هل استخدمتُ في كتابتي عنه تعبير "عليك تتكيء الحياة"؟
لا أذكر بالظبط، ولكن أذكر اللحظة التي حذفت فيها الإشارة لهذه القصيدة في الكتاب:"قد كنت أمس، عليك تتكيء الحياة". أذكر انقباضا خفيفا للقلب وأنا أقرأ سطرا كتبت فيه "قد كنت أمس" وأحذفه على الفور.
نسبة المشاركة في استفتاء اللجان الفاضية والكراتين والبوليس اللي بينزل الناس من المواصلات علشان يروحوا 44 % يعني أكبر من نسبة المشاركة في استفتاء مارس 2011 في أعلى وقت مشاركة سياسية وكانت 41 % !
كل مرة يحاول فيها يثبت لنفسه وللناس إنه ديكتاتور تاريخي محبوب، بدل ما يرضى بدور الديكتاتور الموظف المتواضع زي مبارك، فيثبت أكتر وأكتر قد إيه هو رخيص واللي وراه ناس أرخص وكل حاجة بيعملوها بتبقى مثال ونموذج تاريخي للرخص.
بعد ما سمعت دلوقتي مكالمات "النقيب أشرف الخولي والإعلاميين" أكاد أجزم إن اللي بيتكلم دا وعامل نفسه نقيب هو واحد من إخوان محافظة الشرقية وممكن بعد شوية أقول لكم اسمه لو أسعفتني الذاكرة بأسماء اللي كانوا موجودين في معسكر شباب الإخوان في بلطيم سنة 1998.
السبت/أول يوم استفتاء/ لجنة في المعادي:
- أنا لجنتي في امبابة ممكن أصوت هنا في لجنة الوافدين.
- لا ما ينفعش.
الاثنين/ آخر يوم استفتاء/ نفس اللجنة في المعادي:
- أنا لجنتي في امبابة ممكن أصوت هنا في لجنة الوافدين.
- إن شالله تكون في المريخ، كله ينفع هنا.
أتمنى الأتراك ما يعلنوش التفاصيل والأدلة في قضية خاشقجي كلها في وقت واحد، واحدة واحدة على فترات علشان نستمتع ونتشفى في المجرمين وهم بيجتهدوا كل يومين كمؤلفين روايات رخيصة في التبرير ويضيفوا أكبر كم من المادة لتاريخ المسخرة.
شكرا لفريدة
@farfar_w_awlado
ولنادين
@nadineyosry
على دعوتهم لمناقشة "غرفة ٣٠٤" امبارح على Twitter space وشكرا جدا لكل ال شاركوا، كانت تجربة ثرية بالنسبة لي. تابعوا عندهم تصويت اختيار كتاب المناقشة الجاية، أتمنى يكون الكتاب الحبيب "كلبي الهرم كلبي الحبيب" لأسامة الدناصوري.
هل حد تاني حاسس زيي إنه على العكس مساحة وتعبيرات القبول للمثلية والمثليين بتزيد وبتوسع، أو على الأقل مساحات التعبير اللي بتسجل اختلافها بس بترفض الهجوم العنيف؟
ترند علاقة عصير القصب بصوت ياسين التهامي وهو طالع من كاسيت محل العصير وبيقول "أكاد من فرط الجمال أذوب" من ألطف الحاجات اللي حصلت على السوشيال ميديا، والفيديو دا أخد الترند في منطقة تانية وذبت من فرط الجمال والحنين لعصير القصب ورغوته.
كل اللي بيحصل مع وبسبب آل الشيخ في مصر مخليني بس عاوز أقول، بدون الدخول في النقاش لأنه ما بقاش فيه نقاش، إن الوضع بقى رخيص وتافه بشكل بيزداد فجاجة وحقارة وكل اللي بيأيديوه وبيبرروه وبيلتمسوا له العذر ناس رخيصة وتافهة. يعني حبيت بس أؤكد على احتقاري لأني بقالي أسبوعين ما عبرتش.
ملخص ما لم يقله أردوغان مباشرة: لن نكتفي بالتضحية بالمنفذين في قضية خاشقجي ونترك المخططين من "أعلى السلم"، وهاتوا المتهمين يتحاكموا هنا في اسطنبول لأن ما ينفعش المجرمين الحقيقيين يحاكموا المنفذين ويفلتوا هم، وشايفك يا بن سلمان ومش هاسيبك تفلت منها بالبساطة دي.
إزاي سايبين في السينما فيلم The Post ال بيمجد حق الصحافة في نشر معلومات شايفاها وزارة الدفاع أسرار عسكرية تمس الأمن القومي؟
فين البهايم المسئولين عن منع الحاجات دي؟
النائب #أحمد_الطنطاوي بجلسة اليوم: كل ما نقوم به الآن في مجلس النواب قولًا واحدًا هو باطل دستوريًا.
وأذكركم بقول الخال: "ومصر عارفه وشايفه وبتصبر لكنها في خطفة زمن تعبر وتسترد الاسم والعناوين".
"هل هناك نسخة من الحياة لا تشعر فيها أن شيئًا ما مفقود؟
هناك دائمًا شعور بالفقد؛ لأنه ببساطة شعور صحيح، كل اختيار في الحياة يستبعد خيارات أخرى، الأمر بهذه البساطة، لا يمكن مراوغة الفقد، الحياة فقد متتالٍ، وامتلاك مؤقت".
بلال علاء، "عم نتحدث حين نتحدث عن الصداقة"
تويتات البرادعي عاملة زي ما تكون واصل متأخر في خناقة بقالها كتير ولقيتهم سبوا لبعض الأديان ورفعوا على بعض السلاح وسايحين في دمهم بس إنت محضر نفسك تبدأ كلامك ب:"يعني ينفع الكلام دا؟ إنت عاوز تتخانق يعني؟". فالنتيجة الطبيعية لأنك لسه مش عارف "مين أين نبدأ؟" إن الطرفين يهزأوك.
شكرا لفريدة ونادين على الدعوة اللطيفة لمناقشة الكتاب بكرة-الأربعاء ٩ مساء بتوقيت القاهرة هنا على تويتر، تابعوهم بكرة هاينشروا اللينك للي حابب ينضم للمناقشة.
@farfar_w_awlado
@nadineyosry
جماعة، عارفين مين حييجي space مناقشة كتاب "غرفة ٣٠٤" بكرا الساعة ٩ للكاتب عمرو عزت؟
بضبط كدة👏🏼 الكاتب
@AmrEzzat
يا ريت اللي حيحضروا المناقشة، كل مشترك يقدر يتكلم في ٥ دقايق فرتِبوا اللي حتقولوه قبل ما تيجو عشان تبقى space منظمة 💚
ححُط تحت التويت دي إزاي حنظم الspace
فيه تقارير عن لجنة من غلمان عبد الفتاح من شباب الأحزاب ال شاركوا في منتدى شباب العالم وباركتهم الأجهزة الأمنية علشان يتم تأهيلهم ويكونوا خصيان المستقبل في الحكومة وما يعرف بالبرلمان. فيهم واحد اسمه عمرو عزت، حبيت بس أنوه وأؤكد إنه مش أنا وإني حسيت بالإهانة من مجرد تشابه الأسماء.
الحماسة اللي بتجيلي لما باسمع صوت المعلق عصام الشوالي اكتشفت إن جزء كبير منها بسبب إن صوته بيفكرني بصوت الراجل التونسي الشهير صاحب الفيديو التاريخي "بن علي هرب".
بيان حاد من هيئة كبار العلماء في الأزهر. مصادر صحفية نقلت إنه صدرت تعليمات للصحف الكبرى بتجاهل البيان والاكتفاء بنشر بيان دار الإفتاء. وفعلا تم تجاهل تغطية البيان من جانب عدد من المواقع أو تم حذفها بعد نشرها من على مواقع عدد من الصحف منهم اليوم السابع.
"كونوا واقعيين واطلبوا المستحيل"
شعار انتفاضة طلاب باريس 1968 في اعتصام ميدان التحرير 2011.
"الشعب يريد إسقاط النظام"
شعار الثورات العربية في تونس ومصر 2010 / 2011 في احتجاجات باريس 2018.
قاعد في كافيه وماتش شغال ومش واخد بالي مين بيلعب ولقيت كل الناس بتشجع فرقة اسمها برمنجهام. قلت سبحان الله أنا جيت كافيه مخصوص بتاع جماعة سرية بتشجع برمنجهام ولا ايه، بس فهموني ودلوقتي قاعد باشجع معاهم برمنجهام بكل حرارة وعلى أعصابي.
دلوقتي الشباب الثوري اليساري الحالم المراهق شمامين الكلة عارفين حدودهم وبيتحركوا بحساب بينما الجنرالات الفيالق قادة الأركان كل واحد بيجيب مصمم جرافيكس وبتاع سوشيال ميديا ويعملوا صفحات على فيسبوك وتويتر وجايين عاوزين يحكموا وبراءة الأطفال في عينيهم.
"في مديح اللاشيء"، أجمل فيلم في العالم، لقطات خلابة من 62 مصور في 62 مكان حول العالم كخلفية لصوت اللاشيء وهو بيحكي عن نفسه وعلاقته بالعالم، وهو بيتمرجح بين الجد والهزار والأسى والبهجة والشاعرية والقلش. متاح بترجمة عربية.