لي ثلاث ايام حزني ماغفى
مثل ذنبٍ تفزعه صحوة ضمير
ليت لي دمعٍ يجود بما خفى
وليت عمر الحزن بضلوعي قصير
كل شخصٍ لو تظاهر بالوفا
لا تحْسب إنه مع جروحك خشير
يكذب اللي قال لك مرة افا
كيف تحزن وانت في وسط النظير
ويوم خيم حزنك وليله ضفا
ما صفا لك غير دمعك والزفير
اغلب الاعراض اللي ذكرت في هذا الفيديو هي من اعراض القلق والاكتئاب واللتي يجهلها الكثير وللاسف يتم التعامل معها على انها عين مما يؤدي الى ضياع الوقت على المريض وتركه يسير خلف هذا الوهم معتقداً انه في الاتجاه الصحيح!
مسكين محْدٍ يحتريه!
اقفى يجّر الحزن
وجيوبه تصافحها يديه
كانت عيونه في بلاط الارصفه
تحْسب خُطاه وترسم بدربه وجيه
وجيه صفراء باهته
احباب لكن ضيعوه
وكان الشتاء ضيفٍ جديد
وطاحت على وجه الرصيف
نْقوش حبات المطر
وصار الطريق كله سفر!
وكل ماصدف رجله حجر
من الضجر
يركل ملامحهم بعيد!
لو كذبت وقلت احبك وصدقتك ..أنا
في ضلوعي لك شعورٍ عجزت اصدقه
آه من ظلم الحبايب ومن طول العنا
كيف قلبي من بعدْهم بهده واطلقه!
واهني اللي من الحب قلبه ما انثنى
حظ عين اللي تعداه طيف .. ولا لحقه
أعذريني لو تهربت من حبك .. هنا
كيف احقق حلم قبلك عجزت احققه
مثل الخريف انتي
وانا . . مثل الشتاء!
تشب في صدري بروق
واطيح بيدينك وفاء
وانتي يدينك شاحبه
صفراء يغطيها الجفاف
وتلعب بها ريح الجفا
قلتي: الشتاء بارد . . صحيح
لكن ترى ظنك خطأ
لولا لهب نار الوله
ما عاش في صدرك دفا!
#صالح_السكيبي
جيتي مثل عطرٍ قديم
ذكرى مضت
هبت نسيم!
مرت بلحظة خاطفه
جيتي هدوء
ولا سبقتي عاصفه!
كنتي وهم
مايشبهك حتى الحنين
ولا يشبهك حتى الندم!
وانا اللي من بعدك اعيش
اقسى فراغ وعاطفه!
لو اعرْف اوسعه صدري ترى ماجيتك
كيف عاد اشرح لك اللي منّك مضايقني
خل صكات الزمان وحزني وتشتيتك
الزمن ما قصّر بحقي معك لوّعني
وخل غلطة عمري اني جيتك وحبيتك
التفاصيل الكثيرة شرحها يوجعني
قل لي انك عفتني واني بعد مليتك
بس حاول وقتها ما تغْلط وتجرحني!
@Jowhara8_
@albadr
@7sainaljassmi
بالفعل عمل جميل جداً ومكتمل العناصر من حيث ذكاء اللحن وعذوبة الكلام وجمال الاداء والتوزيع، انترو آلة الهارمونيكا عجيب جداً وفي مكانه الصحيح👌🏼
حكيك طلع كله كذب
و عذرك بعد واهي
لو صدق نسياني صعْب
ماغبت عن ذاك الهدب
وعن طرْفه الساهي!
لا تْصيح ياناي القصب
مانامت اوجاعي
هذا اللي حبيته انا
وهذا اللي ظنيته انا
ماهو من اشباهي!
من قطع مسباح فكري وانا اعدّ خرزه
من حضر في بال صمتي وانا ادور حكي!
من خذا للبعد خنجر وبالصدْر غرزه
منهو اللي يحْسب انه اليا اقفى بشتكي!
منهو اللي عشّم القلب حب .. وفززه
يحسب انه لا تركني على غفلة ذكي
بقلعه من تربة الروح غصن .. وبركزه
رمح نسيان ورميته وانا اصلاً مرتكي!
خلك معي أسمعك ياهّم
مافيه داعي تناديهم
إجتاح صدري ولا تهتم
ولاتسأل الناس وش فيهم!
لجروحهم كنت ثوب وكُمّ
لاضاق هذا الفضاء فيهم
تقاطعوني كلام وذم
وكثرت عذاريب مغليهم
حلّق سماء و ارتفع ياعم
وش لك بتلويحة إيديهم!
إحساسهم لو بوجهه دم
ماخلوا الوصل يرجيهم!
ليت الزمن يرجع ورى
ماهو عشان الذكريات
ولاهو عشان اللي رحل
واللي مضى لي
واللي فات!
ليت الزمن يرجع ورى
واعيش في ذيك السنين
وارجع ماحبك
وافقدك
لأنك .. مثل قلبي أنا
والله ما تستاهلين
ما همني لو تزعلين!
ولو بلّ خدك مدمعك
ولا تفرحين
ماكان لك هذا الحنين!!
من قطع مسباح فكري وانا اعدّ خرزه
من حضر في بال صمتي وانا ادور حكي!
من خذا للبعد خنجر وبالصدْر غرزه
منهو اللي يحْسب انه اليا اقفى بشتكي!
منهو اللي عشّم القلب حب .. وفززه
يحسب انه لا تركني على غفلة ذكي!
بقلعه من تربة الروح غصن .. وبركزه
رمح نسيان ورميته وانا اصلاً مرتكي!
بلغ حـبيبٍ رحـل
إني عجزت أنساه!
وإني ادوّر له شبيه .. وْلا لـقيت اشبـاه
قل له تعـبنا ألم .. وكـم جـرح داوينـاه
إلا فراقه صعب
عيّا علينا دْواه!
وإني احـبه صـدق .. واحلـف بذات الله:
لو يرجع اسامحه .. رغم الذي ســـواه
أوآه من هذا الألم
ياصاحبي أوآه!
مسكين ماحدٍ يحتريه!
اقفى يجّر الحزن
وجْيوبه تصافحها يديه
كانت عيونه في بلاط الأرصفة
تحْسب خُطاه وترسم بدربه وجيه
وجيه صفراء باهته
احباب .. لكن ضيعوه
احباب .. واكثرهم نسوه!
وكان الشتاء ضيفٍ جديد
وطاحت على وجه الرصيف
نْقوش حبات المطر
وصار الطريق كله سفر!
ليت هذا الوقت ياقف على وجه الزمن
كان يمكن للندم فرصه ودمع و بكا !
لاتدوّر للحنين بمسافاتك وطن
كل غايب صار غايب على وضح النقا !
ودع احلامك ولا تطلب لعمرك ثمن
واترك الضيقه تحوّل لو أحساسك رقا!
أنا عانيت إهمالك وتقصيرك
أنا مليت من هذا الغباء اللي
ملا عقلك وتفكيرك
أنا مليت صمتك قبل أمْلّ
أكثر تعابيرك
نعم عانيت
صدق مليت
من تافه غلاك ولا أبي
شرك ولاخيرك!
كن الحكي لاظهر من مبسمك ينتظر
ثمانك تعض توتٍ عاصرته فلجه
ياليلة التيه من عشتك وشوفي شجر
ماغير طيفك على عيني يمر وهجه
ياديرة الحسن ياذاك القوام النظر
اللي اليا مر فارع كنه فيه عوجه!
ادري إن الحكي فضة وصمتك ذهب
لكن شلون عقد اللول ماله سنا!
ليه تخفيه .. حنا بس نعْتب عتب
وإن تضايقت نفدا ضيقتك كلنا
أنت لو تلتفت كل الأماني تهب
ولو تأشر نصير أنا وقلبي.. هنا!
ما طمعنا بتوت شفاك وإلا العنب
إبتسم مانبي غير إبتسامك لنا!
تقاعد هذا اليوم اخي الأكبر قدراً وسناً واستاذي وقدوتي #د_ضاحي_السكيبي بعد ما يقارب 36 عاماً حافلة بالعطاء والإخلاص في خدمة الوطن من خلال العمل في اروقة الخدمات الصحية اسأل الله ان يجعلها شاهدة له لا عليه وان يمتعه بالصحة والعافيه.
@dks4000