حبيبتي وروح قلبي لما كنا أصحاب مكنتش بتحرج أقولها مش معايا فلوس تكفي نخرج أو نروح مكان فانسي، ففي مرة جبنا ترمس وقعدنا نتمشى لحد طلخا ورجعنا للجامعة مشي، عمري ما كنت بتحرج قدامها، كنت بقولها ما بعرفش أرتب كلامي وأتكلم بشكل كويس غير معاها ❤️
البنت اللي صورت تحاليل مريضة ونزلته بكل بيانات المريضة مسحت التويت بعد ما خافت وغالبا قفلت الأكونت،
قوم حد خد سكرين من التويت ونزلتها بيقول لو حد يعرف مكان شغلها يروح يبلغ عنها،
وناشر
نفس
بيانات
المريضة :""""""""D
واحد كان بينده على ميس انهاردة فعمال يبسبس ويقولها بسسسسس فهي تجاهلته ولما ردت عليه قالتله فيه حاجة اسمها ميس
ففيه ميس تانية معدية رمت إفيه "فيه حاجة اسمها بوج" ومشت وأنا صوت ضحكتي كان مسمع لآخر الدور :"D
عمري ما كنت أتخيل إني أتقدم قبل ما أخلص فاينال سنة ٦، ولا هجيب الفلوس منين للشبكة، ولا هعمل إيه في يوم الخطوبة، وكل ده في سنة ما كانت الكورونا قافلة العالم كله،
يوم ما روحت أتقدم جدول النسا اتقدم أسبوعين بعد ما كان شهر وكنت هعيط اليوم ده،
كان أحلى اختيار في الدنيا، وعدت سنة ❤️
اشتغلت حالة من أكتر الحالات ال miserable من ساعة ما بدأت أشتغل طب،
المرض وحش أوي، والفقر أوحش، والأوحش لما الاثنين يبقوا مع بعض
ربنا يحفظنا وحبايبنا يا رب
موضوع إن فيه ناس في الهيئات الصحية والمؤسسات العلاجية الطبية بييجوا ويمشوا الساعة ٢ بيمروا على لبسنا/حاجات جودة/رمينا الورق في الكيس الأسمر ولا الأحمر في حين إن المستشفى مفيهاش أبسط أساسيات العلاج زي المشارط لحد حاجات life saving زي قساطر تسليك الشرايين، أجدها حاجة مضحكة جدا
ممتن جدا لتدبير ربنا والصدف اللي خلتني أقابل نوران ونبقى أصحاب، ونحب بعض، ونتجوز، كل يوم بقول الحمد لله على وجودها في الدنيا وعلى كونها أرق وأجمل إنسانة ممكن تشارك حياتي،
حبيبتي الشهر ده سوا كملنا سنتين جواز، كانوا أحلى سنتين في حياتي كلها
كل سنة وهي طيبة، دايما طيبة يا رب ❤️
نوران أكتر حد في الدنيا شوفته بيحاول، شوفتها وشاركتها محاولاتها -الكتيرة جدا- في تراكات مختلفة؛ في الدراسة والشغل والعلاقات والدين وحاجات تانية لا يسع المجال لذكرها، وكل مرة وكل يوم وشهر وسنة بيعدوا بشوف قد إيه هي بتكبر وبتحلو يوم عن التاني، وببقى مبسوط وفخور إنها شريكة حياتي ❤️
زي انهاردة من سنة، تحديدا من سنة وساعة، كنت طالع من بيتنا عشان أقابل بابا نوران عشان أتقدملها، بعد شوق ولهفة والكثير من التوتر اللي اتحول لفرح ودفء وسعادة لما لقيت قد إيه البيت ده جميل ❤️
- خطبت البنت اللي بحبها وبدأت تجهيز في شقتي
- بدأت أشتغل وأتعلم أكتر في الطب
- إلى حد كبير رسيت على التخصص اللي عايز أكمل فيه وربنا يتمها على خير ويجيلي
بمناسبة مرور تقريبا سنة على بدايتي للشغل عايز أقول إني استحالة كنت عملت كدة من غير دعم ماما وبابا، لمدة سنة تقريبا ماما كانت تعمل الغدا وبابا يجيبهولي ف المستشفى في تقريبا ٣ أيام ف الأسبوع
Couldn't have done it without their support والله ❤️🥺
أقل من شهرين على فرحي وبجد مش قادر أصدق إزاي وامتى وصلت للي أنا فيه غير بتوفيق ربنا وتدبيره -فإني لم أكن أحسن التدبير- ودعم أهلي وحب واهتمام ودعم أحلى إنسانة في الدنيا aka عروستي المستقبلية ❤️
ترتيبات الخطوبة ويوم الخطوبة ده عدى بستر ربنا في كل تفاصيله ليترالي :"D
يوم الخطوبة كان بتمطر سيول حرفيا لدرجة الميكروباص اللي سافرنا بيه أخدنا من سلم بيتنا لعتبة بيت نوران،
ويومها هويدي اتشقلب على محطة القطر :"D عشان ناخد صورتين في عز التلج وطلع بالسيشن الفشيخة دي ❤️
زي دلوقتي لما بسافر لشغل في الفجر ببقى قرفان ومش عايز أسافر وببقى خايف من غير سبب واضح، وكنت دايما بستناها تصحى الفجر عشان تطمن عليا وتطمّني، كانت بتبقى حاجات بسيطة زي هل لحقت القطر؟ لقيت كرسي؟
بقالي سنتين وجودها في الوقت ده بيطمني، وانهاردة لسة مستنيها تصحى تطمن عليا وتطمّني :)
A year ago I used to wake up alone in the middle of the night and travel this road to go to work, today I get to wake up next to her and hug her goodbye knowing that she'll be waiting for my return,
ما أكرم الحياة ❤️
- يا دكاترة مينفعش التأخير في اختيار ممثلين الجامعات ده كدة هيأثر عليكم بالسلب ومش هتعرفوا تتكلموا مع الوزارة في احتياجات الزمالة أو أي مشكلة هتقابلكم، ما تخلوش انشغالكم بالامتحان التجريبي بكرة ينسيكم اختيار الممثلين.
= فيه امتحان تجريبي بكرة؟
عيان غسيل لو ما اتفتحش انهاردة بنسبة كبيرة دراعه هيتبتر وأبوه مش معاه غير ٣٠٠ جنيه ومحتاجين لوازم أساسية عشان يدخل عملية والراجل بيقولي طب هعمل إيه يا دكتور والله مش معايا غير دول
ولما وفرناله المستلزمات وشوية فلوس واتبقى معاه ٢٥ جنيه راح مطلعهم عاوز يرجعهم لينا، والله كنت هبكي
جات حالة فيميل للطوارئ بتشتكي من أعراض ما،
أخدت هستوري وبدأت أعالج،
قعدت أسجلها في الشيت،
جه التمريض بيسألني: دكتور هي الحالة دي سايك...
وبدون أن يكمل الجملة بصلي وقالي: آسف يا دكتور أنا عارف إنك ما بتحبش الكلمة دي، هنعمل للحالة أي حاجة تانية؟ :D ❤️
شعور غريب ومطمئن ودافي إني راجع أعمل نفس الشغل اللي كنت بشتغله قبل ما أتجوز، بس المرة دي مش زي فترة الخطوبة اللي كنت بشتغل فيها عشان أجهز نفسي ونبقى سوا ولكن عشان مراتي مسئولة مني ونعرف نعيش وأبقى جود هاسباند والحاجات الجميلة دي :"D ❤️
الحق يقال أنا مش بستصغر ولا بتفه من الدور ده ف العموم، بس ما يبقاش طلعان عين اللي خلفوني نزول وطلوع وجري عالعيانين عشان رجله ما تتقطعش وتقابليني في الأسانسير تقوليلي الاسكراب اللي حضرتك لابسه ده يدكتور شبه اسكراب العمليات يا ريت تجيب لون تاني