يومكوا جميل… النهاردة قررت أبدأ خطوة بأجلها بقالي فترة و هي إني أبدأ أدرب يوجا… ياريت تعملولي فولو على الأكونت هناك لو مهتمين بمحتوى خاص ب ازاي نقلل من آلام جسمنا بشكل عام… ازاي نكون أشخاص هادية و نحارب الستريس بالتأمل و حاجات تانية كتير شبه كدا♥️
بالمناسبة، هل قولتلكوا قبل كدا ان مامتي اسمها دلال؟ و جدو الله يرحمه مسميها على أغنية أم كلثوم "الحب كده، وصال و دلال و رضا" ف عندي مامتي دلال و خالتو وصال و خالو رضا... كان راجل صاحب مزاج جدو دا و الله😂
عارفة إن لسة قدامي مشوار طويل أوي و لكن من فترة مكونتش أقدر أعمل حاجة بسيطة زي دي و حابة أسيب الصورة دي كتذكِرة ليا إني بتطور، حتى لو ببطء بس بتطور و أتمنالي تطور أكبر زي دلوقتي السنة الجاية🤸🏽♀️
لو حد كان قالي من كام شهر إني هقدر أوصل للوضع دا عادي و أبقى مرتاحة فيه، أنا كنت هقوله إنه بيسكتني بكلمتين و خلاص، الحاجات اللي جسمنا بيقدر يوصلها مع الوقت و التدريب ما زالت بتبهرني يوم بعد يوم و حقيقي بتديني دَفعة قوية إني أكمل.
ياترى امتى هتتخلص من رغبتك إن تكون مميز عند صحابك أو الناس اللي بتحبهم؟ امتى قلبك هيبطل يتكسر لما تكتشف انك زيك زي أغلب الناس في حياتهم؛ وجودك لطيف بس عدم وجودك مش هيفرق عادي؟
صاحية النهاردة بيتردد في دماغي آية "والكاظمين الغيظ" و قد ايه فعلاً فكرة إنك تكتم الحاجة اللي مضايقاك و تبعد شرها عن الناس و تحتسب دا عند ربنا هي حاجة كبيرة أوي و مش سهلة دايماً.
النهاردة فات سنة على جوازي و حاسة إني عايزة أدور على الناس اللي بتقول الحب بيقل بعد الجواز دي و أقولهم إنهم مش متجوزين أشخاص صح فالغالب عشان أنا كل يوم بحس إني بغرق في الحب أكتر و حقيقي حاسة إني أكتر شخص محظوظ في الدنيا عشان لقيت الحب و الحنية و التفاهم اللي لقيته مع شريك حياتي♥️
مشكلة كبيرة لما تبقى عارف إن أهلك بيحبوا نسختك اللي فدماغهم مش نسختك الحقيقية و أي ظهور لملمح من شخصيتك دي بيخليك تشوف نظرة إحباط/ عتاب/ لوم مع إنك معملتش حاجة غير إنك طلعت مختلف عنهم!
قاعدة مع ممرضة دلوقتي بتشتكيلي إنها كانت عند مدير الإدارة بتمضي منه ورقة ف بصلها من فوق لتحت و قالها "بتعرفي ترقصي؟" قدام سكرتيرة مكتبه و معرفتش ترد عليه عشان ميوقفلهاش ورقها و يخربيت الكسرة اللي ف صوتها و هي بتحكي و يخربيت الواقع اللي عايشين فيه.
هل كلكوا بتحسوا بالقليل من الإحباط لما تلاقوا حد قاطع مسافة كبيرة ف حاجة انتوا لسة بتخطوا فيها خطوات أطفال و بتحسوا إنه يااااه احنا بعاد أوي و لا دا أنا بس؟
عدت إليكم من جديد بإنجاز شخصي ليا، عارفة إنه السبليت سهلة عند ناس كتير و لكن كانت تحدي كبير ليا و لفترة كان عندي اقتناع ان أي تمارين مرونة بعملها مش هتجيب نتيجة لحد ما شوفت النتيجة بنفسي🥺🤸🏽♀️
فيه واحدة فالشغل مخبية إنها اشتباه كورونا عشان زي ما احنا عارفين اللي بيجيله كورونا أمه رقاصة!، ف جارتها جت الشغل و قعدت تلف ف كل أوضة و تقول "سمية عندها كورونا" بنفس أتيتيود i killed sirius black كدا😂
مش عارفة ليه افتكرت دلوقتي إني مرة روحت أزور الاكس و هو تعبان و أخدتله -هو و عيلته يعني- علبة شيكولاتة من لابوار ف قالي "الناس لما بتروح تزور عيلة، بتاخدلهم شيكولاتة من باتشي" و مش عارفة ازاي مأخدتش شيكولاتتي لأمي فالغيط و أنا نازلة، كانت هتفرح بيها و الله🥺
قريبتي اكتشفت إنها حامل في ٥ أسابيع، عندها الريدي ٣ أطفال و قاعدة تعيط عشان هي مريضة قلب، أعصاب و بتتعالج نفسياً، دكتور النسا الجميل بتاعها مش راضي ينزللها الجنين و بيقولها تجيب ورق من الدكاترة التانيين يثبت إن دا خطر على حياتها…
فيه شاب كاتب إنه خطب البنت اللي اعترفلها بحبه في ٢٠١٢ و ربنا يوفقهم طبعاً بس ازاي يا رجالة؟ يعني دا خيال علمي بالنسبالي، يعني ايه نفضل عارفين ناس من ٢٠١٢، لا و مش بس كدا؛ دا احنا بنحبهم كل هذه السنين و يكأن الكاركتر ديڤيلوبمنت معداش من قدام بيتنا!
أكتر رغبة قموصة عند الإنسان هي الرغبة فالنوم، مجرد ما تيجي و انت تتجاهلها و تعديها بتديك واحدة أنا اش هنا و ابقى وريني بقى هتعرف تنام ازاي و يا أنا يا انت الليلادي!
بحب أوي استكانة أم كلثوم و هي بتتكلم عن عيونه و بتقول أمروني أحب، لقيتني بحب و يكأن مفيش أي خيار تاني، مش هشوف عيونك دول ينفعوني و لا لأ، مش هسألهم ١٠٠ سؤال فالفيرست ديت عشان أشوف الموضوع هيمشي ازاي؛ لأ، هم أمروني بالحب ف خلصانة.
البنات احلوت أوي لدرجة ان الواحد تحول من شخص متوسط الجمال لشخص معدوم الجمال بس مش فارق معايا عشان يالهوي شوف البنات التانية حلوة ازاي يا أخي! تبارك الخلاق، سبحان الله، هولي شيت🥺♥️
كنت فالمستشفى و فيه حد جه مضروب و دماغه مفتوحة و طلعت مراته ضربته يوم فرحهم عشان بعد ما روحوا، قفشته بيكلم واحدة تانية و كان جاي عايز يعمل فيها محضر و ليلة كبيرة أوي سعادتك
بعد ما بدأت ألعب يوجا بفترة، جربت أعمل ال lift up دي و حتى مع وجود صف كتب تحت ايديا الاتنين، مكونتش بعرف أعملها و أقنعت نفسي إن ايدي أقصر من إني أعملها، لحد ما لقيتني حالياً بعرف أعملها عادي و اتضح ان المشكلة مش في ايدي، أنا بس كنت محتاجة أصبر و أتمرن أكتر♥️
أول مرة أسافر لوحدي بعد الجواز و لسة هروح دلوقتي و بجد إحساس رائع إني مش قلقانة يتنكد عليا لما أرجع عشان اتأخرت أو أفضل أفكر في تحويرة إنه يالهوي دا الطريق كان واقف و فيه حادثة… إلخ و اكتفيت إني بس طمنت حماده عليا و مروحة و أنا متطمنة و مبسوطة و حاجة كدا هعيط من الحلاوة/١٠🥺♥️
مبعرفش حد يسألني على حاجة و أرد كلمتين و أسكت، لازم أشرح تاريخ الحاجة بالتفصيل و استنى هدورلك عالنت على طريقة العمل بالظبط و بص خد التريك دي و مفيش معلومة مش هقولها و أتمنى الناس متكونش بتزهق مني🥺
حاسة كواليتي حياتي هتتحسن بشكل كبير لو أهلي راحوا لدكتور نفسي -الكلام دا خاص بيا أنا و بوضعي أنا و لو وضعك مختلف ف هنيئاً لك عزيزي القارئ، مش لازم تعلي عليا-
بعتبر أغلب العلاقات في مصر لونج ديستانس ريليشن شيب ف معنديش مشكلة مع المبدأ أوي بس اللي مش ممكن أسمح بيه هو اللونج ديستانس جواز! يعني ايه بجد بعد ما عدينا كل العوائق و اتقفل علينا باب واحد، ألاقيه على بعد أكتر من ١٠ سم مني! ايه التهريج دا!
واحدة طلبت تشرب من ازازة المياة بتاعتي ف
-أنا القديمة كنت هديلها تشرب و بعدها أرمي الازازة
-أنا الجديدة اعتذرت و قولت إني آسفة مش بحب حد يشرب من ازازتي
النتيجة: اتشتمت و اتبصلي من فوق لتحت و يعني قدامي سنة على ما أعرف أعبر عن رغباتي الصريحة تاني🥺
كنت عايزة أبعت ريسكي تكست و مترددة ف و أنا مروحة من شوية، فيه مكان الناس بتنزل فيه اسمه "الكرامة" ف لقيت الراجل ورايا عمال يقول الكرااااامة الكراااااامة كذا مرة كدا ف اعتبرتها علامتي و تراجعت عن التكست عشان الكراااااامة!
هل هعرف أتجوز؟ أبويا معندوش مشكلة يفني تحويشة عمره عشان يجيبلي حاجة كويسة -دا شئ مضايقني عشان دي فلوسه و اتبهدل عشان يجمعها حقيقي- بس عالناحية التانية خطيبي معندوش تحويشة عمر حتى عشان يفنيها في الجواز و مش عارفة أعمل ايه.
هل جربت عزيزي متعة الوقوف فالمطبخ لوحدك بالبلاي ليست بتاعتك؟ يعني أي حد بيقولي ارجعي المطبخ ببقى لايك حبيبي دا مكاني المفضل ف هرجع بس متجيش معايا بس🤸🏽♀️
عاحبني إن المسلسلات بقت بتركز على حتة إن بشكلٍ أو بآخر أغلب تصرفاتنا و دوافعنا و مشاكلنا و احنا كبار بتبقى نابعة من طفولتنا و في بلد الناس بتخلف فيها لمجرد فكرة الخلفة و عشان دي "سنة الحياة"، جميل إني فيه توعية و لو بسيطة إن دورهم بيفرق جداً ف�� إصلاح أو خراب أطفالهم.
أعتقد ال star gazing -الفُرجة عالنجوم- من الحاجات اللي لازم تقع في غرام أي حد بيعملها معاك أياً كان مين بس مجرد ما تنزل عينك من النجوم و تبص جنبك و تشوفه، هتقع في غرامه بدون مقدمات
زي أي زوجة أصيلة، روحت اسأل حماده ياكل ايه عالغدا؟ و زي أي زوج أصيل، رده كان أي حاجة ف لما سألت تاني قالي بصي، أنا هعمل أبلكيشن مش هياخد مني ١٠ سطور كود و نسأله السؤال دا و هو كل يوم يختارلنا الطبخة و بجد كان ممكن يفكرلنا في طبخة أسهل حقيقي!😂
صباح الخير
اختلف الناس على أحلى شعور و فيه اللي يقولك الحب و اللي يقولك الرضا بينما أحلى شعور موجود قدامنا منذ قديم الأزل و هو الاستغراق فالنوم و الراحة اللي بتيجي بعده لما نصحى
الانتظار من أتقل الحاجات على قلبي و لكنه بيزداد تُقل لما بيبقى انتظار من غير نتيجة مؤكدة، أنا منتظرة شئ مش عارفة هيحصل و لا لأ و مفيش في ايدي حاجة أعملها غير إني أفضل مكملة.
عايزة حد يتبناني كاريرياً بإنه يخططلي بالظبط المفروض أعمل ايه في مستقبلي و حد تاني يدعمني كاريرياً بإنه يقولي إني هقدر أعمل الخطة اللي اتحطتلي دي و أنا قدها و عايزة الحدين دول بقى يبقوا جوزي.
فقدت ناس حبيتهم و ناس حبوني و ناس كان فيه فرصة إننا نكون حاجة و لكن ظروفنا فالوقت دا مكانتش مناسبة، فقدت أشكال كتير من العلاقات بس مفيش حاجة بتكسر قلبي كل مرة قد فقدان صديق، معتقدش عمري أبداً هتعود على فكرة إنه اااه كنا صحاب امبارح بس دلوقتي منعرفش حاجة عن بعض ويكأنه عادي!
دايماً بستغرب الحاجات دي يعني أولاً، مش هتعرف تكمل النقاش عشان معندكش معلومة عن الموضوع و ثانياً، ايه الفايدة من صنع جسور كاذبة بينك و بين حد! مش عيب انك تقول "لا بصراحة معرفش، عرفني أو ابعتلي اكتر حاجات بتحبها ليه... إلخ"، دا هيخلق حوار و صلة ألطف و أصدق بكتير.
حضرت أكتر موقف مرعب دلوقتي و أنا بصور ورق فالمكتبة، لقيت واحدة بتصور قسيمة طلاق بنتها اللي مولودة ٢٠٠٢ و بعدها طلعت شهادة ميلاد حفيدها -ابن البنت دي- تصورها بالمرة
ماما في وسط كلامها بتقولي "بلاش أي حاجة، لو الموضوع بقى رسمي، شكلك ايه قدام صحابك و الناس لما يلاقوكي هتتخطبي لواحد كنتي ماشية معاه قبل الخطوبة!" و لوهلة استغربت من منطق الناس اللي أحسنلهم إني أتخطب لواحد يادوب عارف اسمي و شغلتي أحسن من واحد أنا عارفاه و عارفني!
بس عارف اللي بيقتلني بجد ايه بقى؟
لما حد يطلب مني حاجة معينة ف أتشقلب عشان أعملهاله ف ألاقي إنه كان طالبها مني أنا و خمسة آخرون عشان مش فارق معاه أنا أعملها و لا غيري المهم إنها تتعمل و خلاص، اااااااه وجع😭