وإليا بلاك اللهَ بـ الرديان !
حاول تغاضى والتغاضي فنّ
ولا تشيّن النيّه وكون إنسان
المجتمع .. اغلبه سيئ ظن
وفرّج عن المهموم والجوعان
ان مامسحت دموع ! ضحكّ سن
.
#نقا_الاسيمر
لا تلومني لا سألتك عن صغار الامور
من حق نفسي عليك آعرف مقدارها
شف الاراضي على مر الزمن والعصور
لولا الغصن والورق ما ظلّت اشجارها
متى تذم الغياب و يمتدحك الحضور ؟
وكلمة أحبك متى تنفض عن غبارها ؟
ان كان قصدك عذر ! ارجع تراك معذور
رجوع الاحباب هذا : أجمل أعذارها
.
#نقا_الاسيمر
سلامي على اللي تسرق الروح والاعجاب
فدتها العرب والروح والصاحب الخيّب
مطر صوتها لا داهم السمع والاعصاب
هنا أحسّ بـ ان الموت لـ انفاسي قريّب
لها في خيالي رش ديمه وقرع أبواب!
ولها في خفوقي حب لا يمكن يشيّب
أنا ، من ينجّيني ليا سلّت الاهداب !
وهدبها : كلام الحق لا قيل من طيّب
ولا تحسب الناس هي اللي تحدد مصير
ترا مصير البشر فـ يدين خلّاقها
لو يفرشون بـ حكاويهم لـ سمعك حرير
الناس ما ينعرف وش داخل اعماقها
احيان عاملهم بـ حكمه وخُلق وضمير
واحيان ! عاملهم فـ ما تبدي اخلاقها
والشجره اللي مَ ظلّت من شموس الهجير
بكره تهب الرياح وتاخذ اوراقها
#نقا_الاسيمر
نضحك بوجه الحزن وانجابه سنين
لو بكره .. يسوّي من الامس إعاده ،
وبـ تزين إن ضاقت علينا تبي تزين
مْن الله اللـي ما يخلّي .. عـباده !
وبـ يختفي هذا ( الوبا ) لو بعد حين
ولا يفارقنا شعور .. ( السعـاده )
•
#نقا_الاسيمر
بيني وبين الليل حرب أعصاب
وكلامك اللي قلت .. جارحني
وين المحبّه ، فص ملح وذاب ؟
وين .. الخفوق الليّن المحني ؟
أخطيت في حقك؟ وش الاحباب؟
تقدر تعاتبني .. و تنصحني
انا بسكّر لـ المواصـل بـاب
لكن قبل لا اغيب .. بايحني
اسف على الحب وعلى الاعجاب
وشكرا على جرحك .. وسامحني!
يديني ماتملك غير حب ووفا وازهار
ولكن خذلتي مدة يديّ واحرجتي
.
تدرجتي بكل السكك في عيون البار
ومع اي طاري مر بالي .. تدرجتي
.
ابي تذكرين الخافق اللي عليك يغار
لامنك ضميتي للاحاسيس واحتجتي
#نقا_الاسيمر
فك في كلمة احبك يا حبيبي قيدي
جعل كل العاشقين وحبّهم يفدونك
فـ القصيد وفـ المحبّه ماني بـ تقليدي
ايه انا نزارك وجدلانك و مجنونك
كل عام وحبّك القادر على تجديدي
وكل عام وعاشقك ماهو يعيش بـ دونك
ماني بـ قادر اشارك هـ الخلايق عيدي
عيدي والله لمسة يدينك وشوف عيونك
.
.
#نقا_الاسيمر
أقطع عن الذكرى واهلها المراسيل
ما يسجن الحالم سوا ذكرياته
.
مخطي من يشوف الصعايب تساهيل
واللي يسولف عن جميع امنياته
.
علّق على صدر الطموح القناديل
إليا سدل ليل المأسي عباته
.
الارض تدبك في ميادينها الخيل
والقلب له ميدانه و صافناته
#نقا_الاسيمر