من اسبوع دخل معايا العناية بنوتة زي القمر غرقانة في البحر و هي بتصيف مع مامتها .. امبارح مودة اتفصلت من التنفس الصناعي و بقولها تاكلي ايه قالتلي حواوشي .. جبتلها حواوشي و خرجت من العناية انهرده الحمد لله ❤️
انهرده كان معايا حاله داخله تعمل قيصرية و سقطت مرتين و ده كان الحمل التالت و كانت خايفه و متوتره بشكل مش طبيعي قبل ما تنزل عمليات .. مريت عليها بعد ما طلعت من العمليات لقيتها جابت توأم و شوفت في عينيها فرحه و بتقولي "توينز يا دكتور" خلتني طاير .. عوض ربنا في أبهي صوره ❤️
كان فيه راجل عجوز في الجيم كل ما يجي يلعب على جهاز يقول "استعنت بالله" لقيت نفسي بقولها غصب عني وانا بلعب في اليوم وكل ما المذاكرة تبقي تقيله على قلبي الايام دي بقيت اقولها لان معناها عظيم والله .. لا تستعين علي عمل او انجاز اي شيء الا بالله
محمد اخويا بيقولي هات 5 جنيه و خد واحده مكانها بقوله ليه قالي لقيت حاجة تخصك في فلوس ايراد الكافيه انهرده .. لقيت 5 جنيه من مدرس الفرنساوي بتاعي في الاعدادي و كاتب "برافو يا مجدي 20-12-2009" وقتها خدت ال 5 جنيه و كنت فرحان و صرفتها ! و بعد 9 سنين ربنا قدر ترجعلي تاني !!
اسمحولي في ظل اللغبطة و الناس اللي بتقول سنة خامسه هيتخرجوا من غير اطفال و نسا .. عاوز اقولكم ان كتاب مدكور ده أنضف و أحسن كتاب قريته طول ال ٦ سنين في الكلية كتاب وافي و كافي و مش بيخليك تسأل نفسك ليه بيفسرلك كل حاجه و اللي مقراهوش فاته كتير جداً ..
منزلتش غير مره برايفت ك طوارئ في اسكندرية قبل زمن الكورونا .. ست جاتلي الصبح تكشف و اديتها علاج لقيتها جايالي بليل في نفس اليوم تقولي انت عيادتك فين يا دكتور انا اول مره انام من ٣ أيام بسببك .. ذكري حلوة من اليوم و الواحد عايش علي الكلمتين دول لحد ما يرجع ينزل تاني ❤️ ..
اوعي تفكر انك بعيد عن الفتنة .. مهما كنت فاكر ان علاقتك بربنا كويسة انت في الأول و الآخر بني ادم .. ربنا مكنش هيقول " و خُلِق الإنسان ضعيفاً " غير علشان عارف ان احنا اوقات هوانا بيغلبنا و بنغلط .. ادعي دايماً بالثبات و الهداية و دوام الإستقامة لأن محدش معصوم من الخطأ ..
أحد الشخصيات المريضة اللي كان معايا في الجيش و من الناس اللي كانت بتدور ازاي تأذيني و تضرني بأي شكل باعتلي دلوقتي يقولي ازيك يا دكتور مجدي .. عملتله بلوك بمنتهي السلام النفسي وانا مش ندمان و مفكرتش ثانية .. الإحسان وقت الشدة مش بيتنسي و كمان الإساءة وقت الشدة مستحيل تتنسي ..
امبارح وانا بشوف عدد العيال اللي بصيت عليهم في الاستقبال وقفت للحظة كده ! .. انا مكنتش اتخيل اني هتخصص اطفال مكنتش بطيق اي طفل داخل عليا وقت البرايڤت 😅 .. ترتيبات ربنا و اختياراته دايما أفضل ..
أبويا ده أحسن حاجة حصلتلي في حياتي انا طلعت شبهه و خدت منه كل حاجة تقريباً و فخور بكده .. قاعد في الريسيبشن دلوقتي و هو مصمم يلبسني الروب الصوف بتاعه لأن الدنيا سقعه و انا بقوله يا بابا مش سقعه والله مش هلبسه راح حاطه علي كتفي و بيقولي انت بتكح بقالك اسبوع اتدفي بس علشان خاطري❤️
ليه بنتعامل مع الناس و مشاعرهم انها حقول تجارب عادي تخش و تطلع و تسيب بصمتك سواء بالخير او الشر و تمشي و كأن شيئاً لم يكن و تحس بسلام نفسي بعدها ؟! طب هل البني آدم ده بيقدر يعيش حياه سويه بعدها هل بصماتك اللي سيبتها دي مش هتطارده بعد كده طول حياته لانه كان مخلص لك ؟!
في نائب چونيور كان بيسأل علي معلومة امبارح و كان بيسلم عليا في الرايحه و الجاية لما رديت عليه و شرحتهاله قالي انت تخصص ايه قولتله امتياز و من ساعتها لا بقي يبصلي و لا يسلم عليا !! تصدق انا غلطان 😂
حاله التناحه و البلاهه اللي بتنزل علي دفعه سنة ساته بعد اي ورقه و اي امتحان فاينال ظاهره تستحق الدراسة والله يا جماعه و كلنا بنتشارك فيها دون استثناء 😂❤
الواحد ميسواش من غير أبوه والله ❤️ .. انهرده صحيت 6 الصبح حرارتي 40 بابا فضل جمبي لحد ما بقيت كويس و منامش خالص .. مع مرور السنين الواحد بيبدأ يخاف و يدرك قد ايه هو السند الوحيد بعد ربنا .. اتمني لما أكبر بس آخد ربع حنيته و قلبه الطيب ده و ربنا يطولنا في عمره و يخليه لينا يارب ..
امي امبارح سهرت معايا للفجر بابا صحي الفجر قالها خشي ارتاحي و فضل صاحي معايا لحد ما نزلت الامتحان و وصلني علشان اسافر .. والله العظيم انا مهما عملت مش هوفي حقهم مهما عملت ربنا يخليهم ليا ❤ ..
ايه في الدنيا اسوأ من انك تضرب في مواطن الثقة عند شخص معين تعرف حاجه عاملاله مشكلة و تدوس عليها مره و اتنين و تلاته لغاية ما يكره نفسه و يفقد ثقته في نفسه !
هي مش قلة ذوق و لا حاجه بس انت من حقك تبعد عن الناس اللي بتجهدك اللي بتحملك فوق طاقتك و مش بتضيفلك اي حاجه محسوبين عليك و هما كل يوم بياخدوا منك حاجه و بيطمعوا .. بمجرد ما تحس انك مش مرتاح امشي من غير مبرر لان كونك مش مرتاح ده اقوي مبرر ..
وانا بتكلم مع بابا في نص الكلام عادي بقوله اني محتاج اجيب كذا او بفكر اجيب كذا و بنسي عادي مش ببقي حاطط الموضوع في دماغي .. بلاقيه تاني يوم جايبلي الحاجه دي وانا كنت نسيت اصلا .. ربنا يبارك في عمره و يخليه لينا يارب ❤️
لما اكون راجع من الجيم بليل او بعد يوم مرهق و احس اني ممكن اتكاسل عن صلاه العشا بفتكر ان اللي منحني الصحة اللي اتحركت بيها دي و روحت بيها الجيم قادر يسلبها مني في ثواني و انه يستحق اشكره عليها .. عارف انه قد يكون سبب ضئيل بالنسبة لنعم ربنا علينا بس باخد ده وسيله علشان مكسلش ابداً
حزين اوي انهرده بصراحه شفت طفل اتخيط في وشه ب برولين ٦ راح يفك الغرز حد قاله لا متفكش هتدوب لوحدها !!! و الست جايالي بالولد بعد شهرين متخيط و مفكش الغرز و الخيط سايب آثار في وشه و كانت جايه ببنتها لسبب تاني بالصدفه مش علشان الولد ولا علشان تفكله الغرز اصلا !!!
كابتن أنس ❤️ .. هيموفيليا B و بقاله 20 يوم في العنبر .. أنس صمم يتصور بالسماعة في آخر يوم له في العنبر و خد رقم موبايلي و قالي البس حاجه تقيله علشان السفر سقعه اوي دلوقتي❤️ .. أنس بطل و شخصية جميلة و انا اتفقت معاه هياخد باله و مش هيتخبط تاني ❤️ عيبه الوحيد انه عاوز يطلع دكتور 🤦🏻♂️
اتمني متطولش في الزعل .. الظلم معتاد جداً في بلدنا مش عاوزك تزعل لأن ده بيحصل كل يوم .. بس انت دايماً كنت قدها و كان طموحك أكبر من أي عقبات .. لسه بدري و انت صغير بطولة افريقيا دي هتجيبها في شوال يا مارو بس الوقت مأذنش لسه
And whatever happens I'm so proud of you ❤️❤️
الدنيا دار شقاء .. السنة دي عودتني استحمل و افهم ان مش دايماً الظروف هتكون في صالحك بل ممكن تحسها ملطشة معاك لأبعد الحدود .. فقط عليك الإيمان بترتيبات ربنا و أقداره عز وجل و أنه يختار الأصلح و الخير لك حتي و إن كان علي عكس رغبتك .. فالحمد لله دائماً و أبداً ..
ادعوا يا جماعة .. ادعوا كتير باللي بتتمنوه و لحوا في الدعا .. ادعوا ربنا يعفوا عنا و يتجاوز عنا .. ادعوا للي بتحبوهم و اخلصوا لهم الدعاء من قلبكم .. ادعوا لامواتكم و اموات المسلمين .. تصبحوا علي خير و انفراجة من كل هم ❤
اللهم بحق فجر هذا اليوم أن تغفر لأمتك علا عبد القادر سعيد ..
اللهم انها ضيفتك هذه الليله وأنت اكرم الأكرمين ، يارب ثبتها عند السؤال ويمن كتابها ويسر حسابها واجعل الجنة دارها يارب العالمين ..
اللهم اغفر له و ارحمه .. اللهم باعد بينه و بين النار .. اللهم نقه من الذنوب و الخطايا كما ينقي الثوب الابيض من الدنس .. اللهم آنس وحشته .. اللهم آنس وحشته .. اللهم آنس وحشته
انا اول مره اروح بنك الدم و ارجع مبسوط امبارح .. بنت ١٨ سنة معاها نزيف داخلي هيموجلوبين واقع و محدش راضي يديهم دم لا عمال ولا تمريض حتي راضيين يدوهم .. روحت جبت الدم رجعت لاهل البنت و هما و التمريض قاعدين يدعولي .. ياريت لو نقدر نتبرع منترددش يا جماعه في نقص فظيع في كل الفصايل .
بشوف الشارع ضلمة ازاي وقت الفجر و انا ماشي مش شايف ايدي .. و بعدها بساعة واحده او اقل النور يملي الدنيا تاني ! .. حكمتك يارب و فرجك القريب من كل فتره مهما كانت صعبه اكيد ليها نهاية و نورك هيطلع اكيد في الآخر ❤
Rule number 1
اوعي تثق في تمريض و هو بيديلك معلومة عن العيان او حالته و اتأكد من كلامه بنفسك تاني علشان لو خدت كلامه علي انه صح من غير ما تتأكد هتلبس و محدش هيشيل الليلة غيرك
لله ما أخذ وله ما أعطى وكل شيء عنده بأجل مسمى فلنصبر ولنحتسب و لا نقول إلا ما يرضي ربنا ..
إنا لله و إنا إليه راجعون ..
اللهم وسع مدخلها اللهم نقها من الذنوب والخطايا كما ينقي الثوب الابيض من الدنس اللهم اغفرلها و ارحمها و ادخلها الجنة بغير حساب ولا سابقة عذاب
صلاه الفجر كلها في المسجد 90% منهم ناس تخطوا سن الخمسين .. طب ليه مش بنفوق لنفسنا من بدري ليه بنفتكر كل ما نهايتنا بتقرب و عمرنا يزيد .. بس ده طبع الانسان بيفكر انه مأبد فيها طول مهو بصحته وللاسف بنفتكر بس ربنا وقت الشده او كبر السن ..
اتعرفوا ع ناس جديده يا جماعه متفضلوش ماسكين في الدايرة بتاعتكم و الاتنين تلاته اللي حواليكو غير لو ناس مريحه .. لكن الخازوق قد يأتي من أقرب الناس ليك عادي .. ممكن تلاقي في المعارف الجديده دي ناس نضيفه عمرك ما شوفتها في دايرتك اصلا بس انت كنت خايف تطلع بره بس ..
مبسوط بأمي جداً لانها كل يوم بتمسك المصحف لعدد ساعات مش قليل و الموضوع ده ليس بالقريب و لكنه بجد بيفرحني في كل مره اشوفها ماسكاه لدرجة ان المصحف بدأ يتفصص من كتر ما بتمسكه .. اللهم اجعلها من اهل القرآن و من اهل جنتك ❤
إذا وقعت عينك علي صاحب ذنب فلا يقع في نفسك العزة وأنك خيراً منه ، هو فُتن وأنت برحمة الله نجوت ، فإدع الله له بالهداية ولنفسك بالثبات
"علي بن أبي طالب"
دخلت علي امي دلوقتي و هي بتستعد انها تصلي و بقولها ايه يا ماما عامله ايه شكلك منمتيش قالتلي "مجدي انت جعان صح" 😂 بقولها عرفتي منين قالتلي "هو انت قريبي من بعيد مثلاً " 😂😂
4 ساعات قاعد مع كاتونجا ع البحر انهرده و معنديش حد أقدر اتكلم معاه زي ما بعرف اتكلم مع كاتونجا ..
يظل هو الشخص الوحيد اللي ممكن اقوله اي حاجة حرفياً من غير ما اقلق علي شكلي في نظره او اعمل حسابي لكلمة تطلع من بؤي ..
الحمد لله علي نعمة وجوده في حياتي والله❤️ ..
راكب جنب واحدة و معاها بنوتة صغيرة في مشروع المنشية وانا رايح فطار الكلية البنوتة كان عندها سنة قعدت العب معاها والدتها بمجرد ما اكتشفت اني في كلية طب اكتشفت ان عندها بنتين كمان في الكنبة اللي وره قعدت تنادي عليهم و تقولهم "بصي يا اميرة عمو دكتور عقبالك" 😂
كان الشيخ بتاعي اللي بيحفظني قرآن زمان اسمه محمد ابو قرن كان بيقولي بكره تكبر و الدنيا تاخدك عن رمضان و متعرفش تعمل اللي ممكن تعمله دلوقتي .. قالي ربنا بابه مفتوح في اي وقت حتي بعد رمضان .. بس عارف لما يبقي المحل مفتوح دايماً و عامل عروض في شهر واحد من السنة ..
الواحد زهق من الكلام ع البلد دي .. اسوأ ظروف شغل و اسوأ نظام رعاية صحية و اسوأ شعب ممكن تتعامل معاه بتتشتم ٢٤ ساعه و أقل مرتبات بتاخدها و اسوأ إمكانيات شغال بيها .. يارب رحمتك ..
صباح الخير صباح نهاية راوند النسا
وانا داخل الكلية امبارح مستوي و مستني نصيبي في الامتحان لقيت ست واقفة علي باب الكلية بتتكلم في الموبايل بصوت عالي و بتقول يا نهار اسود و منيل يا ايمان ده يوم اسود و منيل 😂 مقدرتش امسك نفسي والله اديرت و قولتلها ليه الفال ده بس ع الصبح كده 😂