عندي جارتي متزوجة من 40 سنة وربي مكتبلهش يكونو عندها عيال ولا بنات امس توفت ,, ف الدفينه ف المقبرة ف مولود صغير عمره يومين متوفي دفنوه معاها ف نفس قبر ،، سبحان الله ربك حن عليها ف القبر
ليش معمر ما بنش جامعات ؟
عشر فردات بربع
ليش معمر ما بنش مدارس ؟
عشر فردات بربع
ليش معمر ما دارش مستشفيات ؟
عشر فردات بربع
ليش معمر مادارش ملاعب ؟
عشر فردات بربع
ليش معمر ما دارش بنية تحتية ؟
عشر فردات بربع
ليش معمر ماوفرش مساكن لناس؟
عشر فردات بربع
_حافظين حفظ
خطرها ع موضوع الخيانة المطروح وان روان بن حسين جميلة وراجل ليبي خيانة ف دمه !
جدّي وحني الله يرحمهم قعدوا مع بعضهم 50 سنة او اكثر وجدّي لما يكون عند حد ويبيهم يكلموا حنّي يقوللهم كلمولي
“ رفيقتي "
تي شن تحكوآ انتم
اليوم ف السلماني مدرسة فتاة الثورة ف كوبري مشاه مقابلها وكوبري هضا يستغلو فيه مفرخ ويجو يكحلو من فوقه ف بنات جوا مدرسة المهم زرقت عليهم شرطه ودرست شيله عند دروج متاع كوبري وقعدت اتعبي فيهم
واحد دبه بشدوقه قعد يعيط ويقول
ورس حفتر لا 😂😂😂😂😂
خاطري نعرف شن فيها من جو لما تشفط ع حد يكتب ف كلام او حروف غلط وتقعد تمهزل بيه وتقول عليه جاهل !
انت تندري ع ظروف حياته تندري شن صاير معاه ف دنيته عشان مش مكمل قرايته او يكون راقد ريح ومن هوا صغيّر يخدم عشان يساعد هله !
وخطرها عندي جاري ميعرفش يكتب وكلامه غلط وثروته تشري مدارس
عندي صاحبي زمان ف بداية جامعة مكبد ع وحدة بطريقة غريبة ويشوف فيها مراته يوم لي اشجع وقرر يمشي يدويلها بعد قاللها انا معجب بيك قالتله آمشي يا مجعك !
المجعك هضا ايام جاية خاش ف بطولة ليبيا لكمال الاجسام ،،
الزبدة ان ممكن كلمة تعطيك حافز مدي الحياة مع كرهك للي قال الكلمة ولحظتها .
عندي صاحبي حكالي حاجة غريبة من خمس سنين هوا كان يبي بنت وهيا تبيه !وبيخطبها البنت هذي ف يوم وليلة قفلت تلفونها وبعد فترة سمع انها ازوجت الغريب ان من خمس سنين مزال ف كل عيد ميلاد لها يدز مسج ع شفرتها وهوا عارف انها مقفل ،، قالي مرات ف يوم تفتحها تلقاهن !
معش عرفته حُب ولا غباء
انتفرج انا وامي ع تلفزيون قناة الحدث جابو واحد يغني ليبي اسمه صابر فارس يتعصر ويغني يقول خلاني بروحي وعدّه ،،
امي قالت اكيد بتخليك اتزعم الكبد لانك 😂😂😂😂
ف ولاية ف امريكا انقطع عليهم الضي 20 دقيقة اغلب محلات تعرضن للسرقة !
في ليبيا يصير ف بلاك اوت وظلام تام وميصرش شي !
الشعب الليبي : 1
الشعب الأمريكي : 0
ايام لي فاتن نلعب ف لعبة Pubg صدفت لعبت مع بنت ليبية واحد من امريكا واحد هندي ،، انضربت شوي قلت اسعفوني ازف ! قالتلي معلش الألفاظ قلتلها اسف معلش !
بعدها انضرب الامريكي قال اوو Fuck me شوي قعدت تضحك !!
بش تعرفوآ النوطره بس
فيه شايب عندي معاه دلاله حكالي مره قالي كنت نبي وحده ايام طياشي وسيبتها كنت شاقي بغيرها وبعد سنين واجد شافها ومعاها بناتها كبار قالي قلت عليها غنّاوه
سيّبتك وكنتِي اتريدي ،، ريدكْ الشّاقي بالحياة يا رِيدِي ،، واليوم نادم !
فاللي يحب حد ويبي حد يمشي يقوله خير ميندم كيف هالشايب .
في جو حقير انشوف ف اصحاب يديروا فيه لبعضهم لي هوا ! يقول لصاحبه كلمة توجعه قدام ناس برانيه وصاحبه اتبان في وجها الضحكه الصفره و يقوله انبصر معاك كنك ما اتحملش ! صاحبك كان معاملتش زي خوك معناها منكش راجل وصاحب عيال
نحن شعب معروف ان ياخذ ف الامور بعناد وتسكير راس !
لما اتجي تخاطب النّاس ف صلاة جمعة ع شي انت تشوف فيه غلط وبدعة حاول توصللهم الفكرة بأسلوب يقتنعوا بيه ! مش تكلمهم بأسلوب وكأنهم خرجوا عن ملة الإسلام بسبب عصيدة ؟
حتي خطّاب مساجد ف ليبيا تبيلهن اعادة تأهيل
شرطة الاداب العامة كان يمشوا استراحات سي فرج وعمارات داقادوستا لي مليانات عهر حقيقي ودعارة خيرلهم لكن حتي الجهات الأمنية في ليبيا ياكلو ويقيسوا ويعرفوآ لمن يجو للي معنده حد بس .
صديقي الشاب حط ف بالك عمرها ما حتنعجب بيك وانت اتدزلها ع برنامج سايت والكركوس ولا مش عارف شن اسمه اقتحم الـ DM اقتحام الاسود ويا صابت يا خابت والله الموفق 😂
خالي عايش ف طرابلس وعيونه ميشوفش كويس و زوجته ديما هيا لي تسوق بيه ،، مره واقف ف زحمة درس جنبه واحد دروحه ملتزم قاله مدامك عايش ليش تخلي ف مراه تسوق ! رد عليه قاله ان شاء الله تقعد زي حالتي توا تعرف ليش هيا اتسوق !
طبعا نوع هضا من ملتزمين لو كنت انت مش مسلم حيكره اهلك ف اسلام
عزيزي الشاب لي تجي اتدرس ف شارع دبي وتفتح شنطة السّيارة وتقعمز فيها وتقعد زاقب وتكحل فلي يخطمن !
هل ف تفكيرك ان حتخطم عليك ايمان وساره وحيقولن اووو مايقاد ما هذا البطل الذي استطاع ان يجلس هكذا !
تي اشقي بحياتك يا حكيه
عندي خالتي تسكن ف القبة اليوم صبح دزلي ولدها رساله مكتوب فيها " السيمنار " متاعي يوم 10.10 خلي عندك علم !!
انا قعدت نرن عليهم خارج تغطية نحساب السيمنار عملية خطيرة طلع حفلة تخرج يقولو عليها سيمنار الله يسمرن مصارينه 😂
جماعة لي يؤيدوا في القذافي حطوا قنوات الأمارات وتفرجوا ع عيدهم الوطني شوفو شيخ زايد شن دار لبلاده شوفو ناس كيف مزالت تذكر فيه بالخير لعند اليوم ويحتفلوا بإرادتهم مش غصباً عنهم يكروا فيهم من اعمالهم ! احتفلوا بالانجازات مش مش الاشخاص .
البنات مرات تقعد تشوف ف روحك مفكش ميزة ،، بس هنا يدققن ع حجات تفاصيل التفاصيل
يعني ممكن وحده تحبك ع شي تافه زي وذنك اليمين اكبر من اليسار ومرات تحبك عشان شافت صبع كراعك الصغير جميل التفاصيل هنا لي يفرقن معاهن مش شعرك لي تستشور فيه يا باتي 😂
ف وحده تقربلنا شكلها شايفتني ع تويتر هنا مهم تهدرز مع امي قالتلها أحمد ولدك نشوف فيه يسب ويفلم ع تويتر
قالتلها ما فلم عليهم وسبهم الا وهما يستاهلو !
امي تحساب التويتر لقب حد مش برنامج ع تلفون 😂😂😂
هيا دوا دوا
انا شاركت ف فبراير وشاركت ف الكرامة ضد الدواعش
يعني لما اتجي اتقولي انتم لي شاركتوآ في فبراير جبتوا الدواعش للبلاد حنرد عليك انقولك انا جبتهم وشاركت ف تحويلتهم !
انت شن درت يلي تبي القذافي لا حاربت معاه بش قعد ف الحكم لا حاربت ضد الدواعش لي جو بعده لذلك هاك 🎈
معلومة
معندش مشكلة مع اليهود او اي ديانة ف العالم كل حد حر
بس لازم تعرف انت الفرق بين اليهودي والصهيوني
اليهودية هيا ديانة سماوية نزلت ع سيدنا موسي عليه السلام
اما الصهيونية هيا حركة سياسية لتوطين اليهود ف فلسطين باحتلالها وقتل سكانها
يعني متحطش علم صهيونية وتبي ناس اتحبك
شلت أمي لمحلات ف شارع فينسيا كل متخش محل اتقول سلام عليكم بلابل لي ف محلات ميردوش ف سلام مهم بعد رابع محل قالتي هوه شيلني للمحلات مناطق شعبيات هضيما عرب حتي الاسلام مش واصل فيهم ميردوش ف سلام 😂
مزال في محمضين يكتبوا زمان تويتر كان اجمل وجو هضا ؟
النّاس هضيما راقيلهم ان لي خشوا بعدهم ع تويتر كلو عليهم الجو فيغيب بالكم شهر ويخش تويتر عشان يكتب يوم من ايام تويتر 2014 وتوا معش فيه جو !
والحقيقة ان هوا لي مفش جو لان يتابع في ناس فهمش جو تابع ناس فيهم جو ياعيني ع بالالاو🚶🏻♂️
عنجد نخش لوحده ع برنامج سايات ونكتبلها نعليا منك ولا عاجبتني ولا نقوللها ننقنك سمحة !
لي تعجبك اقتحمها يا بادلاتك شعور يا اما خبطاتك ف ساس وف الحالتين كسبت نفسك وثقتك ف روحك مش تدز ع سايات جو حمام زاجل هضا فكونا منه
في صاحب صيدلية منزل فيديو لشخص جا خذا منه ادوية وطلع بدون ميسلكه ومشهدر بيه !
توا حقير زي هضا ميحسش بالناس بعيد ع تصرف الشخص لي مسلكش هل لو انا سراق بنجي نسرق دواء في ناس تحت خط الفقر ومدارش هكي الا ان معندش حتي ربع ولو بيسرق يسرق شي يسوي مش دواء وتفضح بيه .
بنغازي لاعب فيها غسيل الاموال لعبه شينة !
اراضي اسعار فلكية ينباعن معارض سيارات بالسنة ميبيعوش وعادي سلسلة محلات بنفس ماركة ونفس مالك ف كل مكان بشكل مريب وتشوف محلات مفش اقبال كبير عليهن ! مهم تصرفوهن ع كلاويكم ان شاء الله رزق الحرام
توا البنت لي تخش قروب بنات بس وتنزل صورة شاب وتكتب من تعرفه وتفتح مجال للي تسوا ولي متسوش تحكي عليه !
هل ترضي ان لو شاب هضا وصله خبر ان ينشر صورك في قروب وينشد عليك !
مش تبو مساواه !
45 ألف كلب وكلبة طلعو ف ازدواجية التعيينات في كم مؤسسه ف الدولة 45 ألف حارمين غيرهم من شباب وبنات وكل حد تقهر فيه الحياة ومش لاقي شغل حسبي الله ونعم الوكيل في كل حد ياكل ف زقوم والحرام وتلقوهن ف صحتكم وصحة عيالكم .
لي يدورك لما يبي منك مصلحة او شي متعاملش ان انسان مصلحجي عامله بأصلك لو انت قدع وصباي مش حترده لو انت عيّل ونقصي حتعامل معاه بنقص فخليك خدوم واخدم الناس وانسي مش ضروري يكون في مقابل .