يا المجرب يمكن تغيب لكن ما تهون
رفقتك يوم الليالي علي متحالفه
دام حن حيين راسك على راسي يمون
لو دروب الوصل بيني وبينك تالفه
سولفو تجار بغضك وانا ماني زبون
لو يمر العمر وضعونا متخالفه
ابتدو باسمك وقاطعتهم قبل يحكون
ما قدرت انطر ونعم عقب السالفه
نهارٍ غثيره يرضي .. الخاطر الزعلان
لك الله كن الشمس بالغيم محجوبه
تخفّى بعضها فـ الغثير وبعضها بان
مثل بنت عودٍ يوم شافوه .. هلو به
عطوه النشاما منحر المجلس المليان
وهي تتقي من زحمة الناس في ثوبه
على كثر تقصيري معك يا سليل الجود
قل اللي تشوفه ينصفك لين تستوفي
لكن يعلم الله ما خذلتك وعندي زود
ولا ارتحت وان الحزن يقتات من جوفي
انا نادرً .. ما صف ريشه يـ ابو عبود
واحاوم لك العقبان فالغيم بكتوفي
معك لا تقيمني ظروف السنين السود
علي الحرام ان راسي اطيب من ظروفي
جعله فداً لك ياعشير الغانمين
رجلً يسنده الطمع ويحدره
صديقك اللي فالوازم ما يبين
جعل الدروب الواسعات تودره
اخيّر من وجيه الرخوم المترفين
اللي من الذم العتيق مغدره
وجه الفقير اللي تهمشه السنين
لكن .. مطاليق الرجال تقدره
عاد الوصل ذاك يلزم لزمة العاني
لا تحسب ٍالجفى بيمس له هيبه
كن الغلا يوم جاه الموت وصاني
ماينطحك في رجوعك كون ترحيبه
ترجع وارحب وتتركني وتنساني
وصلك مصيبة غرام وبعدك مصيبه
على كثر من تركني قبلك وجاني
يبقى رجوعك رجوع وغيبتك غيبه
كل ما حاولت فالدنيا تزين وعيت
ماذكرت الا ابن عمٍ سمعته لماعه
ودني .. لمناطح الدنيا بقلبٍ ميت
مرحبا ماهي بمن راسه مهي بطماعه
رح لبيت اللي يصبح مجلسه ويبيت
خل بيت محدد الساعه على ام الساعه
مابه جديد الا المشاغل والاسفار
الشعر .. خلاني وكمل طريقه
حتى الخيال اللي رسمتك به امرار
اصبح يسبب لي صداع الشقيقه
واليوم لو مرت جزيلات الافكار
ما طمعتني كان تبغي الحقيقه
ما عاد في شرد القوافي تذيار
توثلت مثل الظبا فالحديقه
منين ما ريت في عرض السما نوه
لوحت كن الضما والجوع غالبني
في صدري مخرفٍ لا ذهن يدوه
لبلٍ على بيعها المقسوم غاصبني
وادعني الصبر بين الضعف والقوه
وانا الشعور المزيف .. ما يناسبني
ماهوب متعبني ان الوصل متشوه
متعبني ان الجفى ما عاد يتعبني
طاح من صهوة اماله عريب الجدود
كيف راحت مراكيض الهقاوي هدر
اعذري وافيً خذه الزمن لـ الصدود
مثل ما ياخذ الدمع العيون بغدر
ارحلي من ردا الواقع وعجز الوعود
واسكني بين هاجوس ومحاني صدر
مستحيلة فوادي ما ورا الصبر فود
عيت توافق الدعوات .. لليلة قدر
العلوم عفاك يا سمح السجايا
اعتبر ماجاك من صدري عطيه
مد فالخطوه وكابر فالخطايا
طع شعورك في قدا ولا خطيه
ليه احثك بالوصايا والوصايا
ما بعد زادت على الماوا مطيه
يامرابيع صدري لو تشح مخبور
وجه ماضيك لو جارت ظروفه طويل
المشاريه يشطرها طويل الشبور
مثل ما يشطر المحتاج بيت البخيل
والسلام النبيه اللي حذفته عبور
ما نطرتك ترده جعل حالك جميل
لاني اعرفك انت وساكنين القبور
هجركم ما يجوز وردكم مستحيل
تحت دبرة الله راح كل الغلا نسيان
نجينا من سنين الغلا ذاك بعجوبه
ولا عاد طرا واقعي جفنه الكسلان
ولا وجنتيه اللي من الشمس منهوبه
تهمش تحت ضغط الليالي عزيزً كان
تهمش ثقيلات المشاغل لـ مندوبه
ما زال صدر العنا لا سولف يجيبه
ماحاسب الذكريات بذنب راعيها
كنه خوي السجين اللي يهذري به
له سيرةٍ كل مبدا مدح يطريها
يذكره ويمجده ويسولف بطيبه
ويلعن الساعه اللي قابله فيها
لابدنا .. نقبل الواقع وحن .. ساكتين
وانعيش كل احتمالات الجفا الوارده
مل الغلا من ضيوفه صار له ..ليلتين
مدري من الي من سلوم العرب طارده
والظاهر ان الغلا طاوع بنا الشامتين
قم .. خلنا نتركه لـ افكاره .. الشارده
من يوم جينا وهو جمبه علينا متين
ساكت وضوه رماد ودلته .. بارده
حتيش ياواهج القمرا على اول ظهور
عود تمالك شعورً كنت .. متمالكه
خل الليالي تجمل وابتعد ومعذور
لليالي العمر مثل العمر متهالكه
لليلً تصدع من غيابك تصداع سور
لو يكمل البدر تبقى ظلمته حالكه
ياما حسبت المسأله مسألة وقت
لين السنين بجورها .. فهمتني
على مطاليل اربعين العمر ..وقت
واحلام عشرين العمر فوق متني
لا ريحتني من غثاها ولا ذقت
منها نسر .. هي والله اللي كلتني
اعز واجمل من البسمه بحاجر حشيم
لا مر وجهك صحيبك يا عزيز الصحيب
ما غير الحزن صدري لين حطه هشيم
الحزن غير رحابة صدر الارض الرحيب
حتى الهوى اللي قبل فرقاك صوته وشيم
اسرف به الحزن لين اصبح وشيمه نحيب
من همهمات الوداع لصوت ترحيبك
راحت مع الوقت والنسيان همشها
نسوك حتى الطواري سجت اتجيبك
والذاكره ماتعرفك لين .. اغششها
حتى الشعر كل مـ اجبرته يغني بك
عطاني اردا البيوت وقال .. طرشها
يعلم الله علامة خير ما ايست لين
غبر الجو الارتق .. دون غاياتنا
يا ولد راحت الدنيا على العابدين
وش بقى من سوالفنا وهقواتنا
قسمنا من طفولتنا جروم السنين
زهرة العمر جانا الشيب ما جاتنا
يوم انا في مطاوي ريف قلبك لحالي
صعبها في سبيل رضاك يشبه سهلها
يا مجمل تفاصيل السنين الخوالي
لانطيع النفوس الجاهله في جهلها
عن الاشواق .. ما نقدر نعن الليالي
الليالي على الفرقا تهاذب بـ اهلها

انسني وان حط لسمي فالقفيا خانه
خلهم يقفون منت بما يقال معبل
صد منهم صدة العابد لا مر الحانه
وافتقدني كل ما التم السحاب وقبل
الخيال ارضك دع ارض الواقع لسكانه
واعتبر ذا البال لخطاك العزاز مسبل
انت تاج الماضي اللي يرمز لسلطانه
ما تفيد الحاضر اللي بالظروف مكبل
ياهاجس الليل عنك ويش انا ذاخر
ليه البطا وانت تدري ما معي حيله
يا مرحبا يا خوي الماضي الزاخر
ترحيبة العود بعيال اصدقاء جيله
تعال سولف علي بـ اسلوبك الساخر
خل الحزن ذاك تضحكني تفاصيله
الليله ان كان عندك لـ المطاف اخر
وصلني اخر مطاف احزانك الليله
يعود ذكرك من زمن عذب الاحلام
ذاك الزمان الي هله معه قفو
:
لك عشرتك ولا الهوى حفنة اوهام
عفيت يوم اهل الهوى منه عفو
:
البارحه مابين الاسماء والارقام
هنيت متخفي وهم ماتخفو
:
طفو لك شموعك وهنوك بالعام
رغم انني موجود كفو ووفو
:
ما شفتني بين التهاني ولانغام
انا الشموع الي حبايبك طفو
من حرب الايام مدري ويش انا قايل
بيارق العز بـ الخذلان مصبوغه
العدل قطعة سرابً مالها طايل
لو طال ذهن الحليم العاقل الزوغه
ما يقبل الميل رجلً ينطح العايل
وانا قبلته قبول البزر لـ الصوغه
من حورك اللي حدا صبيانها مايل
دون الحول طقتين ومن ورا الروغه
على عيدك مبارك تاقف امال انتظاري سيد
هي اللي كانها ما جات منك مالها شاغر
تمر الذاكره كنك شغف جدة ثياب العيد
شعورً كل ما كني كبرت اعود له صاغر
تلاعبك الطواري في خيالي واتهدا واتزيد
مثل ليعاب ذعذاع النسيم لـ ريشة الداغر
ابتدا فصل الحياه المتعب .. المتشابه
وانتها اكثر فصل حبيته وهو مشقيني
ما اقتنعت ان العمر عجّل .. وهج ركابه
لين عشت الواقع بروحي وشافت عيني
مادريت اني خلصت من الهوى واصحابه
لين صار الليل يجمعهم .. ولا يدعيني
اقرع اللحظات ويهج تاليها
من ورى القراع فيها تفلاته
كنها وضحً صدح صوت راعيها
لو ندهها والبحر بينهم جاته
صاحبي ما فيه حاجه نداريها
كان عندك حل غير الجفى هاته
السنين من الدلج خيرها فيها
وانت لحظات الفرح معك فواته
تبقى غريبً راح قدامه اغراب
مافيهم الي وادعه صدري بلوم
ملجا يتامً من لقا دونه احباب
يفرح معه ويطيح لرضاه ويقوم
مايستحق انك توادعه بـ اعتاب
ياقوم ياصوت المشاريه ياقوم
رح والكلام الي تدور له اسباب
خله عيونك قالته من كذا يوم
غلض النسيان دينه ولا برت
والليالي غصنها بالعنا ثاقل
يوم طاح العج في خاطري ثرت
قصة تكرم على مسمع الناقل
كل ما مرو هل الذاكره مرت
كنها عقب اللغو كلمة العاقل