردّى من تحسْبه على يمناك
ويفزع لك اللي كان طالع من الحسبه
-حمدان الديحاني
يمكن يسرّك عدوّك في مواقيف
ويبور من كنت تستذبح من أجله
-عبدالله السراهيد
صدر فيك القرار الي ما نرضا به ولا نبغيه
وحذفت عقالي بحضن الكرامه لاجلك وعيّت
ودفنتك في مكانٍ ما اذكر انيّ قد ذكرتك فيه
وبكيتك وانت حي ، وكنّي ابكي ليّ على ميّت
في حفظ ربي وخل الارض فيني تدور
لا عاد تنشد .. ولا يهمك شصار فيّ
ح��ى ولو يحزنك ماينكتب فالسطور
فرقاك كيّ .. وسؤالك عقب فرقاك كيّ
اخذ المسافات والايام " سكة عبور "
الضحك لك .. والمضرّه والمشاوير ليّ
الخوف ماهوب من حاجه ولا من شعور
الواحد الحين صار يخاف من كل شيّ
على ما آعتقد يكفيك من خاطري بيتين
بعد شربة الفنجال و الشاهي الجمري
عسى الكلمة اللي في ضميرك لها يومين
ماهي بالعوض في هرجة المبسم الخمري
لا تستغرب إني ما نطقت الكلام الشين
مادام المواقف عند طوعي وتحت أمري
أنا أفرح لا شفت الكره فـ عيونك الثنتين
لو ألقى المحبة منك شكّيت في عمري