واحد انهارده بيقولى انا متاخد غياب ليه قولتله عشان مبتحضرش مثلا
قالي ازاي دا انا بحضر مع الدكتور التاني علطول قولتله انهي تاني اسمه ايه
قالي دكتور خالد
والدتى انهارده على عرفات بعد تعب وتجهيز شهور لليوم دا رغم المشاكل الصحية الكتير اللى عندها
اعظم مكافأة تستحقها مشفتش حد تعب فى حياته وعانى واستحمل قدها
يارب تقبل منها واغفر لها و عوضها كل الخير فلا يمر يومنا هذا الا وكتبتها من عتقائك من النار
اللهم لك الحمد كما ينبغي لجلال وجهك وعظيم سلطانك
Dreams come True
رسميا معيد بقسم الڤيرولوجي كلية الطب البيطري جامعة الزقازيق
اللهم انفعنا بما علمتنا وعلمنا ما ينفعنا❤️
"كل الاشياء مصيرها ذكريات فاجعلوها جميلة" اخر يوم دراسة مع دفعة تالتة
تعبنا جامد طول السنة بس يستاهلو كل تعب ووقت معاهم حقيقي بتمنالهم كل التوفيق والنجاح فى حياتهم دايما❤
صديقى الفلسطينى العزيز افتقدك بشده كنت اتمني ان نحتفل سويا بعيد ميلادك ال٢٥ والابتسامات تعلو وجوهنا كعادتنا و تشاركني طموحاتك التى لا املّ سماعها مهما بدت صعبة المنال لكني اؤمن يقينا ان كل اقدار الله خير وأن فرج الله آت ..نذكرك دوماً فى دعواتنا...عيد ميلاد سعيد❤
@AlaaFayyad13
داخل اراقب امتحان السمر انهارده لقيت حد من اللى بيمتحنو فاكرنى داخل امتحن معاهم فبيقولى انت محول معانا قولتله لا لحد ما لقانى بوزع عليه ورق الاسئلة قالى اسف يا دكتور والله وحسيته اتوتر فرجعتله تانى وفتحت معاه كلام ومحول من جامعة ايه وهزرنا واتعرفنا وقولتله اشوفك السنة الجاية عندى
من الحاجات اللطيفة انهارده وانا داخل سكشن الصبح بعد ما كنت سايب السكشن اسبوعين اول ما دخلت سمعت هيييييه وابتسامة عريضة على وشوش الناس واحساس ان وجودك being appreciated دا بيفرق جدا 🤍
تتخيل تتصور مع اخواتك اللى كمان كام شهر هيبقو زمايلك
طالع انهارده مقفول من كتر ضغط و مجهود الشغل عشان اقابلهم صدفة ونتصور فيتغير اليوم
الناس دي تعبت كتير ربنا يكملهم على خير ويفرحهم كمان وكمان ونشوفهم اجمد خريجين عن قريب ...رمضان مبارك❤
من كتر الزغاريط انهارده فى لجنة اخر النهار بدأنا نعمل rating ليها واحنا قاعدين فى اللجنة
دى مكتومة شوية دى احسن فيها echo لحد ما نوصل للperfect زغروطة
ربنا يديم الافراح والزغاريط😂❤
الطف حاجة قابلتها انهارده وانا داخل الكلية وشايف الnewcomers واقفين مع اولياء امورهم وهما ماسكين الموبايل وعلى وشهم ابتسامة عريضة بيصورو اولادهم يمكن الصور متطلعش احسن حاجة بس دي بقا الصور اللى بجد نقول عليها "التقطت بعيون من احب❤"
اجمل لقطة انهارده بعد ما خلص اخر يوم امتحانات و اخر دكتور فى اللجنة قام مسلمني ورقته و بباركله لقيته بيقولى يعني انهارده اخر يوم مش هشوفك تاني يا دكتور خالد وقام واخدني بالحضن 😂❤ ببص حواليا لقيت باقي المراقبين و رئيسة الكنترول بيراقبو الموقف فى صمت وابتسامة عريضة
بمناسبة ليله امتحان اخر مادة فى الحياة الجامعية
كان امتحان مشتركة وحرفيا كل ربع ساعه نشغل اغنية منير "وخلاص فاضل تكة"
وبعدين تفتح سوشيال ميمز واحتفالات
والمادة بتبكي فى الزاوية لدرجة خفت المادة تضيع لكن كرم ربنا وتطلع اسهل امتحان ونجيب امتياز
انا عايز اعيد اليوم دا كتير 🤍
من ٤ سنين قابلت ست بسيطة عندها ٦٥ سنة فى عيادة بيطرية جاية بقطة شارع عندها عسر ولادة والست ممعهاش فلوس ... فتكون القطة دي سبب اني اتعرف عليها ست ربنا مديها قبول غير عادي... الحيوانات ما شاء الله تمشي تلاقي قطط وكلاب الشارع محاوطاها وبتراعهم وهي محيلتهاش حاجة......🔽🔽
Texts for memory
بمناسبة اخر سكشن و نهاية سنة كانت مليانة تعب بس كنت سعيد وفخور اني مع الدفعة دى هفتقدهم كتير ....اتمني ان ربنا وفقني وسيبت اثر طيب واتمني اشوفهم دايما ناجحين فى حياتهم ❤❤
العيد عندنا فى الكلية بيبقي فى اليوم دا من كل سنة
سنة خامسة بتتخرج و بقو زمايلنا و هتبدأ محطة جديدة فى حياتهم اتمنالهم كل نجاح وتوفيق ونشوفهم فى احسن الاماكن
وسنة رابعة بقو seniors الكلية وفاضل اخر تكة على التخرج ...الف مبروك للجميع❤
حبينا نوثق اللحظات دى مع بعض For memory❤
Some memorable texts from the first semester ❤
ربنا يديم فضله علينا وينفع بينا
ونشوف الدفعة دي زمايل وخريجين باذن الله اتمنالهم كل التوفيق والكرم من ربنا ويعينهم على الامتحانات اللى هما فيها دي ويخلصوها على خير ان شاء الله❤
تايم لاين مبهج لابعد درجة.... و العيد بقا اعياد على دفعات بيطري كلها مبروك النجاح ومبروك التخرج لدفعة خامسة واللى جاي دايما نجاحات ان شاء الله علينا جميعا❤
الكوتس مثالية وعاقلة و الحمدلله على العقول اللى بتفكر بالنضج دا بس الاهم الانسان يحط المبادئ دي قدام عنيه ميتغيرش تحت اي مسمي ويرمي اللوم على الظروف او الطرف التاني
"البدايات سهلة وبتلمع بس استمرارية المودة والحب مع المشاكل والضغوطات دا التحدي اللى بجد عشان الدنيا مش هتفضل وردية"
رغم اليوم كان مرهق بشكل بس فرحة الاجواء الرمضانية انهارده دي تنسي التعب
بركة الشهر الكريم بتظهر فى كل خطوة للخير ربنا يعينا على الطاعات ويتقبل صالح اعمالنا
خطورة النعم فى انك تألفها وتتعود عليها فتبدأ تروح بهجتها وهيبتها وتتعامل على انها حق مكتسب بل وتسيئ استخدامها وتبدأ تدرك وجودها فقط لما تحس بخطر زوالها منك....فمتنساش تفكر نفسك دايما ان فى ناس فاقدة للنعم دي نفسهم بس يبقو مكانك فمتنساش تستشعر النعم وتحمد ربنا عليها "قولا وعملا"
موظف البنك الاهلى الكويتى بيتصل من رقم البنك يراجع معايا البيانات
راجع الاسم والوظيفة وتاريخ التعيين والعنوان
وبعدين اخر سؤال محل السمك اللى جنبكم بيعمل سمك حلو ولا لا خليه يزود تقلية شوية عشان السمك يطلع حلو والمكالمة قلبت ضحك😂
نوعية الروقان اللى نفسى نتعامل بيها فى الشغل💙
ليا مغامرات مع الشفوي عايزة ثريد لوحدها بس منها
كان شفوى البايوكيمستري قعد يسأل اللجنة كلها أسئلة عادية جه عندي قالي شكلك بتجيب تقدير ف انا عايزك تربطلي الدراسة النظرية بالحياة العملية قولي الست بتعمل شعرها إزاي عند الكوافير
خفة دم وحكمة متزهقش من قعدتها وكلامها وقصصها كل ما اكلمها لحد دلوقتي افتكر حديث "إن الله تعالى إذا أحب عبدا دعا جبريل،فقال: إني أحب فلانا فأحببه، فيحبه جبريل، ثم ينادي في السماء، فيقول: إن الله يحب فلانا فأحبوه، فيحبه أهل السماء، ثم يوضع له القبول في الأرض......."
اروق حاجة اليومين دول اني سايب المراقبة وبسافر لشغل الماستر بخلص الساعة ١- ٢ كدا واطلع كل مرة اقعد الف فى القاهرة غالبا بعمل ماجستير سياحى ناقصنى بس partner شيفت مسائى فى الحوار دا
بحترم اوي الناس اللى بتقدر ان الحياة مواقف وبالطول بالعرض كل حاجة هتعدي ومش هتفتكر من السنين اللى بتمر غير مواقف و ذكريات الناس دي معاك فمتنساش دايما تخليها
Good memories to be remembered
ربنا يلطف بمدرسين المواد اللى اتلغت .... فى مدرس فرنساوى كل مرة بشوفه فيها ضحك وهزار انهارده لقيته بيكلم نفسه وعايز يسيب البلد وحتى مش عارف يروح فين ...ربنا يصبرهم ويرزقهم من حيث لا يحتسبوا
الصراحة احنا لازم نappreciate اي حد قرر ينزل فى الجو دا
انهارده فى التدريب بتعامل بمنطق اللى هو كفايا ان انتم نزلتم فى الجو دا تعالا امضيلك اللى انت عايزه امضا فاتت او لسه مجتش او لحد مش هيقدر ينزل
و فى تكيف جوا المعمل وكراسي لو عايز تقعد شوية
ربنا يلطف بينا جميعا
التريند بتاع جروب Traveller Experience فيه كمية قصص ملهمة وعجيبة ينفع يتعمل منها اعمال درامية تحفة بس الجميل فيها انها كفيلة تطمنك ان نصيبك اللى شبهك وتستاهله هتاخده ان شاء الله ايا كان السيناريو او مدة الانتظار المهم فى الاخر ان ربنا يراضيك بيه
ربنا مبدع فى ترتيب الاقدار❤
الامتحان بيخلص والناس بتسلم
انا و حد من الشباب قاعد محتاس يثبت صح ولا غلط فانا اقنعه القسم شكله سالك ملوش فى الغلط اعملهم كلهم صح
-بس استنا افرض حد كان معكنن على الدكتورة وهي بتحط الامتحان فعملتهم غلط بردو وجهة نظر
-بس انا حاسسها شخصية طيبة كدا و دخلت تهزر خلاص اثبت على الصح بقا
مننساش بعض فى الدعوات لعل احدنا اقرب الى الله منزلة فيستجاب له
اللهم لا تخرجنا من رمضان الا وكتبتنا من عتقائك من النار
اللهم انك عفو تحب العفو فاعفُ عنا
جميل اوي لما بتتحري اقدار ربنا اللى مكنتش شايف نتايجها وقت ما حصلت وكان فى نوع من السخط عليها وبتسأل نفسك اسئله كتير ليه واشمعن انا لكن بيجي الرد عليها بعد فتره عشان تلاقي نفسك فى حته احسن مكنتش هتوصلها من غير الاقدار دي وتحمد ربنا انها حصلتلك
حاجة بسيطة فى الفعل لكن عظيمة فى رد الفعل
ايا كان الشغل او المشوار او الحاجة اللى هتعملها عود نفسك تستحضر النيه لله وتحتسب الاجر عند الله وبص على الانجاز و البركة اللى هتحل عليك والابواب اللى هتتفتحلك ....انت متخيل انت بتشتغل مع ربنا هتحتاج ايه تاني؟؟
بيفكرني بامتحان الباطنة كان واحد حاطط الموبايل وبدل ما يفتح الPDF داس بالغلط على الريكورد اللى فوقيه بتاع شرح الPDF والصوت كان عالي وبدأ الريكورد "انهارده يا دكاترة هنشرح موضوع ال......."
طالب ف خامسة كان عامل نفسه حويط وحاطط التليفون تحته عشان يغش ف امتحان 😁 احساسي انه كان معاه حاجه ويشاء القدر ان اللي يفضحه رنة المنبه بتاعه
طيب افصل المنبه قبل ماتدخل 😅😅
دور برد مخليني مش شايف قدامي + ضغط شغل مفيش بعد كدا +tasks وreviews و امتحانات ماستر وقتهم ضيق جدا
نسأل الله اللطف فى اقداره وتعدي الفترة الجايه بكرمه وفضله زي ما بتعدي كل مرة